ونىڭ ايتۋىنشا, ۇبت وبلىستا 16 جەردە وتكىزىلەدى. ولاردىڭ تورتەۋى جوعارى وقۋ ورىندارىنىڭ بازاسىندا, ۇشەۋى اۋدان ورتالىقتارىنداعى كوللەدجدەردە, توعىزى جالپى ورتا مەكتەپتەردىڭ بازاسىندا ورنالاسقان. ءاربىر ۇبت وتكىزۋ پۋنكتتەرىندە 11-دەن 14-كە دەيىن اۋديتوريالار دايارلانىپ, ولار ۇيالى تەلەفون بايلانىسىن اجىراتاتىن 237 قۇرىلعىمەن جابدىقتالىپ وتىر.
«بيىلعى جىلى مينيسترلىكتىڭ تاپسىرماسىنا سايكەس 91 جاڭا ۇلگىدەگى 4G جيىلىكتەگى بايلانىس اجىراتاتىن قۇرىلعىلاردى الۋعا جەرگىلىكتى بيۋدجەتتەن قارجى قارالىپ, ساتىپ الۋ جۇمىستارى جۇرگىزىلۋدە. سونىمەن قاتار, تەستىلەۋ پۋنكتەرىندە 26 رامالى مەتال ىزدەگىشتەر, 226 سالقىنداتقىش, تەستىلەۋ كەزىندە بەينەجازبا جۇرگىزۋ ماقساتىندا 42 بەينە تىركەگىش ورنالاستىرىلدى», - دەدى باسقارما باسشىسى.
قازىرگى تاڭدا 33112 ءبىتىرۋشىنىڭ 23760-ى ياعني 71,8 پايىزى ۇبت تاپسىرادى دەپ كۇتىلۋدە. ۇبت-عا ءوتىنىش قابىلداۋ 10-ناۋرىزدان 10-مامىرعا دەيىن جۇرگىزىلەدى.
ۇبت تاپسىرۋعا نيەت بىلدىرگەن مەكتەپ بىتىرۋشىلەرى ۇبت-نىڭ جاڭا فورماتىنا دايىندالۋ ماقساتىندا الدىن-الا بايقاۋ تەستەرىنە قاتىستىرىلۋدا. ناۋرىز ايىندا الىنعان بايقاۋ تەستەرىنىڭ ورتا بالى – 75,2 بالدى قۇراپ وتىر.
سونداي-اق, ۇبت تاپسىراتىن 23760 ءبىتىرۋشىنىڭ 13585-ءى تاسىمالداۋدى, 12443-ءى تاماقتانۋدى, 1825 وقۋشى جاتىن ورىندى قاجەت ەتەدى. بۇگىنگى تاڭدا جەرگىلىكتى بيۋدجەتتەن بىتىرۋشىلەردى تەستىلەۋ ءۇشىن قاجەتتى قاراجات ءبولىنىپ, ۇيىمداستىرۋ جۇمىستارى جۇرگىزىلۋدە.
وبلىستاعى 1429 تۇلەك «التىن بەلگى» بەلگىسىنە, 852 ءبىتىرۋشى ۇزدىك اتتەستاتقا, 9-سىنىپتى بىتىرۋشىلەردىڭ 3568-ءى ۇزدىك كۋالىككە ءۇمىتتى.
