كورمەدەگى شىعارمالاردىڭ اۆتورلارى – قوستاناي مەملەكەتتىك پەداگوگيكا ينستيتۋتىنىڭ وتكەن جىلعى تۇلەكتەرى ەلەنا پولكوۆنيكوۆا, اناستاسيا مەرزلياك, كسەنيا فەدياي جانە اناستاسيا ياگۋدينا. ولار كورمەگە وزدەرىنىڭ قىرىق شاقتى جۇمىسىن ۇسىنىپتى.
«مەنىڭ الدىمنان ءتۇرلى ستۋدەنتتەر وتەدى. ولاردىڭ اراسىندا وسى ونەردى جانىمەن تۇسىنەتىن تالانتتى وقۋشىلار دا بولدى. ال كوپشىلىگى سۋرەت ونەرىنىڭ الىپپەسىن ينستيتۋت قابىرعاسىندا باستايدى. مەنىڭ ستۋدەنتتەرىمنىڭ كوپشىلىگى قازىر ءبىلىم بەرۋ سالاسىندا قىزمەت ەتەدى, وزىمە ارىپتەس بولعان. قازىر دە ولاردىڭ ءىزىن جالعاستىرىپ كەلە جاتقان سۋرەتشى ستۋدەنتتەرىم بار, مەنى وسىنداي بايلانىستىڭ ۇزىلمەگەنى قۋانتادى», – دەدى كوركەمونەر كافەدراسىنىڭ وقىتۋشىسى, سۋرەتشى ءانۋار ساپيەۆ.
ول كەشەگى شاكىرتىنىڭ ءبىرى اناستاسيا ياگۋدينادان كوپ ءۇمىت كۇتەدى.
«قازىر مايلى بوياۋمەن سالاتىن كەسكىندەمەگە كوپ كوڭىل بولۋدەمىن. مۇنىمەن قوسا گرافيكالىق كەسكىندەمەمەن, كومپيۋتەرمەن سۋرەت سالۋمەن دە اينالىسامىن. زامان تالابىنا ساي جاڭالىقتاردى دا قابىلداۋ كەرەك. بولاشاقتا ءوزىمنىڭ ونەر ستۋديامدى اشقىم كەلەدى», – دەيدى اناستاسيا.
جاس سۋرەتشىلەردىڭ كورمەسى شىنايىلىعىمەن جۇرتتى باۋراپ الدى.
ءنازيرا جارىمبەتوۆا
«ەگەمەن قازاقستان»
قوستاناي
