ۇلتتىق قۇرىلىس سالاسى اسسوتسياتسياسىنىڭ پرەزيدەنتى مۇحيت ازەرباەۆتىڭ ايتۋىنشا, جاڭادان بوي كوتەرەتىن 14-ءشى ىقشام اۋدانعا 49 كوپقاباتتى ءۇي ورنالاسادى. ونىڭ ىشىندە بەس قاباتتى 27, توعىز قاباتتى 16, ون ەكى قاباتتى 6 ءۇي سالىنادى. جالپى تۇرعىندارعا بەرىلەتىن 5 460 پاتەرگە 16 000 ادام قونىستانادى دەپ جوسپارلانۋدا. سونداي-اق بۇل اۋماقتا تۇرعىن ۇيلەردەن بولەك, الەۋمەتتىك نىساندار دا كوپتەپ سالىنادى. مىسالى, 250 ورىندىق 3 بالاباقشانىڭ, 2 ورتا مەكتەپتىڭ, بالالاردى بەيىمدەۋ ورتالىعىنىڭ قۇرىلىسى جۇرگىزىلىپ, اۋىسىمىنا شامامەن 500 ادام قابىلدايتىن ەمحانا مەن ونكولوگيالىق ديسپانسەر, دياگنوستيكالىق ورتالىق بوي كوتەرەتىن بولادى. سونداي-اق, تارازدىقتاردىڭ كوپتەن كۇتكەن نەكە ءۇيى دە وسى ىقشام اۋداندا بوي كوتەرەدى. ودان بولەك, مۇندا مادەني-رۋحاني نىساندار دا سالىنىپ, حالىققا قىزمەت كورسەتەدى.
«بۇگىنگى تانىستىرىلىپ وتىرعان 14-ءشى ىقشام اۋداننىڭ قۇرىلىس جوباسى تولىقتاي ىسكە اسسا, كونە شاھاردىڭ ودان ءارى قۇلپىرا تۇسەتىنى انىق. دەگەنمەن, جوباداعى دەمالىس ورىندارىنان سۋبۇرقاقتاردى بايقاماي تۇرمىن. سونداي-اق, ىقشاماۋداندا سالىناتىن ساۋدا كەشەندەرى ۇلكەن جولدىڭ بويىندا ورنالاسىپتى. بۇل ءوز كەزەگىندە تۇرعىندارعا قولايسىزدىق تۋعىزۋى مۇمكىن. وسىنى قايتا قاراپ, كولىك از جۇرەتىن ىقشام اۋدان بولىگىنە ورنالاستىرۋ قاجەت دەپ ويلايمىن», – دەدى كارىم كوكىرەكباەۆ.
ءوز سوزىندە مۇحيت ازەرباەۆ ايتىلعان ماسەلەلەردىڭ شەشىمىن تاباتىنىن ايتىپ, الداعى كۇندەرى قۇرىلىس جوباسىن جەتىلدىرۋ ءۇشىن بىرلەسكەن جۇمىسشى كەڭەسىن قۇرۋ باستاماسىن ۇسىندى.
حاميت ەسامان,
«ەگەمەن قازاقستان»
جامبىل وبلىسى
