سەناتورلار ەلوردانىڭ سول جاق جاعالاۋىنداعى ماڭگىلىك ەل جانە ۇلى دالا داڭعىلدارىنىڭ قيىلىسىنداعى جاڭا اۋدانداردىڭ بىرىنە جاسىل جەلەككە بولەۋگە كوتەرىڭكى كوڭىل كۇيمەن كەلدى. بۇل جەر حالىقارالىق «ەكسپو-2017» كورمەسى وتەتىن ورىنعا تاياۋ بولاتىن.
«بۇگىنگى سەنبىلىكتىڭ بارلىق استانالىقتار ءۇشىن ەرەكشە ماڭىزى بار. اسىرەسە, الداعى «ەكسپو-2017» كورمەسىنىڭ قارساڭىندا سەنبىلىكتە قالانى كوركەيتۋگە ءبارىمىز ۇلەس قوسىپ جاتىرمىز. قالامىز جاسىل جەلەككە ورانعان سايىن وركەندەپ, دامي تۇسەتىن بولادى», دەدى دەپۋتات جابال ەرعاليەۆ.
سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى سەرگەي پلوتنيكوۆ سەنبىلىكتىڭ ءوتۋى استانا تۇرعىندارى مەن بارشا قازاقستاندىقتاردى بىرىكتىرەتىن ىزگى ءداستۇر ەكەنىن اتاپ ءوتتى. «ەلوردامىز بۇدان دا ادەمى بولۋ ءۇشىن بارشا استانالىقتار سەكىلدى دەپۋتاتتار دا جاسىل جەلەككە بولەۋگە ءوز ۇلەستەرىن قوسۋدا», دەدى س.پلوتنيكوۆ.
شارا بارىسىندا جوعارعى پالاتانىڭ وكىلدەرى جۇزدەن استام قاراعاي, تال, جوكە كوشەتتەرىن وتىرعىزدى.
