قورىتىندىسىندا «استانا-ا» كومانداسى چەمپيون اتانسا, اقتىق سىندا وسى كومانداعا 0:1 ەسەبىمەن جەڭىلگەن «استانا-B» ۇجىمى ەكىنشى ورىن الدى. ال ءۇشىنشى ورىن ەكى كومانداعا ءبىرىلدى. ياعني, استانا فۋتبول فەدەراتسياسى مەن «دينامو» كوماندالارى ۇزدىك ۇشتىكتى قورىتىندىلادى. دەگەنمەن, قوس كوماندا ءوزارا كۇش سىناسىپ, استانا فۋتبول فەدەراتسياسى باسىم ءتۇستى.
سونىمەن قاتار, «ۇزدىك قاقپاشى» اتاعىنا «استانا-ۆ» كومانداسىنىڭ گولكيپەرى بۋچ دانيلو يە بولسا, «استانا-ا» كومانداسى ساپىندا ەرەكشە ويىنىمەن كوزگە تۇسكەن نۇرعالي الديار «ۇزدىك ويىنشى» اتاندى.
ماراپاتتاۋ راسىمىنە قازاقستان ۇلتتىق قۇراماسى مەن «استانا» فۋتبول كلۋبىنىڭ ەكس-كاپيتانى, بۇگىندە قازاقستان ۇلتتىق قۇراماسى باس باپكەرىنىڭ اسيستەنتى قىزمەتىن اتقاراتىن قايرات نۇرداۋلەتوۆ ارنايى قاتىستى.
«ءبارى كەرەمەت ءوتتى. بالالار ءۇشىن «استانا» كومانداسى جاقسى تۋرنير ۇيىمداستىردى. بۇلدىرشىندەردىڭ ەموتسياسى... جەڭىستەرىنە قۋانىپ, جەڭىلىستەرىنە وكىنىپ جاتقاندارىن كوردىم. ءۇشىنشى ورىن ءۇشىن وتكەن ماتچ اسا تارتىستى ءوتتى. بۇل فۋتبولدىڭ دامىپ جاتقانىنىڭ كورىنىسى. العاشقى ەكى ورىنعا يە بولعان كوماندالاردىڭ دەڭگەيى دە, تەحنيكالارى دا جوعارى ەكەنى, ءبىرىن-ءبىرى لەزدە تۇسىنەتىنىن بايقادىم. وعان فينالدىق ويىندا انىق كوزىم جەتتى», – دەدى قايرات نۇرداۋلەتوۆ.
ۇيىمداستىرۋشىلار تەك فۋتبولمەن شەكتەلىپ قويماي, اتا-انالار اراسىندا دا ارنايى جارىستار ۇيىمداستىردى. ايەلدەر دوپ تەبۋ بويىنشا, ال ەرلەر الاڭ ورتاسىنان قاقپانى ءدال كوزدەۋ بويىنشا ءوزارا سىنعا ءتۇستى. ءبىر قىزىعى, بۇل سىندا ءبىر وتباسىنىڭ مۇشەلەرى جەڭىس تۇعىرىنان كورىندى.
«بالام التى جاسىنان فۋتبولعا قاتىسادى. مىنە, ەكى جىلدان اسا ۋاقىت ءوتتى. قازىر ءانۋار قايىربەك ۇلى ەسىمدى باپكەردىڭ قول استىندا دايىندالىپ ءجۇر. «ەلوردا كوكتەمى» ءتۋرنيرىنىڭ وتەتىنى ءبىر اي بۇرىن بەلگىلى بولدى. كۇندەلىكتى جاتتىعۋلاردان قالمادى. بۇل ۇلىمنىڭ العاشقى جەڭىسى. الداعى ۋاقىتتا بيىك بەلەستەردى باعىندىرىپ, ەلىمىزدىڭ, الەمنىڭ جارىق جۇلدىزدارىنىڭ ءبىرى بولادى دەپ ۇمىتتەنەمىن», – دەدى «استانا-ا» كومانداسىنىڭ ويىنشىسى امانگەلدى ەربولدىڭ اناسى جانات اعىتاەۆا.
