ەلورداداعى ۇلتتىق اكادەميالىق كىتاپحانانىڭ «شاڭىراق» زالىندا اتالمىش روماننىڭ قازاق تىلىنە اۋدارىلعان نۇسقاسى وقىرمانعا تانىستىرىلىپ, تۇساۋى كەسىلدى. وعان گەتە ينستيتۋتىنىڭ وكىلدەرى جانە اۋدارماشىلار قاتىستى.
شارادا ءسوز العان ۇلتتىق اكادەميالىق كىتاپحانانىڭ ديرەكتورى ءۇمىتحان مۇڭالباەۆا: «ءاربىر بالاعا اجە كەرەك. ءوزىم دە بۇگىنگى تاڭدا اجەمىن. اجە بولۋ باقىتىن سەزىنۋ جاقسى كوڭىل-كۇي سىيلايدى. كىتاپحانانىڭ بايلىعى – كىتاپتا. مىناداي جاقسى باستاماعا العىس ايتامىن», دەدى.
ال ءوز كەزەگىندە كىتاپ اۆتورى انيا تۋككەرمان كىتاپ جازۋ دا, جازىلعان شىعارمانى وزگە تىلگە اۋدارۋ دا وڭاي ەمەستىگىنە ءمان بەردى. ونىڭ ويىنشا, كىتاپ ءساتتى اۋدارىلعان. سوعان راحمەت ايتىپ, وقىرماندارىمەن جۇزدەسكەنىنە قۋانىشتى ەكەنىن جەتكىزدى.
رومان كۇن ۇزاق ۇرپاق قامى ءۇشىن جانتالاسىپ, بىراق سولارعا قاراۋعا ۋاقىتى جوق اتا-انالاردىڭ تىرشىلىگىن سيپاتتايدى. باستى كەيىپكەر شتەفيدىڭ اناسىنان باسقا جاقىنى جوق. بىراق سول اناسىنىڭ ءوزى دە تەك دەمالىس كۇندەرى بولماسا, شتەفيدىڭ جانىندا بولا بەرمەيدى. ۇيدە وتىرا بەرۋدەن ءىشى پىسقان كىشكەنتاي بالا وزىنە اجە ىزدەيدى. جانە ءبىرنەشەۋىن تاۋىپ الادى. ولار دا وسىنداي سۇيكىمدى نەمەرەلى بولۋدى قالايتىن جاندار بولىپ شىعادى...
شارا بارىسىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىسى نۇرسۇلۋ شايمەردەنوۆا مەن بەلگىلى جازۋشى, «دارىن» مەملەكەتتىك سىيلىعىنىڭ لاۋرەاتى ايگۇل كەمەلباەۆا ءسوز الىپ, شىعارمانىڭ ەرەكشەلىگىنە, ماڭىزدىلىعىنا, اۋدارماسىنىڭ ساپاسىنا قاتىستى پىكىر ءبىلدىردى.
وقىرمانعا ۇسىنىلىپ وتىرعان «ماعان اجە كەرەك» («Suche Oma») – رومانى انيا تۋككەرماننىڭ كەڭ تاراعان شىعارمالارىنىڭ ءبىرى. اۆتوردىڭ وسى ۋاقىتقا دەيىن 21 كىتابى جارىق كورگەن. كىتاپتارىنىڭ كوپشىلىگى الەمنىڭ 30 تىلىنە اۋدارىلعان. «ماعان اجە كەرەك» اۋدارماشى تاڭسۇلۋ راحىمباەۆانىڭ ءتارجىمالاۋىمەن «اتامۇرا» باسپاسىنان جارىق كوردى.
ايگۇل سەيىلوۆا,
«ەگەمەن قازاقستان»
