22-ناۋرىزدا “ەگەمەن قازاقستان” گازەتىنىڭ جاڭا سايتى ىسكە قوسىلادى. بۇل تۋرالى بۇگىن استاناداعى ۇلتتىق كىتاپحانادا “ەگەمەن قازاقستان” گازەتى قولعا العان جوبالاردى تانىستىرۋ بارىسىندا حابارلاندى.
جيىن بارىسىندا باسىلىم جەتەكشىسى دارحان قىدىرالى سايتتى جەتىلدىرۋ جۇمىستارىنىڭ سوڭعى التى ايداعى جەتىستىكتەرىنە توقتالدى. “اقپاراتتار تاسپاسىنان بەرىلەتىن ماتەريالدار سانى ءتورت ەسە كوبەيدى. ينتەرنەت-رەداكتسيا دەربەس باسىلىم رەتىندە ءوزى دايىندايتىن ساپالى اقپاراتتاردى كوبەيتۋگە باسىمدىق بەردى. ول ماقالالاردىڭ كەيبىرى وتىز مىڭعا دەيىن وقىلىپ, وقىرماندار اراسىندا ۇلكەن رەزونانس تۋعىزدى. قازاقستاندىق سايتتاردىڭ جالپى رەيتينگىندە egemen.kz وتكەن جىلدىڭ ءبىرىنشى جارتىسىندا 140-ورىندا تۇرسا, قازىر العاشقى 50-گە كىرەدى. ال قازاقتىلدى ينتەرنەت باسىلىمدار اراسىندا العاشقى بەستىكتە. سونىمەن قاتار توتە جازۋ نۇسقاسىن جەتىلدىرۋ ارقاسىندا شەتەلدەردەگى قانداستارىمىزدىڭ سايتقا كىرۋى جيىلەدى”, دەدى باسىلىم باسشىسى.
باسىلىمنىڭ جاڭا ينتەرنەت نۇسقاسىنىڭ تەحنيكالىق ەرەكشەلىكتەرىن “ەگەمەن قازاقستاننىڭ” قىزمەتكەرى, SEO-ينجەنەر ەربول سەرىكباي تانىستىردى. جاڭا سايتتا 2005 جىلدان بەرگى ماتەريالدار ءبىر جۇيەگە توپتاستىرىلادى. ەندى قاجەت ماتەريالدى تابۋ ءۇشىن ءار كەزەڭدە جاسالعان سايتتارعا كىرۋ قاجەت ەمەس. بارلىق اقپاراتتى ءبىر سايتتان تابۋعا بولادى.
جاڭا نۇسقاداعى سايتتا اۋديو جانە ۆيدەو ماتەريالدارعا كوبىرەك ورىن بەرىلەدى. مىسالى, گازەت شولۋشىلارىنىڭ ماقالالارى اۋديوفورماتتا ۇسىنىلادى. ولاردى تىڭداۋعا جانە جۇكتەپ الۋعا مۇمكىندىك بار.
جاڭا پورتالدىڭ ەرەكشەلىگى, «ەگەمەن قازاقستان» گازەتى مەن ۇلتتىق بىرىڭعاي تەستىلەۋ ورتالىعىنىڭ بىرلەسكەن جوباسى نەگىزىندە دايىندىق تەستەرىن ونلاين تاپسىرۋعا بولادى.
سونىمەن قاتار, شەت ەلدەردەن كىرەتىن وقىرماندارعا ىڭعايلى بولۋى ءۇشىن لاتىن جانە توتە جازۋداعى نۇسقا بولادى جانە گازەتتە ءورىستىلدى نۇسقا ىسكە قوسىلادى. “بۇرىن ورىس تىلىندەگى ماتەريالدار قازاقشاعا اۋدارىلسا, ەندى قازاق تىلىندەگى ماتەريالدار ورىسشا جارىق كورىپ, ءورىستىلدى اۋديتورياعا باعىتتالادى”, دەدى گازەت جەتەكشىسى دارحان قىدىرالى.
