قازاقستاننىڭ ەڭبەك سىڭىرگەن قايراتكەرى الما كاكىشەۆانىڭ رەجيسسەرلىگىمەن كورەرمەندەرىمەن قاۋىشقان جاڭا قويىلىم ونەرسۇيەر قاۋىمنىڭ ىستىق ىقىلاسىنا بولەندى. درامانىڭ اۆتورى – ءمادينا وماروۆا. اتالعان سپەكتاكل ۇلى وتان سوعىسى جىلدارى تىلدا قالعان حالىقتىڭ باسىنداعى اۋىر ءحالدى سۋرەتتەيدى. الاپات مايدان ەلدەگى ەر-ازاماتتى تۇگەل سىپىرىپ الىپ كەتكەندە, بارلىق قيامەت-قيىنشىلىق اۋىلدا قالعان شال-كەمپىر, بالا-شاعا مەن ايەلدەردىڭ موينىنا قىل شىلبىر بولىپ ءىلىندى. سول ءبىر كەز تاعى ءبىر سۇمدىعىمەن تاريحتا قالدى. ول – كەڭەس وكىمەتىنىڭ ساياساتىنا قايشى بولىپ كورىنگەن ۇلتتاردى تۋعان جەرىنەن ايىرىپ, باسقا مەكەنگە دەپورتاتسيالاۋ بولاتىن. قۋعىن-سۇرگىنگە ۇشىراعان ۇلت وكىلدەرى قازاق اۋىلدارىنا كەلدى.
قويىلىمعا ارقاۋ بولعان نەگىزگى تاقىرىپ وسى. ەل مەن ەلدىڭ, ۇلت پەن ۇلتتىڭ باۋىرلاسۋ پروتسەسى, ۇلتىمىزدىڭ قوناقجايلىلىعى كەڭ مازمۇندا كورىنىس تاپقان. تۋىندىدا قازاقتىڭ ءوزى قايعىدان قان جۇتىپ, اش-جالاڭاش وتىرسا دا, پانا ىزدەپ كەلگەن جۇرتتى سىرتقا تەپپەي, ايالى الاقانىن قالاي ۇسىنعانى باياندالادى. سوعىس جىلدارى حالىقتىڭ باسىنا ءتۇسكەن ناۋبەت, كۇشتىنىڭ السىزگە كورسەتكەن وكتەمدىگى, قاراپايىم اۋىل ادامدارىنىڭ ءتىرشىلىگى, بۇكپەسىز دە بوياماسىز قالپىندا بەرىلگەن.
سپەكتاكلدەگى نەگىزگى كەيىپكەرلەردى باۋىرجان قاپتاعاي, ومار قيقىموۆ, داناگۇل تەمىرسۇلتانوۆا, باقتيار قوجا, گۇلنار جاقىپوۆا, عاينيكامال بايقوشقاروۆا جانە تاعى دا باسقا تەاتردىڭ تانىمال ارتىستەرى سومدادى. تەاتر سىنشىلارى قويىلىمعا جاقسى دەگەن باعا بەردى «ءتورت بىردەي ۇلىنان ايىرىلعان اعيرانىڭ «قارالى قاعاز ماعان بالا بولا ما؟» دەگەن ءسوزى سوعىس كەزىندەگى انالاردىڭ بەينەسىن كوز الدىما اكەلدى. قويىلىمداعى اۋىلباسىنىڭ ايەلى بولىپ ويناعان نۇرجان بەكسۇلتانوۆانى ەرەكشە اتاپ كەتكىم كەلەدى. حالىقتى جىلاتا دا, كۇلدىرە دە ءبىلدى», دەيدى تەاتردىڭ تۇراقتى كورەرمەنى جاسۇلان ناۋرىزاليەۆ.
ونەر دەسە ىشەر اسىن جەرگە قوياتىن كورەرمەن قاۋىمدى ءتانتى ەتكەن جاڭا قويىلىم حالىقتىڭ ءىلتيپاتىنا بولەنە بەرەدى دەگەن سەنىمدەمىز.
ارمان وكتيابر, «ەگەمەن قازاقستان»
الماتى
