جايلى باسپاناعا دەگەن مۇقتاجدىقتى قاناعاتتاندىرۋدىڭ, وڭتايلى شەشۋدىڭ جولدارى كوپ. سولاردىڭ ءبىرى – حالىقتىڭ الەۋمەتتىك ءالسىز توپتارى ءۇشىن ساتىپ الۋ قۇقىعىنسىز جالگەرلىك تۇرعىن ۇيلەر سالۋ. بۇگىنگى تاڭدا بۇل ساناتتاعىلار ءۇشىن ەكى تۇرعىن ءۇيدىڭ قۇرىلىسى جۇرگىزىلىپ, ناتيجەسىندە 212 وتباسى باسپاناعا يە بولادى. سول سياقتى ەلباسى تاپسىرماسىنا وراي جەكەمەنشىك ۇيلەر تۇرعىزۋ ماقساتىمەن ءتيىستى جەر تەلىمدەرى ءبولىنىپ, قاجەتتى ينفراقۇرىلىم تۇرعىسىنان دا قولداۋ جاسالۋدا. ماسەلەن, پەتروپاۆل قالاسى ماڭىنداعى سولنەچنىي كەنتى اۋماعىنان 740 گەكتار جەر تەلىمى بوساتىلىپ, سۋمەن, جارىقپەن قامتاماسىز ەتىلەدى. كەنتتىڭ ينفراقۇرىلىمدىق جۇيەسىنە ۇلتتىق قوردان 1,3 ميلليارد تەڭگە باعىتتالعان.
وبلىستىق قۇرىلىس باسقارماسى باسشىسىنىڭ ورىنباسارى ۆلاديسلاۆ لۋكيننىڭ ايتۋىنشا, 2015-2019 جىلداردى قامتيتىن «نۇرلى جول» باعدارلاماسى شەڭبەرىندە «بايتەرەك» ۇلتتىق باسقارۋ حولدينگى» بولگەن 3,4 ميلليارد تەڭگەگە وبلىس ورتالىعىندا 10 كوپ قاباتتى تۇرعىن ءۇيدىڭ قۇرىلىسى باستالىپ, ۇشەۋى پايدالانۋعا بەرىلدى. قالعاندارى جىل اياعىنا دەيىن ىسكە قوسىلادى. ياعني, 600 ءپاتەر ءوز قونىستانۋشىلارىنا ەسىكتەرىن ايقارا اشادى دەگەن ءسوز. كوپقاباتتى ءۇيلەردىڭ كوپتەپ بوي كوتەرۋى ارقاسىندا «بەرەكە» سەكىلدى ساۋلەتتى ىقشاماۋداندار پايدا بولدى.
جىل اياعىنا دەيىن بارلىعى 16 تۇرعىن ءۇي قولدانىسقا بەرىلسە, كەزەك سانى 1446 ادامعا كەميتىن بولادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
