«وبلىستاعى ەتنومادەني بىرلەستىكتەر ەلباسى ساياساتىن قولداپ, ەلىمىزدەگى تاتۋلىق پەن تۇراقتىلىقتى نىعايتۋعا ۇلەس قوسىپ كەلەدى. قوعامدىق جانە ساياسي, باسقا دا اۋقىمدى ءىس-شارالارعا بەلسەندى تۇردە اتسالىسادى», دەيدى شىعىس قازاقستان وبلىسى قازاقستان حالقى اسسامبلەياسى حاتشىلىعىنىڭ مەڭگەرۋشىسى اسقار نۇرعازيەۆ.
ادەتتە, دوستىق ۇيلەرى, ەتنومادەني بىرلەستىكتەر جايىندا ءسوز قوزعالعاندا, جۇرتتىڭ كوبى ولار ءان سالىپ, بي بيلەپ, كونتسەرت قويۋمەن عانا شۇعىلدانادى دەپ ويلايدى. شىن مانىندە, ولاي ەمەس. قوعامدىق كەلىسىم ورتالىقتارى قوعامداعى ماڭىزدى ماسەلەلەرگە دەر كەزىندە ءۇن قاتىپ, ءوز ۇلەستەرىن قوسىپ وتىرادى. ماسەلەن, بىلتىر وبلىستاعى دوستىق ۇيلەرى وڭىردە مەدياتسيانىڭ كەڭىنەن قولدانىلۋىنا قولداۋ ءبىلدىرىپ, جەرگىلىكتى قۇقىق قورعاۋ سالاسىنىڭ وكىلدەرىمەن بىرگە بىرقاتار شارالاردى جۇزەگە اسىردى.
ماسەلەن, 2016 جىلدىڭ اقپان ايىندا وسكەمەندەگى دوستىق ءۇيى-قوعامدىق كەلىسىم ورتالىعىندا مەدياتسيا ينستيتۋتىن دامىتۋ ماقساتىندا «شاڭىراق», «التەرناتيۆا» مەدياتسيا ورتالىقتارىمەن, مەدياتورلاردىڭ ۇلتتىق پالاتاسىمەن, دەنساۋلىق ساقتاۋ, ءبىلىم بەرۋ باسقارمالارىمەن, ىشكى ىستەر, ءادىلەت دەپارتامەنتتەرىمەن جانە وبلىستىق سوتپەن مەموراندۋمعا قول قويدى. ناتيجەسىندە, وبلىستا 74 مەدياتسيا كابينەتى اشىلىپ, 16 اۋداندا مەدياتسيا بويىنشا 218 كاسىبي ەمەس مەدياتورلار وقىتىلدى.
تاعى ءبىر ايتا كەتەر دۇنيە, بىلتىر شىعىس قازاقستان وبلىسى قازاقستان حالقى اسسامبلەياسى جانىنان مەتسەناتتار كلۋبى قۇرىلىپ, «مەكتەپكە جول» رەسپۋبليكالىق اكتسياسى اياسىندا از قامتىلعان وتباسىلارىنان شىققان 258 بالاعا 4 ملن تەڭگە كولەمىندە كومەك كورسەتىلدى. تاريح عىلىمدارىنىڭ كانديداتى نەللي كراسنوباەۆا جەتەكشىلىك ەتەتىن عىلىمي-ساراپشىلىق توپتىڭ اتقارىپ جاتقان جۇمىستارى ءوز الدىنا ءبىر توبە.
وسكەمەندەگى دوستىق ءۇيى-قوعامدىق كەلىسىم ورتالىعىنىڭ ديرەكتورى ەلدار تولەۋبەكوۆتىڭ ايتۋىنشا, وبلىس ورتالىعىندا 22 ەتنومادەني بىرلەستىك جۇمىس ىستەيدى. بۇعان بىرلەستىكتەر جانىنداعى كلۋبتار مەن جاستار ليگالارىن قوسىڭىز.
وسىدان بىرەر كۇن بۇرىن وبلىس ورتالىعىندا اتالىپ وتكەن پاسحا مەرەكەسىندە ازەربايجان ەتنومادەني بىرلەستىگى توراعاسىنىڭ ورىنباسارى تاربيز فارادجەۆتى جولىقتىردىق.
«بيىل ازەربايجان حالقىنىڭ قازاقستانعا كەلگەنىنە 80 جىل تولادى. اتاپ وتسەك دەگەن ويىمىز بار. ءبىزدىڭ اتا-بابالارىمىز دەپورتاتسيالانعان كەزدە قۇدايدىڭ قالاۋىمەن وسىناۋ پەيىش مەكەنگە كەلۋ باقىتى بۇيىرىپتى. باسقا ەلگە بارساق, قانداي كۇيگە تاپ بولارىمىزدى كىم بىلگەن؟! تۋعان جەرىنەن جىراقتاپ, توز-توزى شىعىپ كەلگەن ازەربايجانداردى قازاق حالقى قۇشاق جايا قارسى الدى. دارحان كوڭىل ەلدىڭ قامقورلىعىنىڭ ارقاسىندا بۋىنىمىز بەكىپ, تىرشىلىگىمىزدىڭ ءتىنى نىعايدى. وستىك, وندىك. وزگەسىڭ دەپ ەشكىم ءبىزدى وزەككە تەپكەن جوق. ەلباسىنىڭ ساليقالى ساياساتىنىڭ, قازاقتىڭ قوناقجايلىعىنىڭ ارقاسىندا بۇگىندە قازاقستانداعى بارلىق ۇلتتار تاتۋ-ءتاتتى عۇمىر كەشىپ جاتىر. ەلىمىزدەگى بارلىق مەرەكەلەردى ءبىر كىسىدەي اتاپ وتەمىز. ناۋرىز مەرەكەسىن تويلايمىز. بۇگىن, مىنە, پاسحا مەرەكەسىنە كەلدىك. مۇنداي مەرەكەلەر ەلىمىزدى مەكەن ەتكەن ۇلتتار مەن ۇلىستاردى ءبىر-بىرىنە جاقىنداستىرادى, باۋىرلاستىرادى. قازاق حالقىنىڭ توڭىرەگىنە توپتاستىرادى. سوندىقتان, ەلىمىزدە تەك قانا بەيبىتشىلىك سالتانات قۇرسىن دەگەن تىلەك ايتامىن», دەيدى ول.
تاربيز فارادجەۆ ازەربايجانداردىڭ ونەرى مەن مادەنيەتىن ناسيحاتتاۋعا ەرەكشە كوڭىل بولىنەتىنىن, «كاراباح» دەپ اتالاتىن بي توبى بار ەكەنىن ايتىپ, جاقىندا انسامبل اشۋدى جوسپارلاپ وتىرعاندارىن جەتكىزدى.
الاشتىڭ رۋحاني استاناسى سانالاتىن سەمەي قالاسىنداعى دوستىق ۇيىندە 18 ەتنومادەني بىرلەستىك بار. مەكەمە ديرەكتورى بەرىك كوپباەۆ ءبىرلەستىك مۇشەلەرىنىڭ قالاداعى قوعامدىق, مادەني ءىس-شارالارعا بەلسەنە قاتىساتىنىن ايتادى.
«اسىرەسە تاتار, نەمىس, ەۆرەي ءبىرلەستىكتەرىنىڭ جۇمىسىن ەرەكشە اتاپ وتۋگە بولادى. تاتارلار تاريحي وتانى تاتارستانمەن تىعىز بايلانىس ورناتقان. بۇعان دالەل رەتىندە سەمەيدە وتكەن سابانتوي مەرەكەسىنە مينتەمىر شايميەۆتىڭ ارنايى كەلىپ قاتىسقانىن ايتۋعا بولاتىن شىعار. نەمىستەر دە گەرمانيا ەلشىلىگىمەن جاقسى قارىم-قاتىناستا. وزگە ۇلت وكىلدەرىنىڭ ءوز مادەنيەتى مەن سالت-داستۇرلەرىن ۇمىتپاۋىنا ەرەكشە كوڭىل بولىنەدى. تاتارلاردىڭ «يرتيش مونلارى», ورىستاردىڭ «يستوكي», «براتتسى», نەمىستەردىڭ «انحايت», كورەيلەردىڭ «حوتنابي» سەكىلدى انسامبلدەرىن سەمەيلىكتەر جاقسى بىلەدى. دوستىق ءۇيى جانىنداعى كەشكى جەكسەنبىلىك مەكتەپتەردە تاتار, نەمىس, ورىس, ەۆرەي تىلدەرى وقىتىلادى», دەيدى ول.
ازامات قاسىم,
«ەگەمەن قازاقستان»
شىعىس قازاقستان وبلىسى
