بۇل اكتسياسىنىڭ ەرەكشەلىگى سول, تۋعان جەرىنەن جىراقتا جۇرگەن قالتالى ازاماتتار ءوزى تۋىپ-وسكەن اۋىلىنا قارايلاسىپ, قولىنان كەلگەنشە كومەگىن كورسەتەدى. ءبىرى اۋىلىنا مەكتەپ, بالاباقشا, سپورت زالىن, ەمحانا سالىپ بەرسە, ەندى ءبىرى مەشىت تۇرعىزادى, جول جوندەيدى.
جاقىندا ورالحان بوكەي, قاليحان ىسقاق سىندى قابىرعالى قالامگەرلەردى تۇلەتكەن, تۇركىنىڭ ءتورى, الاشتىڭ اتا جۇرتى بولعان كاتونقاراعاي اۋدانىنىڭ ورتالىعى ۇلكەن نارىن اۋىلىندا تاعىلىمدى شارا ءوتتى. «تۋعان جەرگە - تاعزىم» اكتسياسىنىڭ اياسىندا ۇيىمداستىرىلعان ينۆەستيتسيالىق فورۋمدا تۋعان جەرگە جانى اشيتىن, كىندىك كەسكەن مەكەننىڭ ءتۇتىنى ءتۇزۋ ۇشسىن دەپ تىلەيتىن كاسىپكەر ازاماتتار باس قوسىپ, شەكارا شەبىندەگى اۋداننىڭ تۇيتكىلدى ماسەلەلەرىن بىرلەسە تالقىلادى. ويلارىن ورتاعا سالدى. اۋدان ەكونوميكاسىن ورگە باستىرار, جەرگىلىكتى جۇرتقا سەپتىگىن تيگىزەر دەگەن جوبا-جوسپارلارىن جاريا ەتتى.
- ەلباسىمىز بيىلعى جولداۋىندا ەكونوميكالىق باسەكەلەستىكتى ىنتالاندىرۋعا ايرىقشا ءمان بەرىپ, ەكونوميكانى قارجىلاندىرۋعا جەكە مەنشىك سەكتوردى تارتۋدىڭ ماڭىزدىلىعىن اتاپ كورسەتكەن ەدى. بۇل اكتسياعا كاسىپكەرلەرىمىز اقشاسى تاسىعاننان ەمەس, تۋعان جەرلەرىنە, اتامەكەنگە جانى اشىعاننان قاتىسىپ, ات سالىسىپ جاتىر دەپ تۇسىنگەنىمىز ءلازىم. اۋدانىمىزدا تۇڭعىش رەت ۇيىمداستىرىلىپ وتىرعان ينۆەستيتسيالىق فورۋم جەرگىلىكتى جەردەگى الەۋمەتتىك ماسەلەلەردىڭ شەشىلۋىنە, تۋريزم سالاسىنىڭ دامۋىنا تىڭ سەرپىن بەرەدى دەپ سەنەمىز, - دەدى كاتونقاراعاي اۋدانىنىڭ اكىمى احمەتقالي نۇرعوجين فورۋمدى اشقان سوزىندە.
فورۋم بارىسىندا اۋدان اۋماعىنداعى تۋريستىك نىساندار سالۋعا, ارا شارۋاشىلىعىن دامىتۋعا قولايلى جەر تەلىمدەرى كاسىپكەرلەر نازارىنا ۇسىنىلدى. كاتونقاراعاي مەملەكەتتىك ۇلتتىق تابيعي پاركىنىڭ باس ديرەكتورى ەرلان مۇستافين پارك اۋماعىندا ەكولوگيالىق ءتۋريزمدى دامىتۋعا مول مۇمكىندىك بار ەكەنىن ايتىپ, قالتالى ازاماتتاردى ينۆەستيتسيا سالۋعا شاقىردى.
كاتونقاراعايدىڭ ەڭ تۇكپىرىندە, جان جاعىن قالىڭ ورمان قىمتاعان ارشاتى دەگەن اۋىل بار. وسى اۋىلدا تۋىپ-ءوسىپ, بۇگىندە وڭتۇستىك قازاقستان وبلىسىنىڭ شىمكەنت قالاسىندا تۇرىپ جاتقان عاني شايمەردەنوۆ ەسىمدى كاسىپكەر سوناۋ جەردەن ات ارىتىپ ارنايى كەلىپتى.
-قازىر وزگە وڭىردە تۇرىپ جاتساق تا, جۇرەگىمىز اركەز تۋعان جەر دەپ سوعادى, - دەپ ءسوزىن ساباقتاعان كاسىپكەر 300 ورىندىق جازدىق لاگەر سالىپ بەرەتىنىن ايتىپ, جەرلەستەرىن ءبىر جەلپىندىرىپ تاستادى.
«التى اي قىستىڭ ازابى, ونىمدەردىڭ وتپەۋى, وركەنيەتتىڭ جەتپەۋى, كەدەرگىلەردىڭ كەتپەۋى سەكىلدى قيىندىقتار از ەمەس. تاۋلى ايماق تابيعاتىنىڭ ادامدارعا بەرەرى مول بولعانىمەن سونى تولىق ۇقساتا الماي كەلەمىز. وزىمىزدە ءوندىرىس بولماعاندىقتان بارلىق بايلىعىمىزدى شيكىزاتتاي ساۋدالاپ جىبەرۋگە تىرىسامىز. الەم وركەنيەتكە بەت بۇرىپ, الدى تۋريستىك ساپارمەن اسپانعا ۇشىپ جاتقاندا اۋىلداعىلار اۋدان ورتالىعىنا ارەڭ جەتەدى. وركەنيەتتى اڭساعان جاستارىمىز قالاعا قاشىپ, ەرتەڭىنە الاڭداعاندار قالا ماڭىنا قونىس اۋدارىپ, اۋىلدارىمىز جالاڭاشتانىپ بارا جاتىر».
فورۋمدا ءسوز العان اۋداندىق ءماسليحات دەپۋتاتى ەرتاي كەشىلباەۆ اۋەلى تۋعان جەرىندەگى تۇيتكىلدەردى تىلگە تيەك ەتىپ, سوزدەن ىسكە كوشەتىن ۋاقىتتىڭ جەتكەنىن ايتىپ, كاتونقاراعاي اۋىلىندا قاڭىراپ بوس تۇرعان 5 ءۇيدىڭ ءبىرىن ءوز قارجىسىنا جوندەپ, ىسكە قوسۋعا ۋادە بەردى.
تابيعاتى تامىلجىعان ءتور التايدىڭ ءبىر برەندى – الەمگە ايگىلى بەرەل قورعاندارى. الايدا ساقتارعا قونىس بولعان ساقي مەكەندى كەلگىسى, كورگىسى كەلەتىن تۋريستەرگە تۇساۋ بولىپ وتىرعان تۇيتكىلدەر از ەمەس. سونىڭ ءبىرى – الىستان ارىپ, اشىپ جەتكەن ساياحاتشىلاردىڭ اياق سۋىتىپ, اس ىشەتىن جەرىنىڭ جوقتىعى. بەرەل قورىق-مۇراجايى ديرەكتورىنىڭ ورىنباسارى الماس سارباسوۆ وسى ماسەلە شەشىلسە, پاتشالار جازىعىنا كەلەتىن تۋريستەر قاتارى بۇرىنعىدان دا ارتا تۇسەتىنىن ايتىپ, بيىل بەرەل قورعاندارىن تورتكۇل دۇنيەگە ايگىلەگەن اتاقتى ارحەولوگ زەينوللا ساماشەۆتىڭ 70 جاسقا تولاتىنىن, عالىمنىڭ قۇرمەتىنە عالىم ءۇيىن اشساق دەگەن ۇسىنىسىن جەتكىزدى. ونىڭ ايتۋىنشا, مۇنداي عالىمدار ءۇيى الەمنىڭ كوپتەگەن ەلدەرىندە بار ەكەن. جۇماق مەكەن ءتور التايدىڭ ەرتەڭىنە الاڭداعان ازاماتتاردىڭ باسىن قوسقان فورۋم قورىتىندىسىندا قۇنى 1 ملرد.200 ميلليون تەڭگەنىڭ 50 مەموراندۋمىنا قول قويىلدى.
ازامات قاسىم,
«ەگەمەن قازاقستان»
شىعىس قازاقستان وبلىسى
سۋرەتتى تۇسىرگەن – شاميل باگاۋتدينوۆ
