«ءبىز وتكەن جىلى قازاقستان حالقىنىڭ بىرلىگى كۇنى قوستانايدىڭ ورتالىق الاڭىندا وسى وڭىردە تۇراتىن ءتۇرلى ۇلىستاردىڭ مۋزىكالىق اسپاپتارىنان كورمە ۇيىمداستىرعان ەدىك. ول قوستانايلىقتارعا ۇناپ, ونى قىزىقتاۋشىلاردىڭ قاراسى ازايماعان ەدى. ەندى بيىل مۋزىكالىق اسپاپتاردى تەك كورسەتىپ عانا قويماي, ونىڭ اۋەنىن تىڭداتقىمىز كەلدى. مۋزىكا ادامداردى جاقىنداستىرا تۇسەدى, مۋزىكا تىلىندە دوستىق سىيلايتىن قۇدىرەت بار» دەدى قازاقستان حالقى وبلىستىق اسسامبلەياسىنىڭ ءباسپاسوز حاتشىسى ءزۇلفيا نابيەۆا.
فەستيۆالگە جينالعاندار ءتۇرلى ۇلىستاردىڭ مۋزىكالىق اسپابىنىڭ داۋىسىن ەستىدى. ازەربايجاننىڭ ساز, ورىستاردىڭ قاسىعى, شىعىس حالىقتارىنىڭ ناگاراسى, قازاقتاردىڭ دابىلى, دومبىراسى سەكىلدى وزگە ۇلتتاردىڭ دا حالىق اسپاپتارىنىڭ ءۇنى ەرەكشە, كىمنىڭ دە بولسا جانىن باۋراعانداي ەدى. سيۆي حاسىموۆا ازەربايجان حالقىنىڭ ساز اسپابىندا وتە شەبەر وينايدى.
«بۇل ونەر ماعان اتالارىمنان دارىعان. ماعان مىنا اسپاپتى ساتىپ اپەرگەن. مۇندا ازەربايجان حالقىنىڭ ءتۇرلى اۋەندەرىن وينايمىن, ءان ايتامىن. مەن قوستانايلىق ازەربايجان جىگىتكە تۇرمىسقا شىعىپ, وسىنداعى دەنيسوۆ اۋدانىندا تۇرىپ جاتقانىما ءتورت جىل بولدى. وزىممەن بىرگە وسى ساز اسپابىن الىپ كەلدىم. ماعان قازاقستان وتە ۇنايدى, تۇرىپ جاتقان اۋداندا قازاقتارمەن, وزگە ۇلت وكىلدەرىمەن جاقسى سىيلاسامىز, دوس بولىپ كەتتىم. ولارعا مەنىڭ ءانىم دە ۇنايدى» دەيدى سيۆي.
ءزۇلفيا نابيەۆانىڭ ايتۋىنشا, كەلەسى فەستيۆالگە وبلىس ءوڭىرىنىڭ ونەرپازدارىن تۇگەل قاميتىن بولادى. الداعى ۋاقىتتا فەستيۆالدىڭ اۋقىمى كەڭەيە تۇسەدى. فەستيۆال قازاقستانداعى ۇلت پەن ۇلىستار دوستىعىن نىعايتۋ, ولاردىڭ ءبىرى-ءبىرىنىڭ ءداستۇرىن, مادەنيەتىن جاقىنىراق ءبىلۋىن, ءار ۇلىستىڭ اۋەنىندەگى, ونەرىندەگى سۇلۋلىقتى پاش ەتۋدى ماقسات تۇتتى.
ءنازيرا جارىمبەتوۆا
«ەگەمەن قازاقستان»
قوستاناي
