ەلىمىز بويىنشا قىزۋ تالقىلانىپ جاتقان ماڭىزدى ماقالا مادەنيەت سالاسى ماماندارىنىڭ دا نازارىنان تىس قالمادى. جيىنعا قاتىسۋشىلار ءوز ويلارىن ءبىلدىرىپ, پرەزيدەنت بەلگىلەپ بەرگەن مىندەتتەردىڭ وزەكتىلىگىنە توقتالدى.
– ماقالادا ايتىلعان نەگىزگى باعىتتاردى جۇزەگە اسىرۋدا ءبارىمىز بەلسەندىلىك تانىتۋىمىز قاجەت. سەبەبى, ەلىمىزدىڭ جارقىن بولاشاعى ەرتەڭگى ۇرپاقتارىمىزدىڭ جاقسى ءومىر ءسۇرۋ كەپىلى بولماق. پرەزيدەنتىمىز «جاڭا تۇرپاتتى جاڭعىرۋدىڭ ەڭ باستى شارتى – سول ۇلتتىق كودىڭدى ساقتاي ءبىلۋ. ونسىز جاڭعىرۋ دەگەنىڭىزدىڭ قۇر جاڭعىرىققا اينالۋى وپ-وڭاي» دەپ, رۋحاني جاڭعىرۋ رۋحاني بولمىسىمىزدى ساقتاۋدا جاتقانىن اتاپ كورسەتتى. ويتكەنى, ءبىزدىڭ بارلىق باي مۇرالارىمىز تاريحىمىز بەن مادەنيەتىمىزدە, ادەبيەتىمىز بەن ونەرىمىزدە ەكەنى داۋسىز. تاريحتان تەرەڭ تامىر الىپ, رۋحاني قۇندىلىقتارىمىزدى دارىپتەسەك, كەمەل كەلەشەككە جارقىن جۇزبەن جەتەمىز. ماقالادا قامتىلعان باسەكەلىك قابىلەت ماسەلەسى دە وتە ورىندى ايتىلعان دەپ ەسەپتەيمىن. ەلباسىنىڭ «بولاشاقتا ۇلتتىڭ تابىستى بولۋى ونىڭ تابيعي بايلىعىمەن ەمەس, ادامدارىنىڭ ءباسەكەلىك قابىلەتىمەن ايقىندالادى» دەگەنى ءبارىمىزدى ويلاندىرۋى ءتيىس. مەملەكەتىمىز ءاردايىم ونەر ۇجىمدارى مەن بىرلەستىكتەرىن قاناتىنىڭ استىنا الىپ قولداۋ كورسەتىپ كەلەدى.
– ماقالادا نىسانعا الىنعان ءار باعىت حالقىمىزدىڭ بولاشاعى ءۇشىن قىزمەت ەتەتىن ومىرشەڭ قۇجات دەپ تۇسىنەمىز. ەلىمىزدىڭ ءمادەنيەت سالاسىنىڭ بيىككە ورلەۋى مەملەكەتىمىزدىڭ ساياسي دامۋىمەن تىعىز بايلانىستى, – دەيدى جامبىل اتىنداعى قازاق مەملەكەتتىك فيلارمونياسىنىڭ ديرەكتورى جەڭىس سەيدۋللا ۇلى.
جيىن بارىسىندا «ۇلتتىق بىرەگەيلىكتى ساقتاۋ», «پراگماتيزم», «ءبىلىمنىڭ سالتانات قۇرۋى» سىندى تاقىرىپتار جەكە-جەكە ءسوز بولدى. قازاقستاننىڭ حالىق ءارتىسى نۇرعالي ءنۇسىپجانوۆ: «دانا حالقىمىزدا «جازدىڭ ءبىر كۇنى قىستىڭ ءبىر ايىنا ازىق بولادى» دەيتىن كەرەمەت ءسوز بار. پرەزيدەنتىمىزدىڭ حالىققا سەرپىن بەرۋى, بولاشاققا دەگەن قادامىمىزدى نىقتاپ, باعىتىمىزدى ايقىنداپ بەردى. ەلىمىزدىڭ دامۋى, حالقىمىزدىڭ بەيبىت ءومىرى, ەكونوميكامىزدىڭ ورىستەۋى, ءمادەنيەتىمىز بەن ونەرىمىزدىڭ كەڭگە قانات جايۋى − ءبارىمىزدىڭ باستى تىلەگىمىز. ەلباسىمىزدىڭ جارقىن باستاماسىن ءارى قاراي ءىلىپ اكەتىپ جۇزەگە اسىرۋعا اتسالىسۋ ءار قوعام مۇشەسىنە ارتىلاتىن مىندەت دەپ ەسەپتەيمىن. وتانىمىزدىڭ گۇلدەنۋى – بارىمىزگە ورتاق مۇرات», دەپ جينالعاندارعا وي سالدى.
سونداي-اق, «قازاقستانداعى 100 جاڭا ەسىم», «قازاق تىلىندەگى 100 جاڭا وقۋلىق» سىندى باستامالارعا قاتىستى وي-پىكىرلەر ورتاعا تاستالىپ, ءار باعىتتىڭ ماڭىزدىلىعى تۋرالى كەڭ مازمۇندا ايتىلدى.
ارمان وكتيابر,
«ەگەمەن قازاقستان»
الماتى
