ىنتىماقتاستىق كوميتەتىنىڭ بۇل جولعى وتىرىسى ەۋروپالىق وداق پەن قازاقستان اراسىنداعى ىنتىماقتاستىق توڭىرەگىندەگى ۇنقاتىسۋدى كەڭەيتۋگە جانە بۇعان دەيىنگى قالىپتاسقان قارىم-قاتىناستى نىعايتۋعا, ونىڭ ءىشىندە ايماقتىق تۇراقتىلىق پەن دامۋ جولىنداعى ءوزارا مۇددەلەستىككە نەگىزدەلدى.
وتىرىسقا قاتىسۋشىلار 2015 جىلدىڭ 21 جەلتوقسانىندا استانادا قول قويىلعان كەڭەيتىلگەن سەرىكتەستىك جانە ىنتىماقتاستىق تۋرالى كەلىسىم اياسىندا ەكىجاقتى ساياسي جانە ەكونوميكالىق ءارىپتەستىكتى دامىتۋ توڭىرەگىندە ءسوز قوزعادى. ديپلوماتتار بۇل تاريحي قۇجاتتى ءجۇزەگە اسىرۋ ىقپالداستىق كوكجيەگىن بارلىق سالا بويىنشا كەڭەيتۋگە مۇمكىندىك بەرەتىنىنە سەنىم ءبىلدىردى.
رومان ۆاسيلەنكو: «ەۋروپالىق وداق – قازاقستاننىڭ جەتەكشى ساۋدا-ەكونوميكالىق جانە ينۆەستيتسيالىق سەرىكتەسى. ونىڭ ەنشىسىنە قازاقستاننىڭ سىرتقى تاۋار اينالىمىنىڭ 50 پايىزى جانە ەلىمىز ەكونوميكاسىنا قۇيىلعان شەتەل ينۆەستيتسياسىنىڭ جارتىسىنان كوبى تيەسىلى», – دەي كەلە, ەكىجاقتى تاۋار اينالىمىنىڭ ۋاقىت وتكەن سايىن قارقىن الا ءتۇسكەنىن جەتكىزدى. ماسەلەن, 2016 جىلى قازاقستان – ەۋروپالىق وداق اراسىنداعى تاۋار اينالىمى 24,1 ملرد اقش دوللارىن قۇراعان. ونىڭ ىشىندە ەكسپورت – 18,4 ملرد ەۋرو بولسا, يمپورت – 5,6 ملرد ەۋرو.
«جالپى, بۇل جيىن اۋقىمدى ماسەلەلەردى جان-جاقتى قوزعايدى. ولار ساياسي-ەكونوميكالىق, ساۋدا, ءوڭىر قاۋىپسىزدىگى, ەنەرگەتيكا, كولىك, ترانزيت, ءبىلىم سالالارىمەن تىكەلەي بايلانىستى. قازاقستان مەن ەۋروپالىق وداق اراسىنداعى كەڭەيتىلگەن سەرىكتەستىك جانە ىنتىماقتاستىق تۋرالى كەلىسىم 29 سالانى قامتيدى. ءبىزدى ەۋروپالىق وداقپەن مىقتى ديپلوماتيالىق ارىپتەستىك تەتىگى بايلانىستىرىپ كەلەدى. كەڭەيتىلگەن سەرىكتەستىك جانە ىنتىماقتاستىق تۋرالى كەلىسىم – وسىنىڭ ايعاعى», دەدى ءوزىنىڭ سوزىندە سىرتقى ىستەر ءمينيسترىنىڭ ورىنباسارى.
ليۋك دەۆين دە رومان ۆاسيلەنكونىڭ ءسوزىن قۋاتتادى. «ەۋروپالىق وداق پەن قازاقستان ىنتىماقتاستىعى, شىنىمەن دە, جاقسى دەڭگەيدە. ەۋروپالىق وداق – ءسىزدەردىڭ ەلدەرىڭىزدىڭ ءىرى ساۋدا جانە ينۆەستيتسيالىق ارىپتەسى. بۇگىندە قازاقستان الەمدىك جانە ءوڭىرلىك تۇرعىدان العاندا, بەيبىتشىلىك جانە قاۋىپسىزدىكتى قامتاماسىز ەتۋ باعىتىن بەرىك ۇستانعان ەڭ ماڭىزدى ءارىپتەسىمىزگە اينالۋدا. جاقىن كۇندەرى قازاقستاندا ەۋروپالىق وداق پەن ورتالىق ازياداعى ساياسي جانە قاۋىپسىزدىك ماسەلەلەرىنە ارنالعان جوعارى دەڭگەيدەگى تاعى ءبىر شارا وتەدى», – دەدى.
جيىندا, سونداي-اق, ءبىلىم بەرۋ, سۋ رەسۋرستارىن باسقارۋ, قورشاعان ورتانى قورعاۋ, قۇقىق ۇستەمدىگى, قاۋىپسىزدىك, تەرروريزم جانە ەسىرتكى بيزنەسىمەن كۇرەس سەكىلدى سالالار بويىنشا ىنتىماقتاستىقتىڭ وزەكتى ماسەلەلەرى, ەۋروپالىق وداق پەن قازاقستان ازاماتتارى ءۇشىن ۆيزالىق رەجىمدى جەڭىلدەتۋ جايى تالقىلاندى.
ءلايلا ەدىلقىزى,
«ەگەمەن قازاقستان»
