ىلعالدى كوكتەمنەن ءۇمىت مول

وڭىردە ءۇش-ءتورت جىل قا­تا­رى­نان بولعان قۋاڭشىلىق ەگىن­شى­لىكتىڭ تاۋەكەل ايماعىنا ور­نالاسقان وبلىس ديقاندارىنىڭ تاۋىن قايتارىپ تاستاعانى راس. ەرتەڭگى كۇننەن ءۇمىتىن ۇزبەيتىن ديقان قاۋىمى ءار جىل سايىن تاۋەكەلگە بەل بۋىپ, بەلگىلى ءبىر مولشەردە ەگىن سالىپ وتىردى. وكىنىشكە قاراي, الا جازداي جاڭ­بىر تامباي, القاپتار كۇزگە قاراي امالسىزدان ەسەپتەن شى­عارىلدى. ەندى قۇر تاۋەكەلگە ۇم­تىلا بەرۋگە بولمايتىن­دى­عىن, مۇمكىندىكتى ناقتى ەسكەرىپ قانا قيمىل جاساۋ قاجەتتىگىن ەس­كەرگەن اقتوبەلىك ديقاندار بيىل ەگىنشىلىكتى جاڭاشا ءجۇر­گىزۋدى قولعا الىپ وتىر. ءبىر قۋا­نارلىعى, بيىل بۇرىنعى جىل­دارعا قاراعاندا ىلعال مول. بەس­قوناق تا جاۋىن-شاشىندى بولدى. مۇنى مولشىلىقتىڭ باستاۋى دەپ تۇسىنگەن اقتوبەلىك ديقاندار كوكتەمگى ەگىسكە تيا­ناقتى ازىرلىكپەن كەلىپ وتىر. – ءبىز الدىن الا اۋىل شا­رۋا­شى­لىعى قۇرىلىمدارىنىڭ تاپ­سىرىستارىن جيناقتاعانى­مىز­دا بيىلعى جىلى وبلىس بويىنشا 731 مىڭ گا القاپقا ەگىس سالا­مىز دەپ جوسپارلاعانبىز. الاي­دا, وعان وزگەرىستەر ەنگىزۋگە تۋرا كەلدى. بۇل تۇقىم ءمول­شەرىنە بايلانىستى بولىپ وتىر. وتكەن جىلعى قۇرعاقشى­لىق سالدارىنان ءبىز قاجەتتى تۇ­قىمدى جيناي المادىق. وسى­نىڭ ءوزى بيىلعى ەگىس القاپ­تا­رىن قىسقارتۋدىڭ بىردەن-ءبىر سەبەپشىسى بولىپ وتىر, – دەيدى وبلىستىق اۋىل شارۋاشىلىعى باسقارماسى ەگىنشىلىك ءبولىمىنىڭ باستىعى جولتۋما راحمەتوۆ. ونىڭ ايتۋىنشا, وبلىستا 24 مىڭ توننا عانا تۇقىمدىق اس­تىق بار. مۇنىڭ سىرتىندا رەس­پۋبليكالىق رەسۋرستان تاعى دا 30 مىڭ توننا جەتكىزىلمەكشى. بۇل 505 مىڭ گەكتارعا ەگىس سالۋعا مۇمكىندىك بەرەدى. ۇكى­مەت­تىك جەلى بويىنشا ۇسىنىلاتىن تۇقىم قورلارى ءبىرىنشى كەزەكتە ىلعال ساقتايتىن قازىرگى زامانعى تەحنولوگيا بويىنشا جۇمىس ىستەيتىن ءىرى شارۋاشىلىقتارعا ءبو­لى­نەتىن بولادى. باستى شارت ناق­تى قايتارىم بولۋى كەرەك. ودان كەيىنگى ەسكەرىلەتىن نەگىزگى ولشەم ەگىس سالاتىن جەردىڭ بونيتەتى 30 باللدان تومەن بولماۋى ءتيىس. وسىنداي تالاپقا بايلانىستى مۇ­عالجار جانە تەمىر اۋداندارى اتالعان جەلى بويىنشا تۇقىم الا المايتىنى بەلگىلى بولدى. بۇل ارادا ايتا كەتەتىن ءبىر ءجايت, ەگەر شارۋا قوجالىقتارى ءوز­دەرى تۇقىم تاۋىپ, ەگىس سالىپ جاتسا, وعان ەشكىم كەدەرگى كەلتىرمەيدى. – ءبىزدىڭ وبلىسىمىز ەگىنشى­لىك­تىڭ تاۋەكەلدى ايماعىنا جاتا­دى. وسىعان بايلانىستى بىزگە مال ازىعىندىق داقىلداردى كوبىرەك ەگۋ ۇسىنىلۋدا. بىلتىر 12 مىڭ گەكتار القاپقا مال ازىقتىق دا­قىل­دار ءوسىرىلدى. بيىل ونى تاعى دا ءتورت مىڭ گەكتارعا كوبەيتۋدى جوسپارلاپ وتىرمىز. وسىلايشا جىل سايىن مال ازىعىندىق دا­قىل­دار القابىن كەڭەيتە بەرمەكپىز, – دەيدى جولتۋما راحمەتوۆ. كوكتەمگى ەگىسكە قاتىساتىن تراكتورلاردىڭ 96 پايىزى قازىر­دىڭ وزىندە دايىندىق ساپىنا قويىلعان. سونىڭ ىشىندە «كەيس», «دجون-دير» جانە «ۆەست-بليۋمەر» سياقتى شەتەلدىك ونىمدىلىگى جوعارى ەگىس كەشەندەرى تۇگەلدەي دايىن. سونداي-اق, وتكەن جىلى بيىلعى ەگىسكە 300 مىڭ گەكتار جەر دايىندالعان. سونىڭ 146 مىڭ گەكتارى پارلى القاپ. – نەگىزىندە ءبىزدىڭ وبلىسى­مىز­دا ايتەكە بي اۋدانى اس­تىقتى ءوڭىر بولىپ سانالاتىنى بەلگىلى. بيىلعى جىلى مۇندا 150 مىڭ گا القاپقا ەگىس سالىن­باقشى. ول جاقتا دا تۇقىم تاپ­شىلىعى سەزىلۋدە. ناقتى ايت­ساق, 6100 توننا عانا تۇقىم ساق­تاۋلى تۇر. جەرگىلىكتى شارۋا­شى­لىق باسشىلارىنىڭ قوستا­ناي وبلىسىنداعى ارىپتەستەرى­مەن ءوزارا كەلىسىمى بار. ءبىراز تۇقىم سول جاقتان الىنباقشى. ءبىر اتاپ وتەرلىگى, بۇل وڭىردە قىستا 40 مىڭ گەكتارعا قار توق­تاتىلدى, – دەيدى ول. سوڭعى بەس جىل بويىنا مەملەكەت جانار-جاعار مايدان اۋىل­­دىقتارعا جەڭىلدىكتەر كورسەتىپ كەلەدى. بيىل وبلىسقا 26 مىڭ توننا ءونىم رىنوكتاعىدان 11 پايىز تومەن باعامەن جەتكىزىلمەكشى. ونىڭ 10 مىڭ تونناسى كوك­تەمگى دالا جۇمىستارىنا جۇم­سالادى. شارۋالار ءۇشىن جانار مايدىڭ ءليترى 68-70 تەڭگە شا­ماسىندا بولماق. سوڭعى جىلدارى قۋاڭشى­لىق­تان زارەزاپ بولىپ قالعان ەگىنشىلەر ەگىس القابى دەگدىسىمەن تەحنيكالارىن القاپقا شى­عارۋعا ءازىر وتىر. اۋا رايىنىڭ قاس-قاباعىنا قاراپ قيمىلداي­تىن ديقان قاۋىمى بەسقوناق­تىڭ ىرىمىنان ءۇمىتتى. ىلگەرى كۇنگە ءۇمىت ارتاتىن ديقاندار تابيعات مىرزالىعىنان دامەسىن ۇزبەيدى. بۇعان بيىلعى كوك­تەمنىڭ جاۋىن-شاشىندى بولۋى دا نەگىز قالايتىنداي. ساتىبالدى ءساۋىرباي. اقتوبە وبلىسى.