ورتا سالماقتا WBO نۇسقاسى بويىنشا الەم چەمپيونى بيللي دجو سوندەرس (24-0, 12كو) ءدال وسى سالماقتاعى WBA (Super), IBO, WBC جانە IBF بەلبەۋلەرىنىڭ يەسى قازاقستاندىق گەننادي گولوۆكينگە (37-0, 33 كو) قارسى ءوتۋى مۇمكىن جەكپە-جەگى جايلى وي ءبولىستى.
«كەلىسسوزدەر جونىندە ءبىراز اقپارات وقىدىم. مەن ەشنارسەگە قارسى ەمەسپىن. بۇل ايقاستا ماسەلە اقشادا ەمەس. بۇل كەشتەن تاباتىن تابىسىمنىڭ سوڭعى تيىنىنا دەيىن قالدىرماي اكەمە بەرەمىن. ءوزىم اقشاعا ءزارۋ ەمەسپىن. مەن تەك شارشى الاڭعا شىعىپ, ءوز كۇشىمدى دالەلدەگىم كەلەدى. الەمنىڭ مەن تۋرالى قاتە پىكىردە ەكەنىن كورسەتكىم كەلەدى.
مەن گولوۆكيننىڭ دجەيكوبسپەن جەكپە-جەگىن كەيىنىرەك كوردىم. قازاقستاندىق بوكسشىنى جەڭە الاتىنىما سەنىمدىمىن. ول ءالى مەن سياقتى مىقتى بوكسشىمەن جۇدىرىقتاسپاعانىنا سەنىمدىمىن. وعان قالاي توتەپ بەرۋ كەرەك ەكەنىن جاقسى بىلەمىن. ونىڭ قيمىل-قوزعالىسىنا قاراپ قانداي ءادىس قولداناتىنىڭىزدى جىلدام ويلاۋىڭىز كەرەك», – دەپ جازادى espn.com.
سونىمەن قاتار, ول گەنناديدىڭ كەزدەسۋ جونىندەگى كەلىسىمشارتتى تەزىرەك ۇسىنۋى كەرەكتىگىن دە ايتتى. سەبەبى, قاجەتتى دەڭگەيىنە جەتۋ ءۇشىن ءارى ارىقتاۋى ءۇشىن ۋاقىت كەرەك.
«مەن وتكەن جىلى تەك ءبىر-اق رەت جەكپە-جەك وتكىزدىم. ال قازىر مىنە, ءساۋىر ايى دا بولىپ قالدى. بارىنە دايىن بولۋىم كەرەك. قازىر شامامەن ءتورت كيلوگرامم ارتىق سالماعىم بار. ءبىراز ۋاقىتىمدى جاتتىعۋعا ارناۋىم قاجەت. ەگەر گەننادي مەنىمەن قولعاپ تۇيىستىرگىسى كەلسە, ۋاقىت جوعالتپاي تەزىرەك كەلىسىمشارتىن ۇسىنسىن», – دەدى بيللي دجو سوندەرس.
ايتا كەتەيىك, قازاقستاندىق بوكسشىنىڭ كەلەسى قارسىلاسى ءدال وسى بيللي دجو سوندەرس بولاتىنى حابارلانعان. ال ولاردىڭ بوكس كەشى قازاقستاندا ءوتۋى مۇمكىن.
