كوكتەمگى سۋ تاسقىنىنىڭ الدىن الۋعا, ودان قۇتقارۋعا دايىندىق رەتىندەگى رەسپۋبليكالىق شارا بيىل قوستانايدا ءوتتى. وعان قازاقستان رەسپۋبليكاسى ىشكى ىستەر ءمينيسترىنىڭ ورىنباسارى يۋري يلين كەلىپ, قوستاناي وبلىسىنىڭ اكىمى ارحيمەد مۇحامبەتوۆپەن كەزدەستى. كەزدەسۋ بارىسىندا ءوڭىردىڭ كوكتەمگى سۋ تاسقىنىنا دايىندىق ماسەلەلەرى تالقىلاندى. ولار توتەنشە جاعدايلار دەپارتامەنتىنىڭ قۇتقارۋ بولىمشەلەرىن ارالادى. وبلىستا بۇل شاراعا 201 ادام, 75 تەحنيكا قاتىستى.
رەسپۋبليكالىق شارانىڭ ەكىنشى كۇنى قوستاناي قالاسى توڭىرەگىندەگى, توبىل وزەنىنىڭ جاعاسىنداعى بىرنەشە جەردە وقۋ-جاتتىعۋلار ءوتتى. دايىندىق شاراسى شەڭبەرىندە سۋ تاسقىنى كەزىندە بولىپ قالۋى ىقتيمال وقيعالاردىڭ الدىن الۋ نەمەسە قۇتقارۋ تاسىلدەرى جۇزەگە اسىرىلدى. سولتۇستىك اۋماقتىق اەروموبيلدىك جەدەل قۇتقارۋ وتريادى توبىل وزەنىندە مۇز استىنا كەتكەن ادامداردى قۇتقارۋدىڭ, ماشينانى شىعارىپ الۋدىڭ ءتورت كورىنىسىن كورسەتتى. قۇتقارۋشىلار مۇز جارۋ, سۋ تاسقىنىنان زارداپ شەككەندەرگە كومەك, قۇتقارۋ كەزىندەگى ارنايى تەحنيكالاردى پايدالانۋدى جۇرت نازارىنا ۇسىندى.
وبلىستىڭ سولتۇستىك جاعىنداعى ۇزىنكول اۋدانىندا قاردىڭ قالىڭدىعى 43 سانتيمەترگە جەتەدى. سونىمەن قاتار, وسىعان ۇقساس كورىنىس قارابالىق, قوستاناي, ناۋىرزىم, قاراسۋ جانە اۋليەكول اۋداندارىندا دا بايقالادى. وبلىستىق توتەنشە جاعدايلار دەپارتامەنتىنىڭ باسقارما باسشىسى پودپولكوۆنيك رۋسلان ورىنبەكوۆتىڭ ايتۋىنشا, وڭىردە قارعىن سۋدا قالۋى مۇمكىن 59 ەلدى مەكەن باقىلاۋعا الىندى. وبلىستا قازىر كوكتەمگى سۋ تاسقىنىنا قارسى قيمىل ءۇشىن 829 تەحنيكا, 129 ءجۇزۋ قۇرالدارى, 263 سۋ سورعىش تەحنيكا, 26700 ىدىس-قاپ, 10 مىڭ توننادان استام ينەرتتى ماتەريالدار, 97 توننا جانار-جاعار ماي دايىن.
ءنازيرا جارىمبەتوۆا,
«ەگەمەن قازقستان»
