"ەگەمەن قازاقستان" گازەتىنىڭ تاڭداۋلى ماقالالارى باسىلىمنىڭ ءجۇز جىلدىعىنا وراي ون تومدىق جيناق بولىپ جارىق كورەدى. بۇل تۋرالى بۇگىن گازەت قولعا العان جوبالاردى تانىستىرۋ بارىسىندا حابارلاندى. ون تومدىق جوباسىنا قاتىسۋشىلاردىڭ ءبىرى نامازالى وماش ۇلى زەرتتەۋ جۇمىستارىن جاساي ءجۇرىپ "ەگەمەن قازاقستاننىڭ" ءارحيۆىن ءۇش رەت قاراپ شىققانىن ايتتى.
"ول نومىرلەر ءتورت جەردە ساقتاۋلى. ءبىراز بەتتەرى جوعالعان, قيىلعان. ال ەندى سول ارحيۆ ەلەكتروندى فورماتقا كوشىرىلسە نەمەسە ول ارحيۆ ون تومدىق كىتاپ بولىپ شىقسا, زەرتتەۋشىلەر ءۇشىن باعا جەتپەس سىيلىق بولعالى تۇر. ويتكەنى, "ەگەمەن قازاقستاننىڭ" ءارحيۆى وتە باي. ونىڭ ءبىر بولىگى توتە جازۋ نۇسقاسىندا, ولاردى كيريلليتساعا كوشىرۋ قاجەت", دەدى نامازالى وماش ۇلى. جيناقتىڭ العاشقى التى توم كەلەسى جىلى شىعادى, ال باسىلىمنىڭ 100 جىلدىعىنا قاراي ون تومدىق تولىعىمەن وقىرمان نازارىنا ۇسىنىلماق.
وسىعان وراي پىكىر بىلدىرگەن سۇلتان ورازالى بۇرىن زەرتتەۋ جۇرگىزۋ بارىسىندا عالىمدار توتە جازۋدان كيريليتساعا اۋدارۋعا وتە كوپ ۋاقىت جۇمساعانىن ايتتى. "ال قازىر ىزدەنگەن ادامعا بۇل ون تومدىق وتە ۇلكەن كومەك بولادى, ءارى عىلىمي جۇمىستاردى جەڭىلدەتەدى. سەبەبى, توتە جازۋدان اۋدارىلىپ باسىلادى", دەدى ول.
جوبا جەتەكشىسى دارحان قىدىرالى "جۇز جىلعى گازەت نومىرلەرىن ون تومعا سىيعىزۋ قيىن جانە بارلىق ماتەريالداردى كىتاپقا كىرگىزۋگە قاجەتتىلىك تە جوق. سوندىقتان ول ماتەريالداردىڭ ىشىندەگى ماڭىزدىلارى تاڭدالادى", دەدى باسىلىم باسشىسى.
