اۆتورلىق جۇمىستار ارالۋاندىلىعىمەن جانە ادەمىلىگىمەن كەلۋشىلەردى ءتانتى ەتتى. ءار شەبەردىڭ وزىندىك ءستيلى, وزىندىك ورىنداۋ تەحنيكاسى بار. ۇناعان اشەكەيلەردى ساتىپ الۋعا دا مۇمكىندىك تۋدى.
«بيىل زەرگەرلىك ونەردىڭ ءداستۇرلى اشىق بايقاۋى قاراعاندى وبلىسىنىڭ اكىمدىگى جانىنداعى «قوعامدىق كەلىسىمنىڭ» قولداۋىمەن جاڭا الاڭدا – دوستىق ۇيىندە ۇيىمداستىرىلىپ وتىر. ەلىمىزدىڭ تۇكپىر-تۇكپىرىنەن كەلگەن شەبەرلەر بايقاۋدا 20-عا جۋىق اۆتورلىق بۇيىم ۇسىندى. جاستار كوپ. جاڭا ەسىمدەر جاريا بولادى دەپ ويلايمىن», – دەدى «شەبەر» ساندىك-قولدانبالى ونەر شەبەرلەرىن قولداۋ ورتالىعى قوعامدىق بىرلەستىگىنىڭ توراعاسى ناتاليا ۆشيۆتسەۆا.
قازىلار القاسىنا قاراعاندىلىق زەرگەر, «زەرگەر» بايقاۋىنىڭ لاۋرەاتى سەرگەي تاسكين جەتەكشىلىك ەتتى.
قازاقستان قولونەرشىلەر وداعىنىڭ توراعاسى, دۇنيەجۇزىلىك قولونەرشىلەر كەڭەسىنىڭ ورتالىق ازيا بويىنشا ۆيتسە-پرەزيدەنتى ايجان بەكقۇلوۆانىڭ پىكىرىنشە, قاراعاندىدا زەرگەرلىك ونەر جاقسى دامىعان.
− سورەلەردى قاراپ شىعىپ, جاقسى شەبەرلەردىڭ كوپ ەكەنىن بايقادىم. ولار قازاقتىڭ زەرگەرلىك ونەرى تاقىرىبى مەن ءداستۇرىن تەرەڭ تۇسىنەدى. سەريالى جۇمىستار دا كەزدەسەدى. تاعى دا ءبىر ماڭىزدى جايت, زەرگەرلەردىڭ اشەكەيلەر جاساۋدا وزىندىك مانەرى بار. تاقىرىپتى دامىتۋ, ەكسپوزيتسيانى شىعارماشىلىق تۇرعىدان ۇسىنا ءبىلۋ – بۇل ماڭىزدى ىلگەرى قادام, – دەيدى قوناق. – مۇنداي بايقاۋلار ودان ءارى دامۋعا جانە جەتىلۋگە سەرپىن بەرەدى.
ميراس اسان, «ەگەمەن قازاقستان»
قاراعاندى
