مۇنىڭ ءوزى اقتوبە سەكىلدى رەسپۋبليكامىزدىڭ وندىرىستىك وڭىرلەرىنە تىڭ مىندەتتەر جۇكتەيدى. ءبىز قازىرگى كەزدە جولداۋدا ايتىلعان ماسەلەلەرگە وراي كەشەندى ءىس-شارالار جوباسىن جاساقتاۋعا دەن قويىپ وتىرمىز. «بۇل ءان بۇرىنعى اننەن وزگەرەك» دەگەندەي, جوبانىڭ بۇعان دەيىنگى وسى تەكتەس جوسپارلارمەن سالىستىرعاندا تۇبەگەيلى وزگەشەلىگى بار. باستى سيپاتى جاڭا وندىرىستەرگە كاسىبي ماماندار ازىرلەۋگە باعىتتالعان. وسى ارقىلى كاسىبي ءبىلىم بەرۋ جۇيەسىنە سونى سەرپىن بەرۋگە باعدار ۇستاۋدامىز. تەحنيكالىق ارناۋلى وقۋ ورنىن بىتىرۋشىلەر ناتيجەلى جۇمىسپەن قامتىلماسا, ەسىل ەڭبەك پەن ۋاقىت, مەملەكەت قاراجاتى بوسقا كەتتى دەي بەرىڭىز. ماقساتىمىز – مۇنداي جاعدايعا جول بەرمەۋ. جۇمىسپەن قامتۋ ۇعىمىنىڭ اۋقىمى كەڭ. ءارى وسى ارقىلى جۇمىسسىز ازاماتتاردىڭ تابىسىن مولايتۋعا مۇمكىندىك تۋادى.
وڭىردە بۇل باعىتتا قولعا الىنعان باعدارلامانى ەكى بىردەي وتە قاجەتتى جاعدايدا جۇزەگە اسىرعاندى ءجون كورەمىز. مۇنىڭ ءبىرىنشىسى – ەڭبەك نارىعى مەن ءتيىستى سۇرانىستارعا قاجەتتى مامانداردى دايارلاۋدى كوزدەسە, ەكىنشىسى جۇمىسسىز ازاماتتاردى قىسقا مەرزىمدى كاسىبي وقىتۋدان وتكىزۋدى مۇرات تۇتادى. بۇعان وڭىردەگى ارناۋلى كاسىپتىك ءبىلىم بەرۋ ورىندارىنىڭ مۇمكىندىگى مەن ماتەريالدىق-تەحنيكالىق جاعدايى جەتكىلىكتى. ولار ءارتۇرلى كاسىبي ماماندىقتار مەن بىلىكتىلىك تالاپتارى بويىنشا ازىرلەنەدى. ونىڭ ىشىندە پرەزيدەنت جولداۋىندا ايتىلعان جاڭا كەزەڭ تالاپتارىنا وراي 24 ماماندىقتى ەكى دەڭگەيلى وقىتۋ مودۋلىنە اۋىستىرۋدى ويلاستىرىپ وتىرمىز. مۇنىڭ ءمانىسى – وقۋشى-ستۋدەنت جۇمىسشى ماماندىعىن ەكى نەمەسە ودان دا جوعارى بىلىكتىلىك بويىنشا تەگىن وقي الادى. بۇدان ءارى نە ىستەۋ كەرەكتىگىن ءوزىنىڭ قالاۋى بىلەدى. ءتىپتى, كونكۋرستىق نەگىزدە ورتا بۋىن مامان رەتىندە وقۋىن ودان ءارى جالعاستىرۋعا دا تولىق ەركى مەن قۇقى بار. ءسوزىمىز جالاڭ ءارى قۇرعاق بولماس ءۇشىن, بۇعان ءبىر مىسال كەلتىرە كەتۋگە بولادى.
ايتالىق, اقتوبە ونەركاسىپتىك تەحنولوگيالار مەن باسقارۋ كوللەدجىندە توكارلىق ءىس پەن مەتالل وڭدەۋ ماماندىعى بويىنشا توكار مەن ستانوكشى دايىندالادى. ياعني, الداعى كەزدە ءمودۋلدى باعدارلاما بويىنشا مۇنداي ماماندىقتاردىڭ ءورىسى ودان ءارى وسە تۇسەدى. الدىمىزدا تۇرعان مىندەت اۋقىمدى دا كۇردەلى. وسىعان وراي بەيىندى باعدارلامالاردى ءوندىرىس ورىندارىمەن بىرلەسىپ ءارى كەڭەسە وتىرىپ تالداۋعا باسا ءمان بەرۋدەمىز. وبلىستا ەكونوميكا مەن جاڭا بيزنەس جوبالارىنىڭ كەڭىنەن قانات قاعۋىنا وراي, كادرلار رەسۋرسىنىڭ قاجەتتىلىگى تۋىنداۋدا. كاسىپتىك ءبىلىم بەرۋدىڭ وزەكتىلىگى وسى ارقىلى تاعى دا ايقىن كورىنەدى. قاجەتتىلىكتەردى وتەۋدى ءۇش دەرەك بويىنشا جۇرگىزگەندى قولايلى كورەمىز. ونىڭ ءبىرىنشىسى بەيىندى باعدارلامالار دەرەكتەرىنە نەگىزدەلسە, ەكىنشىسى الەۋمەتتىك ارىپتەستەر مەن وقۋ ورىندارىنان الىنعان اقپاراتتاردى قامتيدى. ال ءۇشىنشىسى «اتامەكەن» كاسىپكەرلىك پالاتاسىنىڭ دەرەككوزدەرىنە ارقا سۇيەيدى. اڭگىمەنىڭ اشىعىن ايتقاندا, بيىلعى جىل جاڭا ماماندىقتاردى يگەرەتىن جىل بولماق. بۇل باعىتتا ماتەريالدىق-تەحنيكالىق بازانىڭ دەڭگەيىن كوتەرۋ ءۇشىن وبلىستىق بيۋدجەتتەن قوسىمشا 250 ميلليون تەڭگە قاراستىرىلعان.
بۇگىندە تەگىن كاسىپتىك-تەحنيكالىق ءبىلىمدى ەنگىزۋ بويىنشا جوسپارىمىز دايىن. مۇندا ءبىرىنشى كەزەكتە وقۋ ورىندارىنىڭ ءتىزىمى مەن بىلىكتىلىك بويىنشا بەرىلەتىن ماماندىق تۇرلەرى سارالانعان. جوسپار, كەستەگە سايكەس جوعارىدا اتالعان ەكى دەڭگەيلى وقىتۋ ءمودۋلى بويىنشا ءوندىرىستىڭ ءار سالاسىنان 4600 ادامدى وقۋمەن قامتۋ بەلگىلەنگەن. ءتۇيىپ ايتقاندا, ەلباسىنىڭ باستاماسى بويىنشا ىسكە اسىرىلا باستاعان بارشاعا ارنالعان تەگىن كاسىپتىك ءبىلىم بەرۋ جوباسىنىڭ ەرتەڭى جارقىن. ونى ەنگىزۋ باعدارلاماسىنا ىنتا قويا بىلسەك, ايتارلىقتاي قيىندىق كەلتىرمەيدى دەگەن ويدامىن. تەك بارلىق تەتىكتەرى مۇقيات زەردەلەۋدى قاجەت ەتەدى. اتالعان جوبادا مەملەكەتتىك تاپسىرىستى ءبولۋ دەگەن ارنايى تاپسىرما بار. ايقىن ۇستانىم تانىتا ءبىلۋدىڭ قاجەتتى ءبىر تۇسى دا وسى ماسەلە بولىپ تابىلادى.
ارينە, ءبىرىنشى كەزەكتە جۇمىسشى ماماندىعىنىڭ ۇلەسى قوماقتى بولۋى كەرەك. ءبىز مۇنداي توپتاعى وقۋشىلاردى جاتاقحانامەن, ستيپەنديامەن جانە ىستىق تاماقپەن قامتۋ باعدارلاماسىن جاسادىق. ەڭ كۇردەلىسى, جاتاقحانا ماسەلەسىن شەشۋ ەكەنى بەلگىلى. بۇل ءىستى اياعىنا دەيىن جەتكىزۋ ءۇشىن وڭىردەگى بايلانىس جانە پوليتەحنيكا كوللەدجدەرىنىڭ جاتاقحانالارىنا كۇردەلى جوندەۋ جۇمىستارى جۇرگىزىلدى. سونداي-اق, قاندىاعاش پەن شالقار كوللەدجدەرى جاتاقحانالارىن كەڭەيتۋ شارالارى بەلگىلەندى. دەگەنمەن, بۇل ماسەلەدە ءبارى بىردەي ءوز شەشىمىن تاپتى دەگەن ويدان اۋلاقپىز. ءالى دە اتقارىلار جۇمىستار از ەمەس.
ساۋلە ومىربەكوۆا,
اقتوبە وبلىستىق ءبىلىم باسقارماسىنىڭ باسشىسىاقتوبە وبلىسى
