«قىتاي مەن قازاقستاننىڭ مادەنيەت سالاسىنداعى قارىم-قاتىناسىن ءان اۋەنىمەن جاڭا بەلەسكە كوتەردى. ول قىتايدىڭ ونەر ساحناسىندا اسقاقتاتا ءان شىرقاپ, از ۋاقىتتىڭ ىشىندە-اق سانسىز جانكۇيەرلەردىڭ قولداۋىنا يە بولدى. ول ەكى ەل اراسىنداعى مادەنيەت اۋىس-ءتۇيىسى مەن حالىق تىلەگىنىڭ توعىسۋىنا كوپىر بولۋ ءۇشىن بارىنشا تالپىندى.
«ءبىر بەلدەۋ, ءبىر جول» حالىقارالىق سەلبەستىك فورۋمىنا ءبىر اي ۋاقىت قالدى, وسى ساتكە وراي مادەنيەتتىڭ جارقىن جارشىسى بولعان جاس جىگىتپەن جاقىن تانىسايىق», دەپ باستايدى ماقالا اۆتورلارى رىن شانشان مەن كاڭ يان. تومەندە ماقالا مازمۇنىنان ۇزىندىلەر ۇسىنامىز.
ديماش اسقاق انىمەن اراعا كوپىر سالدى
كوك كوستيۋم كيگەن جىگىت باياۋ باسىپ, ب ۇلىڭعىر تارتقان ساحنانىڭ ورتاسىنا كەلىپ, كۇيزەلىستى كۇڭىرەنىسپەن باستالاتىن «Adagio» ءانىن ناشىنا كەلتىرە شىرقاي جونەلدى. كۇيساندىقتان قۇيقىلجىعان مۋزىكا اۋەنى اققۋدىڭ مامىعىنداي مايدا داۋىسپەن جارىسا كوتەرىلدى.
حۋنان تەلەارناسىنىڭ 6-ءشى كەزەكتى ءوتىپ وتىرعان «مەن ءانشىمىن» اتتى باعدارلاماسىندا 500 كورەرمەنىنىڭ تاڭداۋىمەن, بىرىنشىلىك سول ساحناداعى ەڭ جاس ءانشى ديماشقا بۇيىردى.
ديماش 1994 جىلى قىتايمەن كورشىلەس جاتقان قازاق ەلىندە دۇنيە ەسىگىن اشقان. قازاقتىڭ اتا سالتى بويىنشا, اتاسى مەن اجەسىنىڭ قولىندا وسكەن ەكەن. اتاسى دومبىراشى, اجەسى ءانشى, اتا-اناسى دا ايگىلى مۋزىكانتتار ەدى. وسىنداي وتباسىندا ەرجەتكەن ديماش تا كىشكەنتايىنان ءان-كۇيگە اۋەس بولدى.
ديماش 2010 جىلى 16 جاسىندا حالىقارالىق ءان باسەكەسىندە باس جۇلدەنى قانجىعاسىنا بايلادى, 2015 جىلى قازاندا تۇركيانىڭ ىستانبۇل قالاسىندا وتكىزىلگەن ازيا كولەمىندەگى حالىقارالىق مۋزىكا فەستيۆالىنا قازاقستان اتىنان قاتىناستى, قازاق ەلىندە جانكۇيەرلەر ديماشتى ەلدىڭ ماقتانىشى دەپ قارايدى. ول ءتۇرلى ءان ستيلدەرىنە جاتتىعىپ, كەڭ تارالعان اندەردى, ەۋروپاشا اۋەندەردى جانە ءتۇرلى قۇلپىرما ءۇندى اندەردى ايتۋ تاسىلدەرىن مەڭگەردى. اناسى: ديماشتىڭ وزدىگىنەن ۇيرەنۋ قابىلەتى جوعارى, داۋىس اۋماعىن كەڭەيتۋگە دە ءوزى جاتتىققان, ءتورت وكتاۆا اراسىندا ەمىن-ەركىن شىرقاي الادى, - دەيدى. ءتۇرلى تىلدەردەگى وپەرالاردى شىرقاۋ ءۇشىن ديماش نەمىس, ۋكراين, تۇرىك تىلدەرىن ۇيرەنگەن. قازىر ول قىتاي ءتىلىن ۇيرەنۋ ءۇشىن قولىنان قىتايشا سوزدىگىن تاستامايدى.
مۋزىكادا مەملەكەت پەن ءتىل شەكاراسى بولمايدى. ديماشتىڭ قىتايدا ءان شىرقاۋى ونىڭ قىتايلىق كورەرمەندەرمەن تانىستىعىنىڭ باستاماسى, ءارى قازاقستاندى قىتايعا, قىتايدى قازاقستانعا تانىستىرۋعا كوپىر بولدى دەۋگە بولادى.
جاقىندا قازاقستانداعى "حابار" تەلەارناسى «مەن ءانشىمىن» باعدارلاماسىن كورسەتەتىن بولدى. جارتىلاي شەشۋشى جارىس كەزدەرىندە دە قازاقستاننىڭ قىتايداعى ەلشىسى ستۋدياعا كەلىپ, ديماشقا قولداۋ كورسەتتى. ديماش قازاقستاندىقتاردىڭ ماقتانىشى. ولار ديماش ارقىلى قىتايلىق انشىلەرمەن, قىتاي مادەنيەتىمەن ىشكەرىلەي تانىستى. قازاقستاندىق الەۋمەتتىك جەلى قولدانۋشىلار: قىتايدىڭ ەستراداسى تارتىمدى ەكەن, ديماش قىتايدىڭ كوركەمونەرىمەن تانىسۋىمىزعا دانەكەر بولدى, - دەيدى.
قىتاي مادەنيەتىن تانىستىرۋ ەلشىسى رەتىندە, ديماش چىڭدۋعا بارىپ, مەملەكەتتىك برەندىمىز مىسىق ايۋدى كوردى, چىڭدۋداعى ءداستۇرلى مادەنيەتىمىزدى ايعاقتايتىن ارنايى دايىندالعان كوشەلەردى ارالاپ, چىڭدۋداعى مادەنيەتتىڭ ءمان-ماڭىزىمەن تانىستى. ديماش چىڭدۋداعى ساپارىن ۇنەمى ەسكە الادى, وتە-موتە, چىڭدۋداعى مۋزىكالىق ورتا وعان ەرەكشە اسەر قالدىرىپتى. قارت ونەرپازداردىڭ, بالالاردىڭ ونەرى, بەتقالقا قۇبىلتۋ ونەرى سىندى قىتايدىڭ ءداستۇرلى كوركەمونەرى مەن مۋزىكا ونەرى ونىڭ ەسىنەن بەرىك ورىن الىپتى.
ديماش اسەم اۋەنى مەن جاي ءىس-ارەكەتتەرى ارقىلى ەكى ەل اراسىنداعى مادەنيەت اۋىس-ءتۇيىسىن جانە ەكى ەل حالقىنىڭ تىلەگىن توعىستىردى. جارىس بارىسىندا ول قازاقستان مەن قىتايدىڭ مۋزىكاسىن بىرنەشە رەت توعىستىرا ورىنداپ سىناپ كوردى, ناتيجەسىنىڭ ءساتتى بولعانىن كوردىك. الداعى جەردە ول قىتايدا ءجيى ونەر كورسەتەدى, قىتايلىق انشىلەردەن ۇيرەنگەنى مەن ءوزىنىڭ قىتايدان كورگەن-بىلگەندەرىن قازاقستان حالقىنا جەتكىزەدى. قازاق ەلىنەن كەلگەن جاس ءانشى الداعى ساپارىندا ءوزىنىڭ ارمانىنا تالماي قانات قاعىپ, ءان اۋەنىن اسقاقتاتا بەرەدى دەپ سەنەمىز.
دايىنداعان ۇلاربەك نۇرعالىم ۇلى
«ەگەمەن قازاقستان»
