شارادا ەلشىلەر مەن كاسىپكەرلەرگە ەلباسى تاپسىرماسىنا سايكەس جاسالعان اگروونەركاسىپتىك كەشەندى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىنىڭ نەگىزگى ماقساتى مەن مىندەتتەرى تانىستىرىلدى.
سىرتقى ىستەر ءمينيسترى ق.ءابدىراحمانوۆ ءوز سوزىندە اوك-ءتى دامىتۋداعى ەكسپورتتىق جانە ينۆەستيتسيالىق ماقساتتاردا ەكى ۆەدومستۆونىڭ قىزمەتتەرىن قوسۋ جانە باعىتتاۋ ءۇشىن اشم مەن ءسىم اراسىنداعى قول قويىلعان بىرلەسكەن ءىس-شارالار جوسپارى تۋرالى ايتىپ ءوتتى. سونىمەن قاتار, مينيستر جاڭا جاھاندىق دامۋ كەزەڭىندە قازاقستاندا اگروونەركاسىپتىك سەكتوردىڭ قارقىندى دامۋىنا ەرەكشە نازار اۋدارىلىپ وتىرعانىن جەتكىزدى.
ءوز كەزەگىندە پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆ ديپلوماتتار مەن حالىقارالىق بيزنەس قاۋىمداستىعى وكىلدەرىنە جاڭا مەملەكەتتىك باعدارلامانى ىسكە اسىرۋعا بەلسەندى قاتىسۋعا شاقىرىپ, قازاقستاننىڭ ەۋرازيانى استىقپەن قامتاماسىز ەتۋگە جانە ەكولوگيالىق تازا تاماق وندىرەتىن ءىرى وندىرۋشىلەردىڭ ءبىرى بولۋعا بارلىق مۇمكىندىگى بار ەكەندىگىن اتاپ ءوتتى.
جيىندا ينۆەستيتسيالىق كليماتتى جاقسارتۋ ماقساتىندا اۋىل شارۋاشىلىعى مينيسترلىگى تاراپىنان ترانسۇلتتىق كومپانيالاردىڭ قاتىسۋىمەن قازاقستاننىڭ ەكسپورتتىق تاۋارلارىن الەمدىك نارىققا شىعارۋعا باعىتتالعان جۇمىستارى جۇرگىزىلىپ جاتقانى دا كەڭىنەن ءسوز بولدى.
بۇگىندە ترانسۇلتتىق كومپانيالاردىڭ قاتىسۋىمەن 4 جوبا تاڭداپ الىندى. بۇل جوبالار ەت, ءسۇت ءونىمدەرىن ءوندىرۋ, وڭدەۋ ونەركاسىبى جانە ءوسىمدىك شارۋاشىلىعى (قىزاناق پاستاسىن ءوندىرۋ) سالالارىنا تيەسىلى. ترانسۇلتتىق كومپانيالاردان باسقا, اوك سالاسىندا شەتەلدىك ينۆەستورلاردىڭ قاتىسۋىمەن تاعى 40-قا جۋىق جوبالار بار. ينۆەستورلاردىڭ باسىم بولىگى رەسەي, گەرمانيا, تۇركيا, ۋكراينا, وڭتۇستىك كورەيا, قحر جانە فرانتسيا مەملەكەتتەرىنەن.
2017-2021 جىلدارعا ارنالعان اگروونەركاسىپتىك كەشەندى دامىتۋ باعدارلاماسى بويىنشا وتاندىق تاۋاردىڭ ەكسپورتتىق الەۋەتىن ارتتىرۋ جانە ىشكى نارىقتى تولتىرۋ كوزدەلگەن. ناقتىراق ايتار بولساق, 2021 جىلعا قاراي ەكسپورت كولەمى 0,8-دەن 1,5 ملرد دوللارعا كوبەيمەك.
اسقار مىرزاحمەتوۆ قازاقستانعا شەت مەملەكەتتەرمەن ىسكەرلىك قاتىناستى دامىتۋ جانە نىعايتۋ مۇمكىندىگىن بەرەتىن ستراتەگيالىق قۇجاتتاردىڭ ماڭىزدىلىعىن ايتا كەلىپ, ەلشىلەر قويعان ساۋالدارعا كەڭىنەن جاۋاپ بەردى.
ايتا كەتەيىك, جوعارىدا اتالعان باعدارلاما بويىنشا, ازىق-ت ۇلىك تاۋارلارىنىڭ ەكسپورتىن 2021 جىلعا دەيىن 40 پايىزعا ارتتىرۋ ءۇشىن ءار جىلعا ارنالعان ناقتى كورسەتكىشتەر مىندەتتەلگەن.
باۋىرجان مۇقانوۆ,
«ەگەمەن قازاقستان»
