قالاشىق اۋماعىندا ۇيىمداستىرىلعان باسقوسۋدا «استانا ەكسپو-2017» ۇك» اق كوممەرتسيالىق دەپارتامەنتىنىڭ ديرەكتورى داۋلەت ەركىمباەۆ جارتى الەم كوز تىككەن شاراعا دايىندىق جۇمىستارىن اڭگىمەلەدى. ول الدىمەن باستالۋىنا جەتپىسشاقتى كۇن قالعان كورمەنىڭ بيلەتتەرىن تۇرعىنداردىڭ ساتىپ الۋىنا بارلىق جاعداي جاسالىپ جاتقانىن جەتكىزدى. ال كەشەگە دەيىن كورمەنىڭ 670 مىڭنان استام بيلەتى يەسىن تاپتى. ونىڭ 13 پايىزى شەتەلدىكتەردىڭ ەنشىسىندە.
«ناۋرىز ايىندا قازاقستاننىڭ بارلىق وڭىرىندە, ناقتىراق ايتسام, وبلىس ورتالىقتارىندا بيلەت ساتاتىن كاسسالاردى اشتىق. وتكەن جىلدىڭ 10 جەلتوقسانىندا استانا مەن الماتى قالالارىندا كاسسالار ءوز جۇمىسىن باستادى. وسى جىلدىڭ 8 ناۋرىزىندا ءتورت وڭىردە بيلەت ساتاتىن ورتالىق اشىلدى. كەيىن, 20 ناۋرىزعا دەيىن بەس وبلىستا جانە 25 ناۋرىزدان باستاپ بەس وڭىردە بيلەت ساتاتىن كاسسالار تۇرعىندارعا قىزمەت ەتە باستادى», دەدى د.ەركىمباەۆ.
كوممەرتسيالىق دەپارتامەنت ديرەكتورىنىڭ سوزىنە سەنسەك, بيلەت ءماسەلەسىنە قاتىستى قيىندىقتار تۋىندامايدى. «حالىقارالىق شارانىڭ بيلەتتەرى ەلىمىزدىڭ 16 ءوڭىرىندە دە ساتىلۋدا. 6 ناۋرىز كۇنى «MEGA Silkway» ساۋدا ويىن-ساۋىق ورتالىعىندا تاعى ءبىر كاسسا اشىلدى. قازىرگى تاڭدا ءبىزدىڭ بيلەتتەر 15 نۇكتەدە جانە «قازپوشتا» كومپانياسىنىڭ مىڭنان استام ءبولىمىندە ساتىلۋدا. وسى اپتادان باستاپ ەكسپو-2017 كورمەسىنىڭ بيلەتتەرى تەمىر جول بيلەتتەرىمەن بىرگە ەلىمىزدىڭ بارلىق وبلىسىنداعى 220 كاسسادا ساتىلادى», دەدى دەپارتامەنت باسشىسى.
ەكسپو-2017 حالىقارالىق كورمەسىنىڭ بيلەتتەرى رەسەيدىڭ 7 قالاسىندا ساتىلا باستاعان. بيلەت قۇنى – 850-1650 رۋبل شاماسىندا. داۋلەت ەركىمباەۆتىڭ مالىمەتىنشە, ماسكەۋ, سانكت-پەتەربۋرگ, سوچي, قازان, ءنوۆوسىبىر, نيجني نوۆگورود جانە ەكاتەرينبۋرگ قالالارىندا ەكسپو كورمەسىنىڭ بيلەتتەرىن ساتاتىن 45 ورىن بار. «مۇنىمەن جۇمىس توقتاپ قالمايدى. ءبىز بيلەت ساتۋ ايماعىن كەڭەيتە بەرەمىز», دەيدى ول.
دەپارتامەنت ديرەكتورى حالىقارالىق كورمەنىڭ ەڭ قىمبات بيلەتى 8 مىڭ تەڭگە تۇراتىنىن اتاپ ءوتتى. سونداي-اق, باعاسى 20 مىڭ تەڭگە بولاتىن ليميتتەلگەن ەستەلىك بيلەتتەر بار. ونى العان ازامات كورمەگە كەز كەلگەن كۇنى كىرە الادى. سونداي-اق, بيلەتتە تاعى باسقا جەڭىلدىكتەر قاراستىرىلعان. «الايدا, ليميتتەلگەن بيلەتتەر رەسەي فەدەراتسياسى اۋماعىندا ساتىلمايدى, تەك قازاقستاندا عانا ۇسىنىلادى. ءويتكەنى, ول شەكتەۋلى كولەمدە عانا باسىلعان. جەڭىلدىكتەر دە تەك ەلىمىزدىڭ ءىشىندە ساتىلعان بيلەتتەردە قاراستىرىلادى», دەدى د.ەركىمباەۆ. «استانا ەكسپو-2017» ۇك» اق وكىلى ءسوزىنىڭ سوڭىندا بۇل باعىتتا قىتايدىڭ ءىرى تۋريستىك كومپانيالارىمەن جۇمىس جاسالىپ جاتقاندىعىنا توقتالدى.
ەكسپو-2017 كورمەسى بيلەتتەرىنىڭ باعاسى جۇمىس كۇندەرىنە – 4000 تەڭگەگە, دەمالىس كۇندەرىنە 6000 تەڭگەگە ساتىلۋدا. بەلگىلى داتاسى قويىلماعان بيلەتتەر قۇنى العاشقىلارىمەن سالىستىرعاندا, 2000 تەڭگەگە قىمبات.
اسحات رايقۇل, «ەگەمەن قازاقستان»
