تاعىلىمى تولايىم كەزدەسۋ

كەشە قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆ استاناعا جۇمىس بابىمەن  كەلگەن قىرعىز رەسپۋبليكاسى جوگوركۋ كەنەشىنىڭ توراعاسى احماتبەك كەلديبەكوۆپەن كەزدەستى. قىرعىز پارلامەنتىنىڭ باس­شى­سى باستاعان رەسمي دەلەگاتسيا تۇركىتىلدەس ەلدەر پارلامەنتتىك اسسامبلەياسىنىڭ جۇمىسىنا  دا قاتىسادى. ال دەلەگاتسيا مۇشە­لە­رى­مەن كەزدەسۋ ءماجىلىس عيما­را­تىندا بولىپ ءوتتى. وعان سونداي-اق ەكى ەل ەلشىلەرى دە قاتىسىپ وتىردى. ءماجىلىس توراعاسى ءوز سوزىندە ارىپتەسىنە جوگوركۋ كەنەش توراعالىعىنا سايلانۋىمەن قۇتتىقتاۋىن جەتكىزدى. «قازاق پەن قىرعىز اراسىنداعى قارىم-قا­تى­ناس ەجەلدەن قالىپتاسقان, تامى­رىن تەرەڭنەن تارتقان قا­رىم-قا­تى­ناس. مۇندا باۋىرلىق تا, دوس­تىق تا جانە كورشىلىك تاتۋ­لىق تا بار. ەكى ەلدىڭ, حالىقتىڭ ارا­سىن­داعى قارىم-قاتىناس ويدا­عىداي دامىپ كەلە جاتىر دەپ اي­تۋعا بو­لادى», دەدى ورال باي­عو­نىس ۇلى. قازاقستان كورشىلەس ەلدەگى ساياسي تۇراقتىلىقتى قام­تا­ماسىز ەتەتىن, ەكونوميكالىق دامۋ مەن الەۋمەتتىك وركەندەۋدى كوزدەيتىن قىرعىزستان باسشى­لى­عىن قول­داي­دى. جىل سوڭىندا قىر­عىز­ستان تاعى ءبىر ساياسي ناۋ­قان­دى, ياعني پرەزيدەنتتىك سايلاۋ­دى كۇ­تۋ­دە. وسى رەتتە سپيكەر كورشى ەلدىڭ «ءبىر جاعادان باس, ءبىر جەڭنەن قول شىعارىپ», حالىق مۇددەسى بيىگىنەن كورىنەرىنە سەنىم ءبىلدىردى. الماتى وبلىسىنداعى قىزىل­اعاش وقيعاسى سالدارىن جويۋعا قىرعىزستاندىقتار كومەك كورسەت­كەن-ءدى. ال قازاقستان كورشى ەلدەگى ساياسي داعدارىستان شىعۋعا گۋما­ني­تارلىق كومەك رەتىندە 20 ميلليون دوللار بولگەنى بەلگىلى. مۇن­­داي ءوزارا كومەك پەن سىي­لاس­تىق  ءداستۇرلى دوستىق پەن بابالار رۋحىندا جالعاسىن تاۋىپ جاتىر جانە ول ءارى قاراي داميتىن بو­لادى. سپيكەر ءسوزىنىڭ سوڭىندا قا­زاقستان پارلامەنتىنىڭ جۇمى­سى جايلى, وتكەن سايلاۋ بارىسى تۋ­رالى كەڭىنەن ماعلۇمات بەرە كەتتى. جوگوركۋ كەنەش توراعاسى ءوز كەزەگىندە قىرعىزستانداعى وقي­عا­لاردان كەيىنگى قازاق ەلى مەن ونىڭ باسشىسىنىڭ قولداۋىن قىر­عىزستاندىقتاردىڭ سەزىنگەندىگىن ەرەكشە اتاپ ءوتتى. بىلتىر استانادا وتكەن ەقىۇ سامميتىندە وسى ماسەلە وتكىر كوتەرىل­گەن تاقىرىپتاردىڭ بىرىنە اينا­لىپ, جامان وقيعادان جاقسى تا­عى­لىمدار الىندى. استاناعا ءۇل­كەن دەلەگاتسيانىڭ كەلۋى دە سون­دىقتان. مارتەبەلى مەيمان ءوز ەلى­نىڭ قيىنشىلىقتاردى  باسىنان وتكەرىپ وتىرعاندىعىنا دا ەرەكشە نازار اۋدارتتى. جاقىندا قا­بىلدانعان رەسپۋبليكالىق بيۋد­جەت­تىڭ جەتىسپەۋشىلىگى 22 پايىز بولعان. توراعا قىرعىز حالقىنىڭ قيىنشىلىقتاردان مويىماي وتەرىن دە ەرەكشە اتاپ ءوتتى. قىرعىز دەلەگاتسياسىنىڭ باس­شى­سى ءسوز ورايى كەلگەندە  شەكارا وتكىزۋ بەكەتتەرىندەگى قىرعىز­دىق كولىكتەر مەن ازاماتتاردىڭ ءبىراز ۋاقىتقا دەيىن بوگەلىپ قا­لا­رىن دا جەتكىزە كەتتى. وسى ءما­سە­لەنى شەشۋگە قاتىستى التى كەلىسىمدى راتيفيكاتسيالاۋ جايىن ءسوز ەتتى. سونداي-اق ا.كەلديبەكوۆ ىس­تىق­كولدە دەمالۋشىلاردىڭ 60-70 پايىزىن قازاقستاندىقتار قۇرايتىندىعىن تىلگە تيەك ەتە كەلىپ, وسى وڭىرگە كەلىپ كەتۋگە شاقىردى. كەزدەسۋ سوڭىنان تاراپتار قا­زاقستان رەسپۋبليكاسى ءماجىلىسى مەن قىرعىز رەسپۋبليكاسى جوگوركۋ كەنەشى اراسىنداعى ىنتى­ماقتاستىق تۋرالى مەموراندۋمعا قول قويدى. جالپى, بۇل ساپار ەكى ەل اراسىنداعى پارلامەنتارالىق بايلانىستاردى نىعايتىپ قانا قويماي, ساۋدا-ەكونوميكالىق جانە وزگە دە سالالار بويىنشا قارىم-قاتىناستاردىڭ جان­دانۋىنا ءوزىن­دىك يگى ىقپالىن تيگىزۋى ءتيىس. اسقار تۇراپباي ۇلى.