بروندى «ارلان» دوڭگەلەكتى ماشيناسى سىناقتان ءوتتى

ەلىمىزدىڭ قارۋلى كۇشتەرى قاتارىنداعى قۇرلىق اسكەرلەرىنىڭ قارۋ-جاراق قورىنا كەلىپ تۇسكەن جاڭا وتاندىق ءونىم – بروندى «ارلان» دوڭگەلەكتى ماشيناسى سىناقتان ءوتتى. «شىعىس» پوليگونىندا قازاقستاندىق بروندى كولىكتىڭ اسكەري مۇمكىندىكتەرى قىسقى قاتال اۋا رايى جاعدايىندا تەكسەرىلدى. سىناق بارىسىندا اسكەري قىزمەت­شىلەر بروندى ماشينامەن ەڭ الدىمەن قالىڭ قارمەن ءجۇرىپ ءوتتى. مۇنى قورعا­نىس مينيسترلىگىنىڭ تەرروريزممەن كۇرەس دەسانتتىق توبى جۇزەگە اسىر­دى. ءتاجىري­بەدە وتاندىق «كاە» كاسىپورنى­نىڭ «سارپ» اسكەري ءمودۋلىنىڭ اتقىش جيىنتىعى پايدالانىلدى. ياعني, «ارلان» كالاشنيكوۆ اۆتوماتى, درا­گۋنوۆ مىلتىعى جانە وسۆ-96 ءىرى كاليبرلى مىلتىعىمەن اتقىلانىپ, برون­دى كولىكتىڭ بەرىكتىگى تەكسەرىلدى. ءناتي­جەسىن­دە, وتاندىق ءونىمنىڭ جەكە قۇ­رام­نىڭ قاۋىپسىزدىگىن قامتاماسىز ەتەتىن, وتە جوعارى ساپالى, مانەۆرلى جانە مىقتى قورعانىسى بار ەكەندىگى دالەلدەندى. ايتا كەتۋ كەرەك, «ارلان» – بۇل ميناعا قارسى قورعانىسى كۇشەيتىل­گەن كوپ باعىتتى بروندى دوڭگەلەكتى تەح­نيكا. مۇنداي ماشينالاردان وڭاي­لىقپەن وق وتپەيدى ءارى جارىلعىش زات­قا توتەپ بەرە الادى. سالماعى 16 تون­نالىق بروندى كولىك «ارلاننىڭ» جىل­دامدىعىنا كەلەر بولساق, ساعاتىنا 100 شاقىرىم قاشىقتىقتى باسىپ وتە الادى. ءتىپتى, -50⁰س-تان +50⁰س-قا دەيىنگى تەمپەراتۋرادا دا بۇزىلماي جۇرە بەرەدى. «ارلاننىڭ» جان-جاقتى ەلەكتروندى-وپتيكالىق جۇيەسىنىڭ اسكەري ءمودۋلى كەرەمەت جاساقتالعان. مامانداردىڭ ايتۋىنشا, ول جىلۋ بەرەتىن كامەرامەن, كۇندىزگى كورۋ كامەراسىمەن, لازەرلىك الىستى ولشەۋشى قۇرالمەن, كەز كەلگەن كليماتتىق جاعدايدا, تۇنگى جانە كۇندىزگى ۋاقىتتا باقىلاۋعا, بارلاۋعا جانە كوزدەپ اتۋعا مۇمكىندىك بەرەدى ەكەن. قازاقستان قارۋلى كۇشتەرىنىڭ تالاپ­­تارى مەن ۇسىنىستارىن ەسكەرگەن «قازاقستان پاراماۋنت ينجينيرينگ» جشس-ءنىڭ قۇراستىرۋشى بيۋروسىنىڭ جەرگىلىكتى ماماندارى «ارلان» بروندى ماشيناسىن جاساپ, وتاندىق ءونىم رەتىندە تۇڭعىش رەت شىعارىپ وتىر. ونى تەحنيكالىق سىناۋ ساتىنە جۋرناليستەر ارنايى شاقىرىلدى. ال «ارلان» سىناعىنا قاتىسقان «كاە» جشس – تۇنگى, كۇندىزگى كورۋ كامەرالارىن, بارلاۋ مودۋل­دەرىن, اسكەري راديوبايلانىس قۇرالدارىن جاساي­­تىن ەلىمىزدەگى بىردەن-ءبىر كاسىپ­ورىن. «قازاق­ستان پاراماۋنت ينجي­نيرينگ» بولسا, اسكەري بروندى دوڭگە­لەكتى كولىكتەردىڭ ءتۇر-ءتۇرىن شىعا­را­تىن ورتا­لىق ازياداعى ەڭ ءىرى كاسىپ­ورىن بولىپ تابىلا­دى. اتالعان كاسىپ­ورىن­داردىڭ بىرىككەن ءىس-قيمىل­دارى­نىڭ ناتيجەسىندە «ارلان» بروندى تەحنيكاسى بۇگىندە سىناقتان ءساتتى ءوتتى. راۋشان نۇعمانبەكوۆا, جۋرناليست سەمەي