قىزىلجار وڭىرىندە كوممۋنالدىق تولەمدەر بويىنشا قارىزعا بەلشەدەن باتقان تۇرعىندار جىرتىلىپ-ايىرىلادى. قازىر ولاردىڭ بەرەشەگى 400 ميلليون تەڭگەنى قۇراپ, سوت ورگاندارىنا 452 تالاپ-ارىز جولدانعان.
«سەۆكازەنەرگوسبىت» جشس-ءنىڭ باسقارما باسشىسى رۇستەم رامازانوۆتىڭ ايتۋىنشا, بەرەشەك تولەمدەر ءۇشىن جىل باسىنان بەرى ەكى مىڭعا جۋىق پاتەر ەلەكتر قۋاتىنان اعىتىلعان. بىراق, دۇنيە-مۇلكىن تاركىلەۋ, شەت ەلگە شىعۋعا تىيىم سالۋ سەكىلدى قولدانىلعان شارالارعا قاراماستان, كوممۋنالدىق قارىزداردىڭ كەميتىن ءتۇرى بايقالمايدى. مىندەتتى تولەمنەن جالتارىپ, نەشە ءتۇرلى قۋلىقتارعا باراتىندار بىرنەشە مارتە ءاشكەرەلەنگەن. ولاردىڭ اراسىندا ەلەكتر قۋاتىن زاڭسىز قوسىپ العاندار ءجيى كەزدەسەتىن كورىنەدى. پەتروپاۆل قالاسىنىڭ ءبىر تۇرعىنى ون جىلدان بەرى ەسەپ ايىرىسپاي كەلگەن. 7 ادامنىڭ قارىزى جارتى ميلليون تەڭگەدەن اسقان.
ەندى سوت ورىنداۋشىلار كوممۋنالدىق قىزمەت كورسەتەتىن كاسىپورىندارمەن بىرلەسە قيمىلداپ, تىعىرىقتان شىعۋدىڭ قاتاڭ جولدارىن قاراستىرۋعا كوشكەن. زاڭ اياسىندا ىقپال جاساۋ ءوز ناتيجەسىن ءبىرتىندەپ بەرە باستاعان سياقتى. ءماسەلەن, سوت شەشىمىمەن ءبىر تۇرعىننىڭ دۇنيە-مۇلكى تاركىلەنە باستاعانى سول ەكەن, 450 مىڭ تەڭگە قارىزىن قولما-قول قۇيعان. «تاركىلەنگەن دۇنيە-ءمۇلىكتەردى ساتۋ – ۇزاققا سوزىلاتىن پروتسەسس. قارىزگەرلەردى تابۋ دا وڭايعا سوقپايدى. بىلتىر − 10, بيىل 3 كولىك الىندى. ارالارىندا قىمبات «تەمىر تۇلپارلار» دا بار. سوعان قاراعاندا, يەلەرى باقۋاتتى تۇراتىن سەكىلدى. نە سەبەپتى ۋاقتىلى ەسەپ ايىرىسپايتىنى ءتۇسىنىكسىز», دەيدى جەكە سوت ورىنداۋشى ماقسات بيسەكەەۆ. بەرەشەكتەرىن وتەۋىنە بايلانىستى ءوندىرىسكە جىبەرىلگەن 917 ءىستىڭ تورتتەن ءبىرى قىسقارتىلعان.
بۇگىندە 3 تۇرعىننىڭ ءپاتەرلەرىنەن ايىرىلاتىنى بەلگىلى بولىپ وتىر. ولاردىڭ كەبىن تاعى 4 تۇرعىن كيۋى مۇمكىن.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى
