مەملەكەتتىڭ «جۇمىسپەن قامتۋ جول كارتاسى 2020» باعدارلاماسىن جۇزەگە اسىرۋ ماقساتىندا تاراز قالاسىندا تاراز مەملەكەتتىك پەداگوگيكالىق ينستيتۋتىنىڭ ءبىتىرۋشى تۇلەكتەرى ءۇشىن بوس جۇمىس ورىندارىنا ارنالعان جارمەڭكە ءوتتى. اتالعان شاراعا 900-گە جۋىق ستۋدەنت پەن 80-نەن استام جۇمىس بەرۋشى قاتىستى.
جىل سايىن ۇيىمداستىرىلاتىن ءداستۇرلى جارمەڭكە جاستارعا بۇگىندە قاي سالا ماماندارىنا سۇرانىس كوپ نەمەسە تاپشى ەكەندىگىن جانە ەڭبەك ءوتىلىنسىز-اق جۇمىسقا ورنالاسۋعا بولاتىندىعىن انىقتاۋعا كومەكتەسەدى. سونىمەن قاتار, «ديپلوممەن – جۇمىسقا» جوسپارىن جۇزەگە اسىرۋعا دا مول مۇمكىندىك بەرەدى. ءوز سوزىندە ينستيتۋت رەكتورى داريا قوجامجاروۆا اتالعان شارانىڭ ءمانى مەن ماڭىزىنا كەڭىنەن توقتالىپ, جۇمىسقا ورنالاسۋعا نيەتتى جاستارعا مەملەكەتتىك باعدارلامانىڭ تيىمدىلىگىن ءتۇسىندىردى.
– ەلباسى نۇرسۇلتان نازارباەۆ ەل حالقىنا ارناعان جولداۋىندا بارلىق قازاقستاندىقتاردى مەملەكەت يگىلىگى جولىنداعى ەڭبەككە شاقىردى. بۇگىندە ەڭبەك شەشۋشى ۇلتتىق فاكتور ەكەنىن ۇعىندىرىپ, جالپىعا ورتاق ەڭبەك قوعامى يدەياسىن ۇسىندى. البەتتە, مەملەكەت باسشىسىنىڭ بۇل ستراتەگيالىق تاپسىرماسىن ورىنداۋدا ەل جاستارىنىڭ ءرولى زور. سونداي-اق بۇل ءىس-شارا جاستار اراسىنداعى جۇمىسسىزدىق ماسەلەسىن شەشەتىن ماڭىزدى مەحانيزم بولىپ تابىلادى, – دەدى داريا پەرنەشقىزى.
جارمەڭكەگە جامبىل وبلىسى مەن تاراز قالاسىنداعى مەكتەپكە دەيىنگى جانە ورتا ءبىلىم بەرۋ ۇيىمدارى دا قاتىسىپ, ءوز مەكەمەلەرىندەگى بوس جۇمىس ورىندارىن ۇسىندى. ستۋدەنتتەر بۇل مۇمكىندىكتى پايدالانىپ, ءتيىستى مەكەمەلەرگە ءوز تۇيىندەمەلەرىن جولدادى. بۇل باستاما جاستار اراسىنداعى جۇمىسسىزدىق ماسەلەسىن جويۋعا اتسالىسىپ, ءوز كەزەگىندە جاستاردى ەڭبەككە باۋلۋعا شاقىرادى.
حاميت ەسامان,
«ەگەمەن قازاقستان»
جامبىل وبلىسى
