ەكسپو-2017 كورمەسىنىڭ اۋماعىنداعى توبەسىنە كۇن باتارەيالارى ورناتىلعان شار ىسپەتتەس عيماراتپەن قاتار, قوناق ءۇي, ساۋدا ورتالىعى, بانك, رەستوران جانە كوپشىلىككە قىزمەت كورسەتەتىن وزگە دە ورىندار بەينەلەنگەن مودەل Holiday World كورمەسىنە قاتىسۋشىلار مەن تۋريستەردىڭ نازارىن وزىنە اۋدارا ءبىلدى.
«ەكسپو-2017 كورمەسىنىڭ مودەلىن كورگەن كەزدە مەن ونى اي ستانساسىنىڭ جوباسى نەمەسە بولاشاقتىڭ قالاسىنىڭ ەسكيزى دەپ ويلاپ قالدىم. سوسىن, بۇل اۋقىمدى جوبا دۋباي نەمەسە توكيودا جاسالعان دەپ بولجادىم. الايدا, كەيىن مۇنىڭ قازاقستاندا وتەتىن ەكسپو-2017 كورمەسىنە ارنالعان جوبا ەكەنىن ءبىلىپ, تاڭعالدىم», دەيدى Holiday World كورمەسىنە قاتىسۋشى شەتەلدىك ازامات.
Holiday World شاراسى اياسىندا ەكسپو-2017 كورمەسىنىڭ جوباسى جونىندەگى جىلى لەبىز چەحيانىڭ ونەركاسىپ جانە ساۋدا مينيسترى يان ملادەكتىڭ دە اۋزىنان ەستىلدى. يا.ملادەك وتكەن جىلدىڭ قاراشا ايىندا قازاقستانعا رەسمي ساپارمەن كەلىپ, ەكسپو-2017 حالىقارالىق كورمەسىنىڭ قۇرىلىس جۇمىستارىمەن ارنايى تانىسقان بولاتىن.
اتالعان جيىندا قازاقستاننىڭ چەحياداعى توتەنشە جانە وكىلەتتى ەلشىسى سەرجان ابدىكارىموۆ كوپشىلىكتى ەكسپو-2017 كورمەسىنىڭ دايىندىق جۇمىستارى, ەلىمىزدىڭ جاڭا ۆيزاسىز رەجىم ساياساتى, تۋريزم باعىتىندا اتقارىلىپ شاتقان شارالار, سونداي-اق, قازاقستاننىڭ قوناقجايلىلىعى تۇرعىسىندا اقپاراتتاندىردى.
شارا بارىسىندا قازاقستان وكىلدەرىنە چەحيالىقتار مەن شەتەلدىكتەر استاناعا قانداي اۋە جولىمەن بارۋعا بولاتىنى, قازاقستانعا بارۋ ءۇشىن ۆيزا الۋ ءىسى قالاي شەشىلەتىنى تۇرعىسىندا سۇراقتار قويۋمەن بولدى. اسىرەسە, چەحيا مەن ەكونوميكالىق ىنتىماقتاستىق جانە دامۋ ۇيىمىنا مۇشە ەلدەردىڭ ازاماتتارى بيىلعى قاڭتاردان باستاپ وزدەرى ءۇشىن قازاقستاندا 30 كۇنگە ۆيزاسىز رەجىم ەنگىزىلگەنىنە رازى بولدى.
ايتا كەتەيىك, قازىرگى تاڭدا چەحيا – جاسىل تەحنولوگيا سالاسىندا جيناعان ءتاجىريبەسى مول ەلدەر قاتارىندا. بۇل ەل بۇگىندە ەكسپو-2017 كورمەسىندەگى ءوز پاۆيلونىن جابدىقتاۋ ءۇستىندە. Holiday World كورمەسىندە اتاپ وتىلگەندەي, ەكسپو-2017 كورمەسىندە چەحيالىق ەكسپوزيتسيا ءوزىنىڭ بىرەگەيلىگىمەن ەرەكشەلەنبەك. استانادا وتەتىن كورمەنىڭ اشىلۋ سالتاناتىنا چەحيا پرەزيدەنتى ميلوش زەمان كەلەدى دەپ كۇتىلۋدە.
ال Holiday World حالىقارالىق كورمەسى – الەمنىڭ جەتەكشى تۋريستىك كومپانيالارىنىڭ قاتىسۋىمەن جىل سايىن پراگادا وتەتىن اۋقىمدى شارا. ول چەحيانىڭ ايماقتىق دامۋ مينيسترلىگى مەن وسى ەلدىڭ ءتۋريزمدى دامىتۋ ءجونىندەگى CzechTourizm اگەنتتىگىنىڭ قولداۋىمەن ۇيىمداستىرىلادى. بيىل Holiday World حالىقارالىق كورمەسىنە 50 ەلدىڭ دەلەگاتسياسى قاتىستى.
