قاۋىپسىزدىكتىڭ تىڭ تەتىگى

استانادا سىرتقى ىستەر مينيسترلىگىنىڭ رەسمي وكىلى اسقار ابدراحمانوۆ ءداستۇرلى اپتالىق بريفينگىن وتكىزدى. وندا وسى اپتادا بولاتىن ماڭىزدى حالىقارالىق ءىس-شارالار جونىندە جان-جاقتى اقپارات بەرىلدى. ماسەلەن, بۇگىن استانادا ەلىمىزدىڭ سىرتقى ىستەر مينيسترلىگىندە ەۋروپالىق وداقتىڭ قولداۋىمەن «ورتالىق ازياداعى ءولىم جازاسىنا موراتوري جاريالاۋدى تولىق جويۋعا: وتپەلى كەزەڭنىڭ سىنى» اتتى ايماقتىق كونفەرەنتسيا وتەدى. «كونفەرەن­تسيانىڭ ماقساتى – ءولىم جازاسىن جويۋ ۇدەرىسىن جانە وعان ءومىر بويى بوستاندىعىنان ايىرۋ سياقتى بالاما ەنگىزگەن مەملەكەتتەردە پايدا بولعان قيىن­دىقتاردى شەشۋ جولدارىن تالقىلاۋ», – دەيدى رەسمي وكىل. ال ءساۋىردىڭ 28-ءى كۇنى قازاقستاننىڭ ادىلەت جانە سىرتقى ىستەر مينيسترلىكتەرى, قازاقستانداعى بىرىككەن ۇلتتار ۇيىمى دامۋ باعدارلاماسىنىڭ تەح­نيكالىق قولداۋىمەن «قازاقستان رەسپۋبليكاسىندا ازاماتتىق جانە ساياسي قۇقىقتار جونىندەگى حالىق­ارالىق پاكت جانە امبەباپ كەزەڭدىك شولۋ ۇسىنىس­تارى بويىنشا ازاماتتىق جانە ساياسي قۇقىقتاردى جۇزەگە اسىرۋ, قازاقستاننىڭ ازاماتتىق جانە ساياسي قۇقىقتار تۋرالى حالىقارالىق پاكتىنى ورىنداۋى تۋرالى بىرىككەن ۇلتتار ۇيىمىنىڭ ادام قۇقىقتا­رى جونىندەگى كوميتەتىندە العاشقى بايانداماسىن قورعاۋ» تاقىرىبىندا دوڭگەلەك ۇستەل وتكىزىلمەك. ونىڭ اياسىندا امبەباپ كەزەڭدىك شولۋ مەن ادام قۇقىقتارى سالاسىنداعى ۇلتتىق ءىس-قيمىل جوسپا­رىنىڭ ۇسىنىستارىنا قاتىستى, سونداي-اق ازامات­تىق جانە ساياسي قۇقىقتار جونىندەگى حالىقارالىق پاكت نورمالارىنىڭ ورىندالۋى مەن ونى ءتيىمدى قولدانۋ ماسەلەلەرى تالقى تارازىسىنا تۇسپەك كورىنەدى. بۇل كۇنى ەلوردادا, سونداي-اق, شانحاي ىنتىماق­تاستىق ۇيىمىنا مۇشە مەملەكەتتەردىڭ ىشكى ىستەر جانە قوعامدىق قاۋىپسىزدىك مينيسترلەرىنىڭ ەكىنشى كەزدەسۋىن وتكىزۋ كوزدەلىپ وتىر ەكەن. وعان 6 ەلدىڭ قۇقىق قورعاۋ ورگاندارىنىڭ باسشىلارىمەن قاتار, ۇيىمنىڭ حاتشىلىعى مەن ايماقتىق تەرروريزمگە قارسى قۇرىلىمنىڭ جەتەكشىلەرى, ۇيىمعا باقىلاۋ­شى (يران, موڭعوليا, پاكستان جانە ءۇندىستاننىڭ) جانە سۇحبات بويىنشا ارىپتەس (بەلارۋس پەن شري لانكانىڭ) مەملەكەتتەردىڭ وكىلدەرى قاتىسپاق. اسقار ابدراحمانوۆ بريفينگ بارىسىندا 29 ءساۋىر كۇنى ەلوردا تورىندە ۇيىمداستىرىلاتىن شانحاي ىنتىماقتاستىق ۇيىمىنا مۇشە مەملەكەتتەردىڭ قاۋىپ­سىزدىك كەڭەسى حاتشىلارىنىڭ 6-شى كەزدەسۋىنىڭ ماڭىزىن دا جان-جاقتى ايتتى. اتالعان كەزدەسۋگە قازاقستان مەن رەسەيدىڭ, تاجىكستان مەن وزبەكستان­نىڭ قاۋىپسىزدىك كەڭەسى حاتشىلارى, قىتايدىڭ مەملەكەتتىك كەڭەسىنىڭ مۇشەسى – قوعامدىق قاۋىپسىزدىك ءمينيسترى, قىرعىزستاننىڭ ۆيتسە-پرەمەرى – قورعا­نىس كەڭەسىنىڭ حاتشىسى, سونداي-اق, ۇيىمنىڭ حاتشى­لىعى مەن ايماقتىق تەرروريزمگە قارسى قۇرىلىمىنىڭ باسشىلارى قاتىسىپ, شىۇ-نىڭ وزەكتى دەيتىن تۇستارىنا شولۋ جاساماق ەكەن. ءلايلا ەدىلقىزى.