«بارىس» «مەتاللۋرگ» كومانداسىن جەڭە الا ما؟

«بارىس» حوككەي كلۋبىنىڭ باس باپكەرى ەدۋارد زانكوۆەتس قۇرلىقتىق حوككەي ليگاسىنىڭ ەكىنشى راۋندىندا ماگنيتوگورسىكىنىڭ «مەتاللۋرگىنە» قارسى ويىن جايلى وي ءبولىستى. «قارسىلاستارىمىز «شىعىس» كونفەرەنتسياسىنداعى ەڭ مىقتى ۇجىم. ءبىرىنشى ورىندى لايىقتى تۇردە الدى دەپ ويلايمىن. ءبىزدى ناعىز سىن ساعاتى كۇتىپ تۇر. بارىمىزدى سالىپ دايىندالۋىمىز كەرەك. جىگىتتەر ەكى كۇن دەمالىستان سوڭ جاتتىعۋعا قايتا شىقتى», – دەدى زانكوۆەتس. «بۇل ويىنداردا «مەتاللۋرگتىڭ» فاۆوريت ەكەنى ايتپاسا دا بەلگىلى. بىراق ءبىزدىڭ دە ءۇمىتىمىز جوق ەمەس. كەلەسى كەزەڭگە شىعۋ ءۇشىن بارىمىزدى سالامىز. قازىر قارسىلاستارىمىزدىڭ ويىنىن تالداپ, شابۋىلدارىنا قارسى ادىستەر قۇرىپ وتىرمىز», – دەدى باس باپكەر. «بارىستىڭ» باستى جۇلدىزدارىنىڭ ءبىرى برەندون بوچەنسكي كەزەكتى ماتچتاردىڭ بىرىندە جاراقات الىپ قالعان بولاتىن. «بوچەنسكي قازىر دايىندىققا كىرىستى. ءبارى ويداعىداي بولسا, ماتچتا كورەسىزدەر دەپ ويلايمىن. بىراق العاشقى ويىندا ايدىنعا شىعادى دەپ ايتا المايمىن», – دەدى ول. ماگيتوگورسكىلىكتەردىڭ ساپىندا «بارىسقا» قاۋىپتى تۋدىرۋى مۇمكىن بىردەن ءبىر ويىنشى – سەرگەي موزياكين. ال ەدۋارد زانكوۆەتس ونىڭ جولىن بوگەۋ ءۇشىن قانداي امال ويلاپ تابۋى مۇمكىن؟ «مەتاللۋرگ» ءبىر عانا ويىنشىعا ارقا سۇيەپ تۇر دەپ ايتا المايمىن. جالپى ۇجىم مىقتىلاردان قۇرالعان. شابۋىل شەبىندە دە, قورعانىستا دا جوعارى دەڭگەيلى حوككەيشىلەر جەتەرلىك. سونداي-اق, بىلىكتى جاتتىقتىرۋشىلار دا بار», – دەدى ەدۋارد زانكوۆەتس. ايتا كەتەيىك, «مەتاللۋرگ» پەن «بارىس» اراسىنداعى ويىندار 9 جانە 11 ناۋرىزدا ماگنيتوگورسكىدە, 13 جانە 15 كۇندەرى استانادا وتەدى.