– قازاقستان مەن قىتاي اراسىندا سەرىكتەستىكتىڭ ەرەكشە مودەلى قالىپتاسقان. ءبىز ەنەرگەتيكالىق جانە باسقا دا سالالاردا ىنتىماقتاستىق ورناتىپ وتىرمىز, – دەدى قازاقستان پرەزيدەنتى.
نۇرسۇلتان نازارباەۆ قحر توراعاسى سي ءتسزينپيننىڭ «ءبىر بەلدەۋ – ءبىر جول» اتتى حالىقارالىق فورۋمعا شاقىرعانىنا العىس ءبىلدىرىپ, بۇل ءىس-شاراعا قاتىسۋعا دايىن ەكەنىن جەتكىزدى.
– الدىمىزدا ءبىزدى كوپتەگەن بىرلەسكەن جۇمىس كۇتىپ تۇر. «ءبىر بەلدەۋ – ءبىر جول» فورۋمىنا قاتىسۋ ءۇشىن بەيجىڭگە باراتىن ساپارىم بارىسىندا ءبىز «نۇرلى جول» جانە «جىبەك جولى ەكونوميكالىق بەلدەۋى» باعدارلامالارىن ۇشتاستىرۋ جولدارىن جان-جاقتى تالقىلايمىز, – دەدى مەملەكەت باسشىسى.
چجان گاولي قحر توراعاسى سي ءتسزينپيننىڭ قازاقستان پرەزيدەنتىنە جولداعان سالەمىن جەتكىزىپ, ىنتىماقتاستىق جونىندەگى كوميتەت وتىرىسى اياسىندا جاڭا ۋاعدالاستىقتار جاسالعانىن اتاپ ءوتتى.
– قىتاي حالىق رەسپۋبليكاسىنىڭ توراعاسى بيىلعى ماۋسىم ايىندا «ەكسپو-2017» حالىقارالىق كورمەسىنىڭ اشىلۋىنا جانە شانحاي ىنتىماقتاستىق ۇيىمىنىڭ سامميتىنە قاتىسۋ ءۇشىن قازاقستانعا كەلۋدى جوسپارلاپ وتىر. ءسىزدىڭ باسشىلىعىڭىزبەن قازاقستاندا ەكونوميكانىڭ قارقىندى دامۋى جالعاسۋدا, الەۋمەتتىك تۇراقتىلىق بار ەكەنى بايقالادى, حالىقتىڭ ءال-اۋقاتى جاقسارىپ كەلەدى. حالىقارالىق ارەنادا دا قازاقستاننىڭ بەدەلى ارتىپ وتىر, – دەدى چجان گاولي.
قحر ۆيتسە-پرەمەرى قازاقستاندا جۇزەگە اسىرىلىپ جاتقان رەفورمالارعا قولداۋ ءبىلدىرىپ, نۇرسۇلتان نازارباەۆتىڭ رۋحاني جاڭعىرۋ جونىندەگى تاياۋداعى باستامالارىنىڭ ماڭىزدىلىعىنا توقتالىپ ءوتتى.
كەزدەسۋ سوڭىندا قازاقستان پرەزيدەنتى ەلىمىزدەگى وزگەرىستەردىڭ ىسكە اسىرىلۋىنا قولداۋ كورسەتكەنى ءۇشىن قحر باسشىلىعىنا العىس ءبىلدىرىپ, ساۋدا جانە ەكونوميكا سالاسى بويىنشا ەكى ەل اراسىنداعى بايلانىستار نىعايا تۇسەدى دەپ ۇمىتتەنەتىنىن جەتكىزدى.
