ءدىن ىستەرى جانە ازاماتتىق قوعام مينيسترلىگى مەن قازاقستان جاستارىنىڭ كونگرەسى ءبىرلەسىپ وتكىزگەن شاراعا ۆيتسە-مينيستر ابزال نۇكەنوۆ, پارلامەنت ءماجىلىسىنىڭ دەپۋتاتتارى باقتيار ءماكەن مەن گەننادي شيپوۆسكيح, رەسپۋبليكالىق جاستار ۇيىمدارىنىڭ كوشباسشىلارى, ەلوردالىق ستۋدەنتتەر قاتىستى.
ءدىن ىستەرى جانە ازاماتتىق قوعام ءمينيسترىنىڭ ورىنباسارى ابزال نۇكەنوۆ ايتىپ ءوتكەندەي, بيىلعى جىلدىڭ العاشقى توقسانى ەلىمىز ءۇشىن اسا ماڭىزدى وقيعالارعا تولى بولدى. جىل باسىندا ەلباسىنىڭ كونستيتۋتسيالىق رەفورمالارعا قاتىستى ۇندەۋى جاريالاندى. مەملەكەتتىك بيلىك تارماقتارىنىڭ وكىلەتتىكتەرى قايتا قارالىپ, ءبىرقاتار جاۋاپكەرشىلىكتەر مەن وكىلەتتىكتەر ۇكىمەت پەن پارلامەنتكە جۇكتەلدى. جەرگىلىكتى باسقارۋشى ورگانداردىڭ ءرولى كۇشەيدى. ەلىمىز ءۇشىنشى ەكونوميكالىق جاڭعىرۋ جولىنا قادام باستى. ەلىمىزدىڭ الداعى ۋاقىتتا الەمنىڭ دامىعان وتىز ەلىنىڭ قاتارىنا قوسىلۋى ءۇشىن رۋحى باي, مادەنيەتى جوعارى, ءبىلىمى كەمەل ازاماتتىق قوعام قالىپتاستىرۋ كەرەك.
– 12 ءساۋىر كۇنى «ەگەمەن قازاقستان» گازەتىندە ەلباسىمىزدىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى جارىققا شىقتى. بۇل ءبىزدىڭ ەلىمىز ءۇشىن ۇلكەن ماڭىزعا يە, قۇندىلىعى تەڭدەسسىز ءدۇنيە دەپ بىلەمىز. پرەزيدەنت ماقالاسىنىڭ قوعام ءۇشىن قانشالىقتى ماڭىزدى ەكەنىن جەتە ءتۇسىنۋ ءۇشىن, ونىڭ استارىنا تەرەڭىرەك ءۇڭىلۋ ءۇشىن بۇگىنگى كەزدەسۋگە جاستاردىڭ وزدەرى مۇرىندىق بولعانىنا قۋانىشتىمىن, – دەدى ابزال نۇكەنوۆ.
جيىن بارىسىندا ءماجىلىس دەپۋتاتتارى, «قازاقستان جاستارىنىڭ كونگرەسى» زاڭدى تۇلعالار ءبىرلەستىگىنىڭ جەتەكشىلەرى ءسوز ءسوي-
لەپ, ەلباسى ماقالاسىنىڭ جاستارعا قاتىستى بولىمدەرى تۋرالى ءوز ويلارىن ورتاعا سالدى.
ءدىن ىستەرى جانە ازاماتتىق قوعام مينيسترلىگىنىڭ وكىلدەرى جاستارمەن جۇمىس ىستەيتىن ورگان رەتىندە الداعى ۋاقىتتا جاستار ۇيىمىنىڭ قاناتىن كەڭگە جايۋىنا, ەل يگىلىگى ءۇشىن قولعا العان جۇمىستارىنا قولداۋ كورسەتۋگە, جاڭا جوبالاردىڭ جولىن اشۋعا ءاردايىم ءازىر ەكەندىكتەرىن ايتتى.
ارنۇر اسقار,
«ەگەمەن قازاقستان»
