ماڭىزدى ۇسىنىستار قابىلداندى

حح عاسىردىڭ باسىندا قازاق حالقىنىڭ بولاشاعى ءۇشىن كۇرەسىپ, حالىقتىڭ ۇلتتىق سانا-سەزىمىن وياتۋعا ۇمتىلعان, وتارشىلدىققا قارسى شىققان الاش قوزعالىسىنىڭ تاريحتاعى ورنى مەن ماڭىزى زور. عۇمىرى قىسقا بولسا دا بۇل قوزعالىس قازاق تاريحىندا وشپەس ءىز قالدىرعان, ەڭ ءبىر ايتۋلى تاريحي كەزەڭ رەتىندە ساقتالعان. قازاقستان رەسپۋبليكاسى ۇلت­تىق كىتاپحاناسىنىڭ ن.داۋلە­توۆا اتىنداعى زالىندا ش.ءۋالي­حانوۆ اتىنداعى تاريح جانە ەتنولوگيا ينستيتۋتى, ۇلتتىق كىتاپحانا جانە «ادىلەت» تاريحي-اعارتۋ قوعامى الاش قوزعالىسىنىڭ 100 جىلدىعىنا وراي «الاش دەپ عۇمىر كەشكەن» جوباسى اياسىندا «الاش قوزعالىسى: تاريحى مەن تاعدىرى» اتتى رەسپۋبليكالىق عىلىمي-تاجىريبەلىك كونفەرەنتسيا وتكىزدى. كىرىسپە ءسوز سويلەپ, عىلىمي كونفەرەنتسيانى اشىق دەپ جاريالاعان ۇلتتىق كىتاپحانا ديرەكتورى جانات سەيدۋمانوۆتان كەيىن ءسوز العان ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى, پروفەسسور حانگەلدى ءابجانوۆ, تانىمال عالىم ءابساتتار دەربىسالى, بەلگىلى تاريحشى مامبەت قويگەلديەۆ, «ادىلەت» تاريحي-اعارتۋ قوعامى توراعاسىنىڭ ورىنباسارى بەيبىت قويشىباي, م.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, پروفەسسور ايگۇل ىسماقوۆا, «ارىس» قورىنىڭ پرەزيدەنتى عاريفوللا انەس جانە باسقا دا بەلگىلى تاريحشى عالىمدار, ساراپشىلار, عىلىمي قىزمەتكەرلەر بايانداما جاساپ, ۇسىنىس-ويلارىن ورتاعا سالدى. احمەت بايتۇرسىن ۇلى مۇرا­جاي-ءۇيىنىڭ ديرەكتورى رايحان يماحانبەت الماتىنىڭ قاق ورتاسىندا ورنالاسقان اتالمىش مۋزەيدىڭ ءالى كۇنگە دەيىن مەملە­كەتتىڭ قاراۋىنا كىرمەگەنىن قىن­جىلا جەتكىزە وتىرىپ, ا.بايتۇر­سىنوۆ مۋزەيىن الاش ورتالىعى ەتۋ تۋرالى باستاما كوتەرىپ, ءوز ۇسىنىسىن ايتتى. قازاق حالقىنىڭ دەربەس مەملەكەت قۇرۋىنا, ۇلتتىق تۇتاستانۋىنا ۇلكەن سەپتىگىن تيگىزگەن, ازات­تىق جو­لىنداعى كوتەرگەن يدەيا­لا­رى حالىقتىڭ جۇرەگىنە جول تاۋىپ, ساياسي ساناسىن وياتقان الاش قوز­عالىسىنا ارنالعان جيىندا ارنايى قارار قابىلدانىپ, الاش قوزعالىسىنىڭ 100 جىلدىعىنا وراي الاش قايراتكەرلەرىنە ارنالعان فوتوالبوم شىعارۋ, الاش قوزعالىسى جايلى زەرتتەۋ مونوگرافيالار, جيناقتار دايارلاۋ, الاش زيالىلارى اشقان «قازاق» گازەتىندە 1915, 1916, 1917-ءشى جىلدارى توتە جازۋمەن جارىق كورگەن ماقالالاردى كيريلل قارپىمەن كىتاپ ەتىپ شىعارۋ, الاش قايراتكەرلەرىنىڭ ءومىرى مەن قىزمەتىنە ارنالعان دەرەكتى جانە كوركەم فيلم­دەر شىعارۋ, مەكتەپتەردە, جوعارى وقۋ ورىندارىندا وسى تاقىرىپتا ارنايى كەشتەر, سەمينارلار, تاربيە ساعاتتارىن ۇيىمداستىرۋ, الاش ەنتسيكلوپەدياسىن شىعارۋ, الاش قايراتكەرلەرىنە كەشەندى ەسكەرتكىش ورناتۋ, ت.ب. بىرقاتار ماڭىزدى ۇسى­نىستار قابىلداندى. ميرا بايبەك, «ەگەمەن قازاقستان» الماتى