مۇنى ايتىپ وتىرعان سەبەبىمىز, بۇل ءۇشىن ەڭ الدىمەن قۇرىلىس جۇمىستارى كەڭىنەن قارقىن الىپ, قانات جايماق. بۇگىنگى زامانعى قالا قۇرىلىسى وتە كۇردەلى, ءارى جان-جاقتى ويلاستىرىلعان ساپالى دا ءساندى ساۋلەتتىك شەشىمدەردى تالاپ ەتەدى. ايتسە دە وبلىستا باس ساۋلەتشى شتاتى مەن قىزمەتى قاراستىرىلماعان. وسىنداي كەرەعارلىق جونىندە وبلىس اكىمدىگى جانىنداعى قالا قۇرىلىسى كەڭەسىنىڭ ماجىلىسىندە اشىق ايتىلدى.
گاپ مىنادا دەۋگە بولادى. بۇعان دەيىنگى جىلداردا ەلىمىزدىڭ بارلىق دەرلىك وبلىستارىندا ساۋلەت جانە قالا قۇرىلىسى قۇرىلىمى دەربەس باسقارما, بولەك ۆەدومستۆو رەتىندە ءىس-قيمىل تانىتىپ كەلدى. الايدا, كەيىنگى ەكى-ءۇش جىلدىڭ بەدەرىندە وڭىرلەردەگى ساۋلەت باسقارمالارى قىسقارتىلدى دا, قۇرىلىس باسقارماسىنىڭ قۇرامىنا قوسىلدى. ارينە, مۇنداي وزگەرىسپەن وڭتايلاندىرۋدىڭ ءوزى بيۋدجەت قاراجاتتارىن ۇنەمدەۋ مەن ءتيىمدى تۇردە جۇمساۋ قاجەتتىلىگىنەن تۋىنداعانى تالاسسىز.
وسى ىڭعايمەن قاراستىرعاندا قازىرگى جاعدايدا وبلىستىڭ باس ساۋلەتشىسى دەپ جۇرگەنىمىز – اقتوبە وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى سەرىك تولەنبەرگەنوۆتىڭ ورىنباسارى بولىپ تابىلادى ەكەن. ءارى مۇنىڭ ءوزى ناقتى مارتەبەسى ايقىندالماعان, باردىڭ دا قاتارىنان كورىنبەيتىن, جوقتىڭ ساناتىنان كەزدەسپەيتىن قىزمەت بولىپ شىقپاي ما؟
ارينە, قوعامدىق ءومىر نە نارسەگە بولسا دا ءوزىنىڭ وزگەرىسىن ەنگىزبەي تۇرا المايدى. بارلىق وڭىردە بىرىزدىلىك بولۋى شارت پا ەكەن؟! دەگەنمەن, اقتوبە سەكىلدى جىل سايىن قۇلاشىن كەڭگە جايىپ, ءوسىپ-وركەندەپ, جەدەل قارقىنمەن دامىپ كەلە جاتقان وڭىردە بۇعان دەيىنگى ساۋلەت جانە قالا قۇرىلىسى سەكىلدى باسقارۋ قۇرىلىمىن قايتادان ورنىقتىرعان ءجون سەكىلدى. قالاي دەسەك تە, اگلومەراتسيالىق ايماقتا قايتا قالپىنا كەلگەن قۇرىلىمنان ءتيىستى قايتارىم بولارى انىق.
تەمىر قۇسايىن,
«ەگەمەن قازاقستان»
اقتوبە وبلىسى
