اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە ەلباسىنىڭ ماقالاسىن قولداۋ جانە تالقىلاۋ ماقساتىندا «رۋحاني جاڭعىرۋ – قازاقستان دامۋىنىڭ نەگىزى» اتتى دوڭگەلەك ۇستەل ءوتتى.
دوڭگەلەك ۇستەلگە ۋنيۆەرسيتەت رەكتورى, پەداگوگيكا عىلىمدارىنىڭ دوكتورى, اكادەميك سەرىك ءپىراليەۆ باستاعان وسى وقۋ ورنىنىڭ باسشىلىعى, قۇرىلىمدىق ءبولىمشەلەر باسشىلارى, پروفەسسور-وقىتۋشىلار قۇرامى, ستۋدەنتتەر, ماگيسترانتتار جانە دوكتورانتتار قاتىستى.
شارانى ۋنيۆەرسيتەت باسشىسى سەرىك جايلاۋ ۇلى اشىپ, ەلباسى ماقالاسىندا كوزدەلگەن باسىم باعىتتاردى قىسقاشا ءتۇسىندىرىپ ءوتتى. رەكتور ءوز سوزىندە اتالمىش باعدارلامالىق قۇجاتتىڭ وزەكتىلىگى مەن ماڭىزدىلىعىنا توقتالىپ, قازاقستاننىڭ جەتكەن جەتىستىكتەرىن ەسەلەي ءتۇسۋ مەن العا قويعان يگى ماقساتتارىمىزعا قول جەتكىزۋدىڭ كىلتى بولىپ تابىلاتىنىن باسا ايتتى.
باعدارلامالىق قۇجاتتا الدىعا قويىلعان مىندەتتەردى سارالاپ, پىكىر بىلدىرگەن تاربيە ءىسى جونىندەگى پرورەكتور, ساياسي عىلىمداردىڭ كانديداتى, پروفەسسور جاناتبەك ءىشپەكباەۆ ەلباسى تاراپىنان قويىلعان مىندەتتەر ەلىمىزدى تەحنولوگيالىق دامۋدىڭ جاڭا دەڭگەيىنە شىعاراتىنىن ايتا كەلە, وندا كوزدەلگەن يگى باستامالاردى كەزەڭ-كەزەڭگە ءبولىپ, ەل دامۋى مەن وركەندەۋى ءۇشىن بىرتۇتاستىقتى سەزىنىپ, تاريحي مۇرالارىمىزدى, قازاقستان تاۋەلسىزدىگىنىڭ بەرىكتىگىن ساقتاۋعا باعىتتايتىن بىردەن-ءبىر جول ەكەنىن اتاپ كورسەتتى.
دوڭگەلەك ۇستەلدە ءسوز العان فيلولوگيا عىلىمدارىنىڭ دوكتورى, پروفەسسور بالتاباي ابدىعازي ۇلى ن.ءا. نازارباەۆتىڭ «2025 جىلدان باستاپ لاتىن الىپبيىنە كوشۋگە كىرىسۋىمىز كەرەك» دەگەن ويىن قۇپتاپ, ەلىمىز لاتىن گرافيكاسىنا كوشسە تۋىستاس تۇركى تىلدەس ۇلتتاردىڭ ءتىلىن مەڭگەرۋ وڭاي بولاتىنىن ايتتى. سونداي-اق, «100 جاڭا ەسىم» جانە «الەمنىڭ ۇلگىلى 100 وقۋلىعى» جوبالارىن قازاقستان ءبىلىمى مەن مادەنيەتىن دامىتۋدىڭ بىردەن-ءبىر جولى دەپ ءتۇسىندىردى.
ميرا بايبەك,
«ەگەمەن قازاقستان»
