«استانا» مەن «شاحتەر» ەۋروپانىڭ بەدەلدى كلۋبتىق ءتۋرنيرىنىڭ توپتىق كەزەڭىندە ونەر كورسەتتى. وسى جەتىستىككە قاراپ, كەيبىر شەنەۋنىكتەر قازاق فۋتبولى دامىپ جاتىر دەپ ويلايتىن سەكىلدى كورىنەدى. اتالعان كلۋبتار جاقسى ناتيجە كورسەتسە, ءبىرىنشى كەزەكتە بىلىكتى باپكەر مەن لەگيونەرلەردىڭ ارقاسى.
كەيدە كلۋبتارىمىز 2-3 ميلليون دوللارعا ءبىر لەگيونەر ساتىپ العانشا, ينفراقۇرىلىمدى جاقسارتسا عوي دەپ ارماندايسىڭ. ماسەلەن, چەمپيوناتتىڭ سوڭعى ءۇشىنشى تۋرىنداعى التى ويىننىڭ تەڭ جارتىسى استانادا ءوتتى. («استانا» – «اقجايىق», «وقجەتپەس» – «توبىل», «شاحتەر» – «قايسار»). قالعان ءۇش ماتچتىڭ قايدا بولعانىن تىپتەن ايتۋعا ۇيات. «اقتوبە» مەن «ورداباسى» مەكتەپتىڭ الاڭىندا وينادى. «تاراز» الماتىنىڭ «قايرات» كومانداسىن «ۇلان» ستاديونىندا قابىلداسا, «اتىراۋ» مەن «ەرتىس» ءجيى سىنعا ۇشىرايتىن «سۋدرەمونتيكتە» كەزدەستى. جىلدا كوكتەمدەگى جاعداي وسى. وعان تەمىرتاۋ مەن زاتوبول قالالارىن قوسۋعا بولادى. جيىرما بەس جىلدا جالعىز ستاديون سالدىق. ءبىزدىڭ باسشىلار ستاديون دەگەن مىندەتتى تۇردە 30-40 مىڭ ادامعا ارنالعان بولۋ كەرەك دەپ ويلايتىن سەكىلدى. قازاقستاننىڭ جاعدايىندا 8-10 مىڭ كورەرمەن وتىراتىن ستاديوندار دا جەتكىلىكتى. باستىسى, الاڭى قولايلى, ۋەفا تالاپتارىنا ساي بولسا بولعانى. ءتىپتى جاڭادان ستاديون سالماي-اق, بۇرىنعى الاڭداردى جوندەپ, توسەنىشتەرىن اۋىستىرىپ, جارىعىن وڭداپ قويسا دا جەتىپ جاتىر ەدى عوي. ەشقانداي جاعداي جاسالماعان سوڭ, فۋتبولشىلاردان ناتيجەنى قالاي تالاپ ەتەمىز؟ ەۋروپادان كەلگەن كەز كەلگەن فۋتبولشى مەن باپكەرلەردەن سۇحبات الا قالساڭىز, وسى پروبلەمانى ايتا جونەلەدى.
ۇلىستىڭ ۇلى كۇنىندە قازاقستان مەن كيپر قۇرامالارى جولداستىق كەزدەسۋ وتكىزدى. بۇل الەكساندر بوروديۋكتىڭ باس باپكەر رەتىندە دەبيۋتتىك ماتچى بولاتىن. ويىندى اسىعا كۇتتىك. بىراق بىردە-ءبىر ترانسلياتسيا جوق. تەلەارنا تۇرماق, عالامتورداعى سايتتاردىڭ ءوزى كورسەتپەدى. Youtube جەلىسىن قايتا-قايتا اقتارۋمەن ۋاقىتىمىز ءوتتى. وسىنداي قاراپايىم ماسەلەلەردى رەتكە كەلتىرمەسەك, وتاندىق فۋتبولدىڭ دامىعانىن جاقىن ارادا كورمەيتىن شىعارمىز.
ايتپاقشى, كيپر قۇراماسىمەن كۇش سىناسقان ءبىزدىڭ فۋتبولشىلارىمىز 1:3 ەسەبىمەن جەڭىلىپ قالدى. ويىندا تاڭات نوسەرباەۆ سوققان جالعىز دوپقا الاڭ يەلەرى تاراپىنان نەستوراس ميتيديس, فانوس كاتەلاريس جانە ديميتريس حريستوفي ءۇش گولمەن جاۋاپ بەردى.
كەشە كەشكىسىن بەت قاتتالىپ جاتقاندا قازاقستان قۇراما كومانداسى ەرەۆاندا 2018 جىلعى الەم چەمپيوناتىنىڭ ىرىكتەۋ كەزەڭى اياسىندا ارمەنيا اياق دوپ شەبەرلەرىمەن كۇش سىناستى.
بەك تولەۋوۆ,
جۋرناليست
استانا
