ءيا, بۇعان دەيىن حابارلاعانىمىزداي بۇگىنگى كۇنى ورال ءوڭىرىنىڭ تۇرعىندارى توتەنشە جاعداي احۋالىن باستارىنان كەشۋدە. جايىقتىڭ بويىن جايلاعان قالىڭ ەلدىڭ كۇندىز-ءتۇنى ۇيقى كورمەي جۇرگەنىنە دە ون كۇنگە تايادى. قازىر رەسپۋبليكانىڭ توتەنشە جاعدايلار, ىشكى ىستەر جانە قورعانىس مينيسترلىكتەرىنە قاراستى قۇرىلىمداردىڭ بارلىق كۇش-جىگەرى مەن تەحنيكالىق مۇمكىندىكتەرى تاسقىن سۋدى اۋىزدىقتاۋعا, وعان توسقاۋىل قويۋعا باعىتتالعان.
ايتەۋىر, كوڭىلگە مەدەۋ تۇتارلىق ءجايت جايىق وزەنىندەگى جەتى مەتردەن اسىپ تۇسكەن سۋ دەڭگەيى كەشە كۇندىزگى ساعات ەكىدەگى ءمالىمەت بويىنشا وتىز ءۇش سانتيمەترگە ءتومەندەدى. بۇل دەرەكتىڭ ءوزى الدا كۇتىلگەن زاردابى زور قاۋىپتىڭ ءسال دە بولسا سەيىلگەنىن كورسەتەدى. سونداي-اق رەسەيدەگى ساراتوۆ وبلىسى دارعاش اۋدانى اۋماعىنان باستاۋ العان كوكتەمگى جويقىن جايىلما سۋ قاراوزەن ارقىلى جالپاقتال اۋىلىنا قاۋىپ ءتوندىردى. كازتالوۆ اۋدانى جۇرتشىلىعى ونىمەن ون كۇن ارپالىسىپ تاسقىن سۋدى قاراسۋ اۋىلى باعىتىنا قاراي بۇرا الدى.
ال ءدال بۇگىنگى كۇنى وبلىستاعى ەڭ قاۋىپتى نۇكتە اقجايىق اۋدانىنداعى العاباس, قاراعاي جانە بەسوبا اۋىلدارى بولىپ وتىر. اتالعان ەلدى مەكەندەر جان-جاقتان قورشاعان جويقىن تاسقىن سۋدىڭ ورتاسىندا قالدى. قاۋىپ-قاتەر وشاعىنداعى تۇرعىنداردى قۇتقارۋ جۇمىستارىمەن توتەنشە جاعدايلار مينيسترلىگىنىڭ مي-8 تىكۇشاقتارى اتقارۋدا. وعان توتەنشە جاعداي ۆيتسە-ءمينيسترى ۆالەري پەتروۆ باسشىلىق ەتۋدە. وبلىستاعى جەر بيىگى تاسقالا اۋدانىندا تىركەلگەن. بۇل ءوڭىردى دە سۋ قاپتاعانىن بۇعان دەيىن جازعان ەدىك. سۋ بيىكتەن ەڭىسكە قاراي اعاتىنى ايتپاسا دا بەلگىلى. سول بيىگىمىز – تاسقالا, ەڭىسىمىز العاباس بولىپ تۇر قازىر.
بۇل ايماققا كەشەلى-بۇگىن جەر قازاتىن, توپىراق ۇيەتىن قۋاتتى تەحنيكالاردىڭ ۇلكەن كولونناسى اتتاندىرىلدى. ءويتكەنى, جەرگىلىكتى تۇرعىندار قولدان جاساعان ءبوگەتتەردى جويقىن سۋ الدى-ارتىنا قاراتپاي شايىپ كەتىپ جاتىر. جوعارىدان, ياعني تاسقالا اۋدانى تۇسىنان اعىنداعان سۋ مولشەرىنىڭ ازاياتىن ءتۇرى كورىنبەيدى. كەرىسىنشە كوبەيىپ بارادى.
كەشە وبلىس اكىمدىگىنىڭ ءماجىلىس زالىندا وتكەن جەدەل كەڭەستە وبلىستىق ىشكى ىستەر دەپارتامەنتىنىڭ باستىعى ارمان جالمۇحانبەتوۆ سوت-مەديتسينالىق ساراپتاۋ ناتيجەلەرى بويىنشا سۋعا باتىپ كوز جۇمعان ەكى ەر ادامنىڭ جانسىز دەنەلەرى «زەنيت» جانە «يابلونكا» ساياجاي ۋچاسكەلەرىنەن تابىلعانىن ءمالىمدەدى. قايتىس بولعان ازاماتتاردىڭ ەكەۋىنە دە توتەنشە جاعدايلار دەپارتامەنتى قىزمەتكەرلەرى الدا كۇتىلگەن تاسقىن سۋ اۋماعىندا قالۋعا مۇلدەم بولمايتىنى جونىندە الدىن الا ەسكەرتۋلەر جاساعان. ءارى بۇل ارادان شۇعىل كەتۋلەرىن تالاپ ەتكەن. سوعان قاراماستان ولار ساياجايلارىنان قوزعالماعان. ونىڭ ءبىرىنشىسى ءوز ءمۇلكىن كۇزەتىپ قالۋ ءجايتىن العا تارتسا ەكىنشىسى ساياجايداعى كەپتەرلەرىن ازىقتاندىراتىنىن ايتقان. قازىرگى كۇنى بۇل ازاماتتاردىڭ قازا بولۋىنىڭ انىق-قانىعى ودان ءارى انىقتالىپ زەرتتەلۋ ءۇستىندە. بۇل جونىندەگى ءتيىستى دەرەكتەردى قوسىمشا حابارلايتىن بولامىز, دەدى جەرگىلىكتى ىشكى ىستەر ۆەدومستۆوسىنىڭ باسشىسى.
ورال قالاسى مەن ونىڭ ماڭىندا تاسقىن سۋ ورتاسىندا يەسىز قالعان ۇيلەر مەن كوتتەدجدەردىڭ ءجانە ساياباقتاردىڭ الدى قۇلاپ تا جاتىر. كەلگەن سۋ ەشقايدا اقپايتىن تۇيىق سۋعا اينالۋدا. مىنە, وسى سۋ ءۇيلەردىڭ تەرەزەلەرىنىڭ جوعارعى جاقتاۋلارىنان تومەندەيتىن ءتۇرى كورىنبەيدى. بۇل كورىنىستەر وڭىردە سانيتارلىق-ەپيدەميولوگيالىق جاعدايلاردىڭ كۇردەلەنىپ كەتۋىنە اكەلىپ سوقتىرىپ جۇرمەي مە؟ كوڭىلدى كۇپتى قىلعان وسى ساۋالدى دەنساۋلىق ساقتاۋ مينيسترلىگى مەملەكەتتىك سانيتارلىق-ەپيدەميولوگيالىق قاداعالاۋ كوميتەتى باتىس قازاقستان وبلىسى بويىنشا دەپارتامەنتىنىڭ ديرەكتورى سەرىكباي يمانقۇلعا قويعان ەدىك.
– قازىر وڭىردەگى سانيتارلىق-ەپيدەميولوگيالىق احۋال قالىپتى دەۋگە بولادى. بۇگىنگى كۇنى تاسقىن سۋدىڭ كەلۋىنە بايلانىستى قانداي دا ءبىر بولماسىن جۇقپالى اۋرۋلار تۇرلەرى تىركەلگەن جوق. دەگەنمەن, جاز شىعىپ كەلەدى. جازبەن بىرگە شىبىن-شىركەيلەر مەن ماسا قاپتايتىنىن دا جاقسى بىلەمىز. مۇنداي كورىنىس اسىرەسە سۋ مول بولعان جىلدارى ءجيى كەزدەسەدى. سول كەزەڭگە دە الدىن الا ءازىرلىكتەر جاساۋ ءۇستىندەمىز. ءدال ءبۇگىنگى كۇنى ءبىز ءاسىرەسە اۋىز سۋ ساپاسىن ءار كۇن سايىن جان-جاقتى تەكسەرىپ وتىرۋعا ءمان بەرىپ وتىرمىز. وسى ماقساتتا از ۋاقىتتىڭ ىشىندە 300 رەت ءوڭىردىڭ ءار ايماعىنان سىنامالار الىندى. تاسقىن سۋدىڭ زاردابىن شەگىپ باسپاناسىز قالعان مىڭداعان تۇرعىندار ورال قالاسىنداعى مەكتەپتەر مەن ارنايى بولىنگەن عيماراتتارعا ورنالاستىرىلدى. ولارعا بەرىلەتىن تاماقتىڭ ساپاسىن سانيتارلىق ءدارىگەرلەر ءجىتى قاداعالاپ وتىر.
تەمىر قۇسايىن.
باتىس قازاقستان وبلىسى.
______________________
سۋرەتتەردى تۇسىرگەن: رافحات حالەلوۆ.
