ەلباسى نۇرسۇلتان نازارباەۆتىڭ شارا قاتىسۋشىلارىنا قۇتتىقتاۋ حاتىن قر ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ وقىپ بەردى.
«فورۋم بارىسىندا ءدىني باسقارمامەن ارنايى ازىرلەنگەن «ءححى عاسىردىڭ ۇزدىك زياتكەر يمامى» تۇجىرىمداماسى جانە «حانافي مازحابى مەن ماتۋريدي سەنىم مەكتەبى - قازاقستانداعى يسلامنىڭ ءداستۇرلى جولى» ۇستانىمى بەكىتىلدى. اتالعان قۇجاتتاردا قازاقستانداعى يسلامنىڭ ءداستۇرلى مەكتەبىنىڭ ءبىرى بولىپ ەسەپتەلەتىن حانافي مازحابىنىڭ ەرەكشەلىگى, ەلىمىزدەگى مەشىت يمامدارىنىڭ ءححى عاسىرداعى زامان تالابىنا ساي جان-جاقتى ءبىلىم الىپ, جاماعاتقا ۇلگى بولۋ تالابىنان تۋىندايتىن ماسەلەلەر قامتىلعان. فورۋمدا ارنايى ۇندەۋ قابىلدانىپ, وندا ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان ۇلتتىق كود پەن ۇلتتىق بىرەگەيلىكتى ساقتاۋ جانە نىعايتۋ جەلىسىندە حالقىمىزدىڭ ءدىني تۇتاستىعى مەن رۋحاني جاسامپازدىعىن قامتاماسىز ەتىپ كەلە جاتقان ءداستۇرلى يسلام ءدىنىنىڭ الەۋەتىن قوعامىمىزدىڭ رۋحاني جەتىلۋىنە جۇمىلدىرىلاتىنى كورىنىس تاپتى», - دەلىنگەن ءدىن ىستەرى جانە ازاماتتىق قوعام مينيسترلىگى تاراتقان اقپاراتتا.
فورۋم بارىسىندا قمدب توراعاسى, باس مۋفتي ەرجان قاجى مالعاجى ۇلى ەل مۇسىلماندارىنىڭ مۇددەسىن بىلدىرەتىن مۋفتيات پەن مەشىت يمامدارىنىڭ جاماعاتتىڭ ءدىني قاجەتتىلىكتەرىن وتەۋ, قوعامىمىزدىڭ رۋحاني-ادامگەرشىلىك قۇندىلىقتارىن نىعايتۋ, ەلىمىزدەگى ەتنوسارالىق جانە كونفەسسياارالىق كەلىسىم مەن تۇراقتىلىقتى ساقتاۋ باعىتىندا اتقارىپ وتىرعان جۇمىستارىنا جان-جاقتى توقتالىپ, ونىڭ الدىندا تۇرعان جاڭا مىندەتتەر مەن باسىمدىقتار تۋرالى ايتتى.
ال مينيستر نۇرلان ەرمەكباەۆ قازاقستاننىڭ ءوسىپ-وركەندەۋى كوپتەگەن فاكتورلاردان, ونىڭ ىشىندە ءدىننىڭ قوعامداعى ورنى مەن ءرولىن دۇرىس تۇسىنۋگە بايلانىستى ەكەندىگىنە باسا ءمان بەردى.
«ۇلتتىق-مادەني قۇندىلىقتار مەن داستۇرلەردى, ەتنوسارالىق جانە كونفەسسياارالىق كەلىسىمدى ساقتاۋدا مەملەكەتتىڭ ستراتەگيالىق ارىپتەسى رەتىندە ەلىمىزدەگى ءداستۇرلى يسلامنىڭ بىردەن-ءبىر مويىندالعان قۇرىلىمى قازاقستان مۇسىلماندارى ءدىني باسقارماسىن كورۋىمىزدىڭ تولىق قيسىنى بار», - دەدى ول.
