الاش پارتياسى مەن الاشوردا وكىمەتىنىڭ قۇرىلعانىنا بيىل 100 جىل تولىپ وتىر. وسى داتالى وقيعانى ەسكە الۋ ماقساتىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «كىتاپ تاعدىرى – قوعام تاعدىرى» اتتى حالىقارالىق عىلىمي-ءتاجىريبەلىك كونفەرەنتسيا ۇيىمداستىرىلىپ, اتالمىش شارا اياسىندا الاشتانۋشى عالىم, پروفەسسور تۇرسىن جۇرتبايدىڭ قوس كىتابى – «بول مويا, گوردوست مويا – الاش» جانە «اكيناك» اتتى شىعارمالارىنىڭ تۇساۋى كەسىلدى.
تۋىندى اۆتورى تۇرسىن جۇرتباي ناعىز الاششىل ازامات. بۇعان دەيىن وسى تاقىرىپتى قاۋزاعان «ۇرانىم – الاش» اتتى كىتاپتار سەرياسى قازاقشا جارىق كورگەن بولاتىن. جوعارىداعى ورىس تىلىندە شىققان 1100 بەتتىك كولەمدى تۋىندى «ۇرانىم – الاشتىڭ» تولىقتىرىلعان اۋدارماسى. ەكىنشى كىتاپ «اكيناك» اۆتوردىڭ تاعى ءبىر قۇندى ەڭبەگى – ەكى تومدىق «دۋلىعا» كىتابىنىڭ جەتىلدىرىلگەن ورىسشا نۇسقاسى. كىتاپتا گەرودوتتىڭ شىعارماسى ارقىلى تانىس تارعىتايدان باستاپ, كوك تۇرىكتەر ءداۋىرىنىڭ بيلەۋشىلەرى بىلگە قاعان, كۇلتەگىن قاتارلى 77 تاريحي ادامنىڭ ەسىم-تۇلعاسى باياندالادى.
تۇساۋكەسەر ۇستىندە پىكىر ءبىلدىرگەن تانىمال تاريحشى بولات كومەكوۆتىڭ پايىمىنشا, تۇرسىن قۇداكەلدى ۇلىنىڭ «اكيناگى» – كۇللى ەۋرازيا كەڭىستىگىن قامتيتىن حرونولوگيالىق كىتاپ ءھام ۇلتتىڭ تاريحي ساناسىن قالىپتاستىراتىن دۇنيە. ال ەكىنشى تۋىندى – شىن مانىندە الاشتىڭ قانى مەن كوزىنىڭ جاسى. بۇل كىتاپتىڭ جازىلۋىنا ءبىردەن-ءبىر سەبەپشى ادام – ولجاس ءسۇلەيمەنوۆ. ولجەكەڭ 1987 جىلى 13 قاڭتار كۇنى تۇرسىندى شاقىرىپ الىپ, مەملەكەتتىك قاۋىپسىزدىك كوميتەتىنىڭ ارحيۆىنە كىرىپ, قۇجاتتارمەن تانىسۋعا رۇقسات الىپ بەرگەن. ارحيۆتە 2 جىل تاپجىلماي وتىرعان ت.جۇرتبايدىڭ ەڭبەگى كىتاپ بولىپ 30 جىلدان كەيىن تولىق كۇيىندە جارىق كورىپ وتىر.
جيىنعا قۇرمەتتى قوناق رەتىندە قاتىسقان ولجاس ومار ۇلى: «تۇرسىن جابۋلى قازاننىڭ بەتىن اشۋ ءۇشىن 30 جىل عۇمىرىن ارنادى. اۋىر ەڭبەكتى اسا تاباندىلىقپەن اتقارىپ شىقتى», دەپ اۆتورعا زور العىسىن ءبىلدىردى.
بەكەن قايرات ۇلى,
«ەگەمەن قازاقستان»
