وسكار دە لا حويانىڭ ايتۋىنشا گولوۆكين سوندەرسپەن ايقاسىندا جاراقات الىپ قالسا, قىركۇيەك ايىنا جوسپارلانعان الۆارەسپەن كەزدەسۋىنە تولىقتاي ۇلگەرمەي قالۋى مۇمكىن.
«مەنىڭشە, گەننادي مەن ونىڭ پروموۋتەرى توم لەففلەر دە لا حويانىڭ ەسكەرتۋىنە ءمان بەرىپ وتىر. سەبەبى, ءالى كۇنگە دەيىن سوندەرسكە جەكپە-جەك جونىندە كەلىسىمشارت ۇسىنبادى. ال سوندەرستىڭ پروموۋتەرى فرەنك ۋوررەن بوكسشىنىڭ گولوۆكيندى ۇزاق كۇتكىسى كەلمەيتىنىن ەسكەرتتى. بۇل گەنانىڭ ءابسوليۋتتى چەمپيون اتانۋى ءۇشىن ۇلكەن مۇمكىندىك. ەستۋىمشە, سوندەرس بۇل ءىستى اياقتاۋعا 10 كۇندەي ۋاقىت بەرىپتى. بولماسا, ارى قاراي جىلجىپ, وزگە قارسىلاس ىزدەيتىنىن جاسىرمادى. ورتا سالماقتاعى سوڭعى بەلبەۋگە يە بولعىسى كەلسە, ءىستى جىلدامداتۋى ءتيىس. سوندەرس ايقاسۋدان باس تارتقان جوق. ال مۇنداي ءسات ەندى مۇلدەم بولماۋى مۇمكىن», – دەدى دەن ەمبروز.
«GGG-ءدىڭ الدىندا ەكى تاڭداۋ تۇر. ءبىرى – ساۋل الۆارەسپەن سىياقىسى جوعارى جەكپە-جەك وتكىزۋ, ال ەكىنشىسى – ءبيلليدىڭ ەنشىسىندەگى WBO بەلبەۋىنە تالاسۋ. مەنىڭشە, گەننادي سوندەرسكە كەلىسىمشارت ۇسىنىپ, دە لا حويانىڭ پىكىرىمەن ساناسپايتىنىن كورسەتكەنى ءجون. ال الۆارەس گولوۆكينمەن جۇدىرىقتاسقىسى كەلگەن بولسا, بوكس كەشىن الدەقاشان ۇيىمداستىرعان بولار ەدى», – دەدى Boxingnews24.com پورتالىنىڭ شولۋشىسى.
«گەننادي سوندەرستەن باس تارتىپ, «كانەلونى» قىركۇيەككە دەيىن بوستان-بوس كۇتىپ قالۋى مۇمكىن. سەبەبى, گولوۆكين-الۆارەس ايقاسى ۇيىمداستىرىلادى دەگەنگە ءوز باسىم سەنبەيمىن. مەكسيكالىق بۇل كەزدەسۋدەن 2016 جىلى اشىق تۇردە باس تارتقان. ەندى وسىدان كەيىن نە كۇتۋگە بولادى؟ توم لەففلەر مەن گولوۆكين نە ءۇشىن ولارعا سەنىم ارتۋى كەرەك؟ ەگەر GGG وكىلدەرى الدى-ارتىن تولىعىمەن ويلايتىن بولسا, سوندەرسپەن بوكس كەشىن تەزدەتىپ ۇيىمداستىرعانى ءجون. ال دە لا حويا گولوۆكيندى كۇتە تۇرار», – دەدى دەن ەمبروز.
«سوندەرستىڭ پروموۋتەرى ايتقانداي, گولوۆكيننىڭ ەندىگى بار جۇمىسى كەلىسىمشارتقا قول قويۋ عانا. قارجى ماسەلەسى تولىقتاي شەشىلىپتى. ەندى الۆارەس جايلى ازىرگە ويلاماۋى ءتيىس. كاسىپقوي بوكس – بيزنەس. ال اقشا جۇرگەن جەردە ەشنارسە كۇتپەيدى», – دەدى ول.
«كانەلونى» جەڭۋ گەنا ءۇشىن اسا قيىن ەمەس. مەكسيكالىقتىڭ كۇشىن 2013 جىلى كىشى فلويد مەيۋەزەرگە قارسى ايقاستا كوردىك. مەن ونى ءتىپتى, دەنيەل دجەيكوبستان دا وسال دەسەم, ارتىق ايتپاعان بولار ەدىم», – دەپ اياقتادى ەمبروز.
ايتا كەتەيىك, 2015 جىلدىڭ قاراشا ايىندا ورتا سالماقتا ساۋل الۆارەس پۋەرتوريكالىق ميگەل كوتتونى جەڭگەننەن كەيىن WBC نۇسقاسى بويىنشا الەم چەمپيونى اتانعان. ال وسى بەلبەۋگە باستى ۇمىتكەر گەننادي گولوۆكين ونىڭ مىندەتتى قارسىلاسى اتاندى. قوس تاراپ 2016 جىلدىڭ 24 مامىرىنا دەيىن بوكس كەشىن ۇيىمداستىرۋ ماسەلەسىن شەشۋى ءتيىس بولاتىن. بىراق مەكسيكالىق بوكسشى 19 مامىردا گەننادي گولوۆكينگە WBC بەلبەۋىن جەكپە-جەكسىز بەرىپ, سالماعىن اۋىستىرىپ كەتتى. دەگەنمەن, «كانەلو» گولوۆكينمەن جۇدىرىقتاسۋدان باس تارتپايتىنىن بىرنەشە رەت مالىمدەدى.
ەكى جاق ءالى كۇنگە دەيىن ناقتى شەشىمگە كەلە الماي ءجۇر. وسىنىڭ سالدارىنان قازاقستاندىق بوكسشى وتكەن جىلى نەبارى ەكى رەت قانا شارشى الاڭعا شىقتى (23 ءساۋىر كۇنى دومينيك ۋەيدپەن, 10 قىركۇيەكتە كەلل برۋكپەن). مالىمەتتەر بويىنشا گولوۆكين-الۆارەس كەزدەسۋى وسى جىلدىڭ قىركۇيەك ايىنا جوسپارلانىپ وتىر.
ال بريتان بوكسشىسى بيللي دجو سوندەرستىڭ ەنشىسىندە ورتا سالماقتاعى جالعىز WBO بەلبەۋ بار. قالعانى گولوۆكيندە. قازاقستاندىق بوكسشى ورتا سالماقتاعى بارلىق بەلبەۋگە يە بولىپ, ءابسوليۋتتى چەمپيون اتانۋدى ارماندايتىنىن بىرنەشە رەت ايتتى. كەزدەسۋدىڭ قارجى ماسەلەسى شەشىلگەنمەن, ءالى كۇنگە دەيىن كەلىسىمشارتقا قول قويىلمادى.
دايىنداعان: ايان ءابدۋالي, «ەگەمەن قازاقستان»
