وتكەن جىلعى چەمپيوناتتىڭ جۇلدەگەرلەرى جانكۇيەر قاۋىمدى اسا تارتىستى جانە تارتىمدى ويىنمەن ريزا ەتتى. ءبىر قاراعاندا, ەكى دوپ ايىرماشىلىعىمەن الدا تۇرعان جانە ءبىر ويىنشىسى ارتىق پاۆلودارلىقتار جەڭىستى ەندى ۋىستان شىعارمايتىنداي-اق كورىنگەن. بىراق الماتىلىقتار الداپ سوقتى. ۇجىم 1:3 ەسەبىمەن ۇتىلىپ جاتسا دا, ۇنجىرعاسىن تۇسىرمەي, ون ويىنشىمەن ءجۇرىپ-اق ەسەپتى تەڭەستىرە ءبىلدى. بۇل ويىندا «ەرتىستىڭ» شابۋىلشىسى اسلان داراباەۆتىڭ ءۇش ويىنشىنى الداپ ءوتىپ, الىستان تەۋىپ ادەمى گول سوققانىن ايتا كەتكەن ءجون. ء سويتىپ, بۇعان دەيىن تۋرنير كەستەسىندە ەكىنشى جانە ءۇشىنشى كەلە جاتقان قوس كلۋب ماڭىزدى ەكى ۇپايدان جوعالتىپ, جاعدايلارىن ءبىرشاما ناشارلاتىپ الدى.
ءوزىن وكشەلەپ كەلە جاتقاندار وسىلايشا يتجىعىس ءتۇسىپ جاتقاندا, توپ باسىنداعى «استانا» قارقىنعا قارقىن قوسىپ, قارا ءۇزىپ كەتتى. تەمىرجولشىلار بۇل جولى سىرت الاڭدا «تارازدى» ءىرى ەسەپپەن تاس-تالقان ەتىپ ۇتتى. قازىر «استانانىڭ» جەكە-دارا كوش باستاعانى ءوز الدىنا, ولاردىڭ باسقالارعا قاراعاندا ءبىر ويىنى كەم.
شىمكەنت بارىپ, جەرگىلىكتى «ورداباسىمەن» ويناعان «توبىل» كۇتپەگەن جەردەن جەڭىسكە جەتتى. ءوز الاڭىندا قانداي دا بولسىن قارسىلاسقا ەسە جىبەرە قويمايتىن وڭتۇستىك فۋتبولشىلارى بۇل جولى جانكۇيەرلەرىن جەرگە قاراتتى. وسى جەڭىستەن كەيىن قوستانايلىق ۇجىم تۋرنير كەستەسىندە «قايراتتى» ءتومەن سىرعىتىپ, ءۇشىنشى ساتىعا كوتەرىلدى.
ۇزدىك التىلىقتىڭ قاتارىنا ەنۋ ءۇشىن قىزۋ تارتىس ءجۇرىپ جاتىر. تۋرنير كەستەسىندە كورشى تۇرعان «اقجايىق» پەن «قايسار» اراسىنداعى ماتچتا ورال فۋتبولشىلارىنىڭ مەرەيى ءۇستەم بولدى. ءسويتىپ, ولار «قايسارمەن» اراداعى بەس ۇپاي ايىرماشىلىعىن ەكىگە دەيىن قىسقارتىپ, جەتىنشى ورىنعا تاباندى نىق تىرەدى.
سەگىزىنشى تۋردا «اقتوبە» مەن «شاحتەر» جانە «اتىراۋ» مەن «وقجەتپەس» كوماندالارى اراسىنداعى ويىندار اقتوبە مەن كوكشەتاۋداعى ستاديونداردىڭ ماۋسىمعا دايىن بولماعاندىعىنان كەيىنگە شەگەرىلدى.
سەگىزىنشى تۋرداعى ويىندار مىناداي ناتيجەلەرمەن اياقتالدى:
«ەرتىس» – «قايرات» – 3:3 (3:1), گوۋ, 5 (0:1). جيۆكوۆيچ, 13 – پەنالتيدەن (1:1). داراباەۆ, 29 (2:1). دجا دجەدجە, 40 (3:1). يليچەۆيچ, 61 (3:2). يسلامحان, 88 (3:3). «ورداباسى» – «توبىل» – 1:2 (1:0), كوۆالچۋك, 45 (1:0). جانعىلىشباي, 64 (1:1). دەسپوتوۆيچ, 68 (1:2). «استانا» – «تاراز» - 4:0 (3:0), گراحوۆاتس, 13 (1:0). كابانانگا, 33 (2:0). جالمۇقان, 43 (3:0). كابانانگا, 84 (4:0). «اكجايىق» – «قايسار» – 1:0 (0:0), ۆاليۋللين, 56 (1:0).
سۇرمەرگەندەر كوشىن بۇرىنعىشا «قايراتتىڭ» شابۋىلشىسى جەرار گوۋ باستاپ كەلەدى. ونىڭ ەنشىسىندە 8 گول بار. ال ەكىنشى ورىنعا بيىلعى ماۋسىمدا ءوزىنىڭ 5-ءشى گولىن سوققان جۋنيور كابانانگا («استانا») كوتەرىلدى.
29 ءساۋىر كۇنى وتەتىن 9-تۋردا كوماندالار مىناداي جۇپ قۇراپ, ءوزارا تارتىسقا تۇسەدى:
«وقجەتپەس» – «اقتوبە», «تاراز» – «اتىراۋ», «قايسار» – «استانا», «قايرات» – «اقجايىق», «شاحتەر» – «ورداباسى», «توبىل» – «ەرتىس».
قايرات ءابىلدينوۆ,
«ەگەمەن قازاقستان»
