«مۇنداي سەرپىن ۇلتتىق ۆاليۋتاداعى دەپوزيتتەر ۇلعايعان كەزدە (0,3%-عا) شەتەل ۆاليۋتاسىنداعى دەپوزيتتەر كولەمىنىڭ ازايۋىنا (11,5%-عا) بايلانىستى بولدى. ناتيجەسىندە, دەپوزيتتەردىڭ دوللارلانۋ دەڭگەيى 2016 جىلعى جەلتوقسانداعى 54,6%-دان 2017 جىلعى اقپاندا 51,5%-عا دەيىن تومەندەدى. زاڭدى تۇلعالاردىڭ ۆاليۋتا سالىمدارىنىڭ ۇلەسى جىل باسىنان 49,1%-دان 45,8%-عا دەيىن, جەكە تۇلعالاردىكى 62,0%-دان 58,8%-عا دەيىن تومەندەدى», دەپ حابارلايدى قر ۇلتتىق بانكى.
ۇلتتىق بانكتىڭ مالىمەتتەرىنە قاراعاندا, ءتول ۆاليۋتاداعى دەپوزيتتەردىڭ وسۋىنە جەكە تۇلعالار دەپوزيتتەرىنىڭ كوبەيۋى اسەر ەتكەن.
«ولار جىل باسىنان 4,1%-عا نەمەسە 121,3 ملرد. تەڭگەگە ۇلعايدى. شەتەل ۆاليۋتاسىنداعى دەپوزيتتەر تەڭگەنىڭ نىعايۋى ناتيجەسىندە قايتا باعالاۋ ەسەبىنەن دە (قاڭتار-اقپاندا 6,2%-عا), ناقتى اكەتىلۋى ەسەبىنەن دە (5,7%-عا) تومەندەدى», دەلىنگەن حابارلامادا.
