بۇكىلالەمدىك جابايى تابيعات قورىنىڭ (WWF) باستاماسىمەن جىل سايىن ناۋرىز ايىنىڭ سوڭعى سەنبىسىندە تۋ كوتەرەتىن شارا بيىل ونىنشى مارتە وتكىزىلىپ وتىر. بۇل جاھاندىق شاراعا ءبىر مەزەتتە 175 مەملەكەتتەن 7 مىڭنان استام قالا قاتىسىپ, ەلەكتر جارىعىن ءسوندىردى. 2 ميللياردتان استام ادامدى قامتيتىن وتە اۋقىمدى ەكولوگيالىق جوبا وسىلايشا كليماتتىڭ كۇن ساناپ وزگەرۋىنە كۇللى ادامزاتتىڭ نازارىن اۋدارۋدى كوزدەيدى.
اتالعان شارادا قالا اكىمىنىڭ ورىنباسارى ە.امانشاەۆ ەلوردادا 100-دەن استام نىسان جارىقتارىن ءوشىرىپ, اتالعان اكتسياعا ءۇن قوسىپ وتىرعانىن جانە وعان قاتىسۋشى مادەني مەكەمەلەر مەن الەۋمەتتىك نىسانداردىڭ جىلدان-جىلعا كوبەيىپ كەلە جاتقانىن جەتكىزدى. ونىڭ ىشىندە «استانا وپەرا» تەاترى, «بايتەرەك» مونۋمەنتى, «ماڭگىلىك ەل» سالتانات قاقپاسى, تاۋەلسىزدىك سارايى, «حازىرەت سۇلتان» مەشىتى, «الاۋ» سپورت كەشەنى, «استانا-ارەنا» ستاديونى, ۇلتتىق مۋزەي جانە كوپىرلەر مەن سكۆەرلەر بار. وسىلايشا, ەلوردالىقتار بۇگىندە ەكولوگيانى وڭالتۋ مەن تابيعاتتى قورعاۋ ماسەلەلەرىنە ارنالعان شارالاردىڭ بەلسەندى قاتىسۋشىسىنا اينالدى. پارلامەنت ءماجىلىسىنىڭ دەپۋتاتى ايگۇل سولوۆەۆا ەكسپو-2017 حالىقارالىق كورمەسىنىڭ «بولاشاقتىڭ ەنەرگياسى» تاقىرىبىنا ارنالۋى ارقىلى جاسىل كوپىر مىندەتىن اتقارىپ وتىرعان ەلباسى ساياساتىنا ەرەكشە توقتالدى. وسى ارقىلى قازاقستان قورشاعان ورتانى قورعاۋ بويىنشا الەمدەگى يننوۆاتسيالىق جوبالاردىڭ ورىستەۋىنە ءوز ۇلەسىن قوسادى, دەدى دەپۋتات. ال «بايتاق بولاشاق» ەكولوگيالىق اليانسى» رقق جەتەكشىسى ازاماتحان ءامىرتايدىڭ ايتۋىنشا, ەلىمىزدە جىل سوڭىنا دەيىن 18 ميلليون جاس وسكىن وتىرعىزىلماق. ول وسى ىزگى اكتسياعا بارشا قازاقستاندىقتاردى بەلسەنە قاتىسۋعا شاقىردى.
ايتا كەتكەن ابزال, بۇكىلالەمدىك جابايى تابيعات قورىنىڭ ۇيىمداستىرۋىمەن ەلىمىزدە كيىكتەردى قورعاۋ, تۇران جولبارىسىن ورالتۋ سىندى بىرقاتار شارالار جۇزەگە اسىرىلۋدا.
دۋمان اناش, «ەگەمەن قازاقستان»
