رەسەي مەن بەلارۋس اراسىنداعى گاز داۋى شەشىلدى
ۆلاديمير پۋتين رەسەي مەن بەلارۋستىڭ مۇناي-گاز سەكتورىنداعى داۋلى ماسەلەدە ورتاق كەلىسىمگە كەلگەنىن ايتتى, دەپ جازادى BBC. "قوس تاراپتىڭ دا مۇددەسى ەسكەرىلۋى ءۇشىن ءبىز مۇناي-گاز سالاسىندا ەكى جاققا دا ءتيىمدى باعانى بەكىتتىك», - دەدى رەسەي پرەزيدەنتى ۆلاديمير پۋتين بەلارۋس باسشىسى الەكساندر لۋكاشەنكومەن كەزدەسۋدەن كەيىن.
«بەلارۋستىڭ رەسەي الدىنداعى قارىزىن قايتا قارجىلاندىرۋ مۇمكىندىگى بىرەر كۇندە شەشىمىن تاۋىپ قالادى», - دەدى الەكساندر لۋكاشەنكو.
پرەزيدەنتتەردىڭ كەزدەسۋى سانكت-پەتەربۋرگتە ءوتتى. 2016 جىلى رەسەي مەن بەلارۋس اراسىندا گاز تاسىمالىنا قاتىستى تۇسىنىسپەۋشىلىكتەر تۋعان بولاتىن. وتكەن جىلدىڭ مامىر ايىندا بەلارۋس تارابى ءوز بەتتەرىمەن ەسەپتەۋ جۇرگىزىپ, رەسەيدەن الىپ وتىرعان گازدىڭ ەكى ەسە قىمباتقا ساتىلىپ وتىرعانى تۋرالى مالىمدەگەن ەدى. ناتيجەسىندە, بەلارۋس ءوز ەسەبى بويىنشا بەكىتىلگەن تاريفپەن تولەم جاساي باستاعان. ال ءوز كەزەگىندە رەسەي قالعان قاراجاتتى قارىز ەسەبىندە جازىپ قويعان بولاتىن.
دونالد ترامپ پەن سي تسزينپين العاش رەت كەزدەسەدى
وسى اپتا اقش-تىڭ فلوريدا شتاتىندا اقش پرەزيدەنتى دونالد ترامپ پەن قىتاي حالىق رەسپۋبليكاسىنىڭ توراعاسى سي تسزينپين العاش رەت كەزدەسكەلى وتىر, دەپ حابارلايدى CNN.
اقش ءباسپاسوز قۇرالدارى قازىردىڭ وزىندە بۇل كەزدەسۋدى تاريحي وقيعا رەتىندە باعالاۋدا. اق ءۇي تابالدىرىعىن اتتاعان العاشقى كۇننەن باستاپ اقش-قىتاي قاتىناسىن ناشارلاتىپ العانداي بولعان ترامپ كەيىنىرەك سي تسزينپينمەن تەلەفون ارقىلى سويلەسىپ, ساراپشىلار ەكى ەل اراسىنداعى ساۋدا-ەكونوميكالىق قارىم-قاتىناسى بۇرىنعىشا ساقتالاتىنىن ايتقان.
ساياساتتانۋشىلار ەكى جاقتىڭ مۇددەلەرى ءبىر ارناعا توعىسپاي قالاتىن جەرلەرىن ايتادى. اقش پەن قىتايدىڭ ۆاليۋتا ساياساتىنداعى قايشىلىعى – سونىڭ دالەلى. «بۇل تۇرعىدا ترامپتىڭ ۇمتىلىسىن ماو تسزەدۋنمەن سالىستىرۋعا بولادى. ىشكى ەكونوميكانى كۇشەيتە وتىرىپ, حالىقارالىق ارەناداعى پوزيتسيانى كۇشەيتۋ – ترامپ ساياساتىنىڭ باستى ەرەكشەلىكتەرىنىڭ ءبىرى» دەپ جازادى CNN. «دونالد ترامپ پەن ماو تسزەدۋنعا ورتاق تاعى ءبىر سيپات بار. ەكەۋىنىڭ دە ساياساتىن كوپشىلىك تىم جىلى قابىلدامادى, الايدا ءىس جۇزىندە ليدەرلىك قابىلەتىنە سەنگەندىكتەن حالىق ولاردىڭ سوڭىنان ەردى» دەپ تۇيەدى باسىلىم.
تۇركيادا تۋريزم قايتا جاندانا باستادى
الدىن الا زەرتتەۋلەر بويىنشا, 2017 جىلى تۇركياعا 38 ملن تۋريست كەلۋى ءتيىس دەپ حابارلايدى «انادولى» اگەنتتىگى تۇركيا تۋريستىك اگەنتتىكتەر قاۋىمداستىعى (TÜRSAB) پرەزيدەنتى باشاران ۇلىسويدىڭ سوزىنە سىلتەمە جاساپ. ونىڭ ايتۋىنشا, تۇركيانىڭ تۋريزم سەكتورى وتكەن جىلعى قۇلدىراۋدان كەيىن قايتا باس كوتەرىپ, 2017 جىلعى تۋريستىك ماۋسىمعا قىزۋ دايىندالۋدا.
«تۇركيا تۋريزم نارىعىنىڭ رەسەي جانە ۋكراينا سەگمەنتتەرىندە وڭ ۇردىستەر بايقالىپ وتىر. سونىمەن قاتار ۇلىبريتانيا مەن تاياۋ شىعىس ەلدەرىنەن كەلەتىن ساياحاتشىلار سانى دا ارتا تۇسپەك. ال ەۋروپانىڭ كەي ەلدەرىنەن تۋريستەر ازايۋى ىقتيمال, بىراق بۇل ماسەلەنى دە الداعى ۋاقىتتا رەتتەيتىن بولامىز», - دەيدى ۇلىسوي.
قاۋىمداستىق پرەزيدەنتىنىڭ پىكىرىنشە, پارسى شىعاناعىنان كەلەتىن تۋريستەر نەگىزىنەن ىستانبۇلدا, قارا تەڭىزدىڭ شىعىس جاعالاۋىندا, بۋرسا مەن يالوۆا ايماقتارىندا دەم العاندى ءجون كورەدى. ال رەسەيلىك تۋريستەردىڭ دەنى ىستانبۇل, انتاليا, يزمير مەن انكارادا دەم السا, يزرايلدىك تۋريستەر كوبىنە ىستانبۇل مەن انتالياعا بارادى ەكەن.
رەسەيدە جۇمىسشىلاردىڭ وننان ءبىرى تابىسىن تاماعىنا جەتكىزە المايدى
روسستات مالىمەتتەرى بويىنشا, كاسىپورىندار مەن ۇيىمداردا جالدانىپ ىستەيتىندەردىڭ 75%-ى كەدەيلىك دەڭگەيىندە تۇر دەپ حابارلايدى «ۆەدوموستي» باسىلىمى. كەدەيلىك دەڭگەيى جۇمىسقا قابىلەتتى ادامداردىڭ كۇنكورىس مينيمۋمى, ياعني كۇنەلتۋگە ەڭ قاجەت ونىمدەر مەن قىزمەتتەر جيىنتىعىنىڭ قۇنى بويىنشا انىقتالادى. 2016 جىلى ول 10 722 رۋبلگە تەڭ بولدى.
جالاقىسى كۇنكورىس مينيمۋمى شاماسىنداعى جۇمىسشى كەدەيلىك پەن قايىرشىلىق اراسىندا تۇر بولىپ سانالادى. ەكى مينيمۋمعا تەڭ جالاقى الاتىن جۇمىسشى ءوزىن قوسقاندا وتباسىداعى ەكى ادامدى عانا اسىراي الادى. تابىسى بۇدان تومەندەر قايىرشىلار كاتەگورياسىنا تۇسەدى. ويتكەنى, جالاقىسى ونىڭ ەڭبەككە جۇمساعان كۇشىن تولتىرۋعا جەتپەيدى.
بۇل كريتەري بويىنشا, جۇمىسشىلاردىڭ 10,7%-ى قايىرشىلىق دەڭگەيىندە, 27,5%-ى – كەدەيلەر, 37%-دىڭ تابىسى كەدەيلىك دەڭگەيىنەن جوعارى بولسا, تەك 12,7%-ىنىڭ تابىسى ورتا تاپتىڭ تۇتىنۋ ستاندارتىنا سايكەس كەلەدى.
دايىنداعان باۋىرجان مۇقانوۆ
