كونفەرەنتسيانى ۇيىمداستىرۋعا قازاقستاننىڭ اۆسترياداعى ەلشىلىگى, اۆستريانىڭ ەۋروپا ىستەرى, ىقپالداستىق جانە حالىقارالىق قاتىناستار جونىندەگى فەدەرالدىق مينيسترلىگى, سونىمەن قاتار, اۆستريا-قازاقستان قوعامداستىعى مۇرىندىق بولدى. جيىنعا قوعامدىق-ساياسي سالانىڭ, بۇقارالىق اقپارات قۇرالدارىنىڭ وكىلدەرى, اۆستريا سىرتقى ىستەر مينيسترلىگىنىڭ قىزمەتكەرلەرى, ديپلوماتيالىق كورپۋس وكىلدەرى, «اۆستريا-ورتالىق ازيا» پارلامەنتتىك توبىنىڭ ءمۇشەلەرى, حالىقارالىق ۇيىمدارداعى قازاقستان وكىلدەرى, قازاقستاننىڭ قۇرمەتتى كونسۋلدارى قاتىستى. سونىمەن قاتار, سول ەلدەگى قازاق دياسپوراسىنىڭ وكىلدەرى, جوعارى وقۋ ورىندارىندا ءبىلىم الىپ جاتقان ستۋدەنت جەرلەستەرىمىز دە شارادان سىرت قالعان جوق.
كونفەرەنتسيا ەكى ەلدىڭ مەملەكەتتىك ءانۇراندارىن ورىنداۋدان باستالدى. جينالعان قاۋىم الدىندا ءبىرىنشى بولىپ ءسوز العان ديپلوماتيالىق اكادەميا ديرەكتورى حانس ۆينكلەر قازاقستاننىڭ تاۋەلسىزدىك جىلدارىندا قول جەتكىزگەن تابىستارىن جوعارى باعالادى. ول ەكى ەل اراسىندا ديپلوماتيالىق قارىم-قاتىناس ورناعاننان بەرگى ارالىقتاعى قازاقستان مەن اۆستريا بايلانىستارىنىڭ دامۋ بارىسىن باياندادى.
القالى جيىندا اۆستريا پارلامەنتى ۇلتتىق كەڭەسىنىڭ ەكىنشى پرەزيدەنتى كارلحاينتس كوپف, قازاقستاننىڭ اۆسترياداعى ەلشىسى قايرات سارىباي, اۆستريا-قازاقستان قوعامىنىڭ پرەزيدەنتى, اۆستريا ەكونوميكالىق پالاتاسىنىڭ ۆيتسە-پرەزيدەنتى ريحارد ششەنتس, اۆستريانىڭ قازاقستاندا العاشقى ەلشىسى بولعان ۋرسۋلا فارينگەر بايانداما جاسادى. ولار تاۋەلسىزدىك جىلدارىندا ەكونوميكا, ساياسات, ءبىلىم بەرۋ جانە مادەنيەت سالالارىندا قازاقستاننىڭ بيىك بەلەستەردى باعىندىرعانىن, قازاقستان-اۆستريا ەكىجاقتى قاتىناستارىنىڭ ءوزارا ءتيىمدى ارنادا قانات جايىپ كەلە جاتقانىن تىلگە تيەك ەتتى.
اۆستريا پارلامەنتى ۇلتتىق كەڭەسىنىڭ ەكىنشى پرەزيدەنتى كارلحاينتس كوپف قازاقستان پرەزيدەنتى نۇرسۇلتان نازارباەۆتىڭ حالىقارالىق باستامالارى تۋرالى ايتا كەلىپ: «دەموكراتيالىق دامۋ – بىرتىندەپ جۇرۋگە ءتيىس قۇبىلىس. اۆستريا مەن قازاقستان ءوزى ورنالاسقان ايماقتاردا تۇراقتىلىقتىڭ فاكتورى بولىپ تابىلادى. سونىمەن قاتار, بۇل ەكى مەملەكەت بۇكىل عالامشاردا بەيبىتشىلىك پەن قاۋىپسىزدىكتى نىعايتۋعا سۇبەلى ۇلەس قوسىپ كەلە جاتىر», – دەدى كارلحاينتس كوپف.
سپيكەرلەردىڭ پايىمداۋىنشا, الدىڭعى قاتارلى تەحنولوگيالارعا يە اۆستريالىق فيرمالاردىڭ بەس ينستيتۋتتىق رەفورمانى ءجۇزەگە اسىرۋ جونىندەگى «100 ناقتى قادام» ۇلت جوسپارىن ءىس جۇزىنە اسىرۋعا, سونداي-اق ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا كورسەتىلگەن مىندەتتەردى ورىنداۋعا ىقپال ەتۋگە تولىق مۇمكىندىگى بار.
جاڭعىرمالى ەنەرگيا سالاسىنداعى كومپانيالار ءۇشىن استانادا وتەتىن ەكسپو-2017 حالىقارالىق كورمەسىنە قاتىسۋ قوسىمشا ءمۇمكىندىك تۋعىزىپ وتىر. وسىعان بايلانىستى ەكونوميكالىق پالاتا ۆيتسە-پرەزيدەنتى ءارى اۆستريانىڭ ەكسپو-2017 بويىنشا ۇلتتىق كوميسسارى ر.شەنتس ءوز ەلىنىڭ ساياسي جانە ىسكەرلىك ورتاسىنىڭ بەلدى وكىلدەرى ەلوردادا اۆستريانىڭ ۇلتتىق كۇنى, قازاقستان-اۆستريا ىسكەرلىك كەڭەسىنىڭ وتىرىسى, تەحنولوگيا كۇنى جانە باسقا دا شارالاردى وتكىزۋ ارقىلى حالىقارالىق كورمەگە بەلسەنە اتسالىسۋعا دايىن ەكەنىن ايتتى.
