مۇگەدەك مۇڭى

وسىدان التى جىل بۇرىن كولىگى بۇزىلىپ, اقىرعان ايازدى اقپاندا دالادا قالىپ, ەكى اياقتىڭ تىزەدەن تومەن بولىگىنەن جانە قولدارىنىڭ جەتى ساۋساعىنان ايىرىلعان الەكسەي رۋدەنكونىڭ دارىگەرلەردەن كوڭىلى قالعانى سونشالىق, ايتارعا ءسوزى, اتارعا وعى جوق. مۇگەدەك جان مۇڭىما ەشكىم قۇلاق اسار ەمەس دەپ ناليدى. ايتۋىنشا, ءتيىستى قۇجاتتاردى ۋاقتىلى رەسىمدەمەۋ كەسىرىنەن مۇگەدەكتىگى ءۇشىن تيەسىلى 46 مىڭ تەڭگە جاردەماقى قولىنا تيمەي قالعان. وعان ۋچاسكەلىك دارىگەردى كىنالايدى. ءبىر اي بويى جالعىز تابىس كوزىمنەن قاعىلدىم. مۇنداي جاۋاپسىز ادامداردى قىزمەتتەن قۋ كەرەك, دەيدى ونسىز دا قاباعى قاتۋلى كەمباعال جان اشۋعا بوي الدىرىپ. مەيرامحانالاردىڭ بىرىندە قويماشى بولىپ ىستەگەن ول عارىپتىككە ۇشىراعاننان كەيىن ايەلى كەتىپ قالىپتى. جالعىز ۇلى دا قارايلاسپايتىن كورىنەدى. ونى بۇلاردىڭ قىلىعى ەمەس, جەرگىلىكتى شەنەۋنىكتەردىڭ ءومىردىڭ اۋىر تاۋقىمەتىن تارتقان كەمباعالداردىڭ تاعدىرىنا دەگەن نەمكەتتى كوزقاراسى اشىندىراتىن ءتارىزدى. «اياق-قولىم ەندى ءوسىپ شىقپايدى عوي. ولاي بولسا, مەنى دارىگەرلىك تەكسەرۋدەن وتكىزىپ, قايتا-قايتا ساندالتقانشا ومىرلىك مۇگەدەكتىككە نەگە شىعارمايدى», دەپ شىرىلداعان داۋىسى ساي-سۇيەكتى سىرقىراتقانمەن, وبلىستىق ەڭبەك جانە الەۋمەتتىك قورعاۋ, كوشى-قون دەپارتامەنتى باسشىسىنىڭ ورىنباسارى جانار نۇربەك اتالعان جايتتى زاڭناما شەڭبەرىندە قاراستىراتىنىن ايتادى. – 62 جاستاعى ازاماتتىڭ جاعدايىمەن جاقسى تانىسپىز. ونىڭ مۇشكىل ءحالى ءبىزدى دە بەيجاي قالدىرا المايدى. قولىمىزدان كەلگەنشە جاردەمدەسىپ جاتىرمىز. 2011 جىلى اياعىنا وتا جاسالىپ, ءبىرىنشى توپتاعى مۇگەدەكتىك بەرىلگەن. 2012 جىلى ەكىنشى توپقا ومىرلىك مۇگەدەكتىك الدى. وسىدان ەكى جىل بۇرىن ءبىرىنشى توپتاعى مۇگەدەككە اۋىستىرىلدى. بۇل تالاپتار مەديتسينالىق-الەۋمەتتىك ساراپتاما قورىتىندىلارى بويىنشا جۇزەگە اسىرىلدى. اناتوميالىق كەمىستىكتەر تۋرالى ەرەجەدەن اۋىتقۋعا ەش قاقىمىز جوق, – دەيدى باسقارما باسشىسى. دارىگەرلەردىڭ شەشىمىمەن الەكسەيگە بىلتىر اياعىنا وتا جاساتۋعا كەڭەس بەرىلگەن. الايدا, ول ودان دا, الەۋمەتتىك قىزمەتكەر كومەگىنەن دە باس تارتىپ وتىر. تالابى – ومىرلىك مۇگەدەكتىككە كوشىرۋ. ونى بەلگىلەۋدىڭ ءوز ءتارتىبى بار ەكەنىن, ناۋقاس بەلگىلى ۋاقىت ارالىعىندا ديناميكالىق باقىلاۋعا الىناتىنىن تۇسىنگىسى كەلمەيدى. سودان كەيىن عانا مەديتسينالىق-الەۋمەتتىك ساراپتاما قورىتىندىسى بويىنشا ومىرلىك مۇگەدەكتىكتى بەرۋ-بەرمەۋ, نە باسقا توپقا اۋىستىرۋ ماسەلەسى قارالىپ, شەشىم قابىلدانادى. ءومىر ەسقالي, «ەگەمەن قازاقستان» سولتۇستىك قازاقستان وبلىسى