قاراعاندى 1 مامىر – قازاقستان حالقىنىڭ بىرلىگى كۇنى مەرەكەسىن ەرەكشە جاعدايدا اتاپ ءوتتى. ادەتتەگىندەي, مەرەكەنى مەيلىنشە قىزدىرعان مەكەن قالاداعى ورتالىق ساياباق بولدى. وندا ەتنومادەني بىرلەستىكتەردىڭ «بىرلىك شاڭىراعى» اتتى ءححىى وبلىستىق فەستيۆالى ءوتتى. اتالمىش شارادا ءبىر شاڭىراق استىنداعى ءبىر اتانىڭ بالاسىنداي ءار ءتۇرلى ۇلتتار مەن ۇلىستار كورەرمەندەر الدىندا ءوز ونەرلەرىن كورسەتىپ, ەلىمىزدەگى تاتۋلىق پەن تۇراقتىلىقتى دارىپتەدى. ءوڭىرىمىزدىڭ ءار اۋدان قالالارىنان قاتىسقان 28 ەتنومادەني بىرلەستىكتەردىڭ 500-گە تارتا ونەرپازدارى مەرەكەنىڭ مايەگىنە اينالدى.
ايتۋلى مەرەكەگە ارنايى ات شالدىرعان ايماق باسشىسى ەرلان قوشانوۆ جيىلعان جۇرتتى مەرەكەمەن قۇتتىقتادى.
«ەلىمىز جۇيەلى جاڭعىرۋ, قوعامدىق جاڭارۋ جولىنا ءتۇستى. كەشە عانا ەلباسىمىز نۇرسۇلتان نازارباەۆتىڭ قاتىسۋىمەن اسسامبلەيا سەسسياسى ءوتتى. مەملەكەت باسشىسى سول سەسسيادا بىرلىك – بايلىعىمىز, تۇراقتىلىق – تۇعىرىمىز, جاڭعىرۋ – جارقىن جولىمىز ەكەنىن اتاپ ءوتتى. مىقتى, تابىستى, رۋحاني باي مەملەكەتتى تەك بەيبىتشىلىك پەن كەلىسىمدە عانا قۇرۋعا بولادى», دەدى اكىم.
جالپى بۇل كۇنى شاڭىراقتاعى شاتتىق شارتاراپقا جايىلىپ, شارانى وتكىزۋشىلەر قالا تۇرعىندارى مەن قوناقتارىنا ارناپ ءتۇرلى ويىن-ساۋىق ۇيىمداستىرادى. مۇندا ءار ءتۇرلى ۇلتتار مەن ۇلىستاردىڭ ءان-بيىنەن بولەك, باسقا دا مəدەني شارالار, كورمەلەر مەن سپورت جارىستارى وتكىزىلدى.
سونداي-اق, بۇعان دەيىن قاراعاندى وبلىسىنىڭ اكىمى ەرلان قوشانوۆ قازاقستان حالقىنىڭ بىرلىگى كۇنى قارساڭىندا ەتنومادەني بىرلەستىكتەردىڭ باسشىلارىمەن, قازاقستان حالقى اسسامبلەياسىنىڭ مۇشەلەرىمەن كەزدەسكەن بولاتىن. دوستىق ۇيىندە ەلىمىزدى رۋحاني جاڭعىرتۋ, بىرلىك پەن ۇلتارالىق كەلىسىم تۋرالى ءسوز قوزعالدى.
شارا بارىسىندا وبلىس اكىمى ايماقتىڭ 24 ەتنومادەني بىرلەستىكتەرىنە 700 مىڭ تەڭگە مولشەرىندە سىياقى تابىستادى.
ءوز كەزەگىندە ءىس-شاراعا ۇيىتقى بولعان قاراعاندى وبلىسىنىڭ مادەنيەت, مۇراعاتتار جانە قۇجاتتاما باسقارماسىنىڭ باسشىسى ەركەبۇلان اعىمباەۆ تا ۇلتتىق ءتىل مەن ءداستۇردى دارىپتەپ, جوعارىداعى فەستيۆالدىڭ بيىك دەڭگەيدە وتۋىنە ات سالىسقان قاتىسۋشىلاردى ديپلومدارمەن جانە سەرتيفيكاتتارمەن ماراپاتتادى.
ميراس اسان,
«ەگەمەن قازاقستان»
