كەزدەسۋ ۇيىمعا مۇشە مەملەكەتتەر باسشىلارى كەڭەسىنىڭ ماۋسىمدا استانادا وتەتىن وتىرىسىنا قورىتىندى دايىندىق كەزەڭى بولدى. «2016 جىلدىڭ ماۋسىمىنان باستاپ قازاقستان شىۇ-عا توراعالىق ەتىپ كەلەدى. پرەزيدەنت نۇرسۇلتان نازارباەۆ شىۇ-عا مۇشە مەملەكەتتەر باسشىلارى كەڭەسىنىڭ وتكەن وتىرىسىندا بەلگىلەپ بەرگەن, ۇيىم شەڭبەرىندەگى قازاقستان ءتوراعالىعىنىڭ نەگىزگى باسىمدىقتارى سىزدەرگە ءمالىم. ول شىۇ-نىڭ 2025 جىلعا دەيىنگى دامۋ ستراتەگياسىن ىسكە اسىرۋ تۇرعىسىنان وڭىرلىك قاۋىپسىزدىكتى نىعايتۋ, ەكونوميكالىق ىنتىماقتاستىقتى دامىتۋ, ترانزيتتىك-كولىك الەۋەتىن اشۋ, مادەني جانە گۋمانيتارلىق بايلانىستاردى تەرەڭدەتۋ», – دەدى ق.ءابدىراحمانوۆ ءوز سوزىندە.
وتىرىستا مينيسترلەر شىۇ-عا جاڭا مۇشە رەتىندە ءۇندىستان مەن پاكىستاننىڭ قوسىلۋ پروتسەسىن اياقتاۋ ماسەلەلەرىن تالقىلادى. قاتىسۋشىلاردىڭ پىكىرىنشە, بۇل ەكى ەلدىڭ تولىققاندى ءمۇشە ەتىپ قابىلدانۋى دامۋ مەن كوپجاقتى ىنتىماقتاستىقتىڭ ءتۇبەگەيلى جاڭا كەزەڭىن اشىپ, ۇيىمنىڭ حالىقارالىق ىقپالى مەن بەدەلىن نىعايتا تۇسەدى.
سونىمەن قاتار, قازاقستان تاراپى ۇيىمنىڭ ەكونوميكالىق جانە ءمادەني-گۋمانيتارلىق سالالارىنداعى ىنتىماقتاستىقتى كۇشەيتۋ قاجەتتىلىگىنە باسا نازار اۋداردى. ق.ءابدىراحمانوۆ شىۇ-عا مۇشە مەملەكەتتەر وكىلدەرىنىڭ قاتىسۋىمەن ەكسپو-2017 شەڭبەرىندە ءبىرقاتار ءىس-شارالار, سونداي-اق, استانادا XI ءبىلىم اپتاسى, ونەر فەستيۆالى جانە «جاسىل ەكونوميكا, تۋريزم مەن سپورتتى دامىتۋ» تاقىرىبىندا شىۇ جاستار فورۋمى وتەتىنىن حابارلادى.
سىمك وتىرىسى بارىسىندا قاتىسۋشىلار وڭىرلىك قاۋىپسىزدىكتى نىعايتۋ, تەرروريزم مەن ەكسترەميزمگە قارسى ءىس-قيمىل, ەسىرتكى ترافيگىنە قارسى كۇرەس جونىندەگى شارالاردى, شىۇ-نىڭ الداعى كەڭەيۋى شەڭبەرىندە ىنتىماقتاستىقتى دامىتۋ پەرسپەكتيۆالارىن دا تالقىلادى.
سىرتقى ساياسات ۆەدومستۆولاردىڭ باسشىلارى ۇيىمعا ءمۇشە مەملەكەتتەر باسشىلارى كەڭەسىنىڭ شاعىن ءجانە كەڭەيتىلگەن قۇرامداعى وتىرىستارى كۇن ءتارتىبىنىڭ جوباسى تۋرالى شەشىم قابىلدادى. شىۇ استانا دەكلاراتسياسىنىڭ جوباسى كەلىسىلدى. سونداي-اق, ۇيىم سامميتىنىڭ قورىتىندىلارى بويىنشا قول قويۋعا ەنگىزىلەتىن قۇجاتتار ءتىزبەسىنىڭ جوباسى تۋرالى شەشىمگە جانە باسقا دا قۇجاتتارعا قول قويىلدى.
شىۇ ءسامميتى 2017 جىلعى 8-9 ماۋسىمدا استانادا وتەدى.
جولدىباي بازار,
«ەگەمەن قازاقستان»
