قازاقستانداعى ەڭبەك نارىعىنداعى جاستاردىڭ ۇلەسى 27 پايىزدان 24,6 پايىزعا قىسقاردى. سونىڭ ىشىندە دەنساۋلىق ساقتاۋ, شيكىزاتتىق سەكتور مەن سۋمەن قامتۋ سالالارىندا جاس ماماندار از.
ەڭبەك نارىعىنداعى ەكىنشى ترەند - ماماندار كاسىپكەرلىكتەن باس تارتىپ, جالدامالى جۇمىسقا كوبىرەك كەتۋدە.
قازاقستانداعى جۇمىسپەن قامتۋ قۇرىلىمىنداعى جاس ماماندار 2015 جىلدىڭ 4 ماۋسىمىنان 2016 جىلدىڭ سوڭىنا دەيىن 27 پايىزدان 24,6 پايىزعا ازايدى.
2016 جىلى ەلدەگى جۇمىس ىستەيتىن جاستار سانى 8 پايىزعا ازايدى. ال ەكونوميكاداعى جالپى جۇمىس ىستەيتىن ازاماتتار سانى 0,1 پايىزعا كوبەيدى.
سوڭعى بەس جىلدا قازاقستانداعى ەڭبەك نارىعىنداعى جۇمىسكەرلەردىڭ ورتاشا جاسىنىىڭ قارتايۋى ەرەكشە بايقالادى. 2011-2016 جىلدار ارالىعىندا جالپى جۇمىسپەن قامتىلعان ازاماتتار سانى 5 پايىزعا كوبەيسە, وسىنداي جاستاردىڭ سانى 2 پايىزعا ازايعان.
قازىرگى تاڭدا, سونىمەن قاتار, جاستار كاسىپكەرلىكتىڭ بولاشاعىنا كۇمانمەن قاراپ, شاما كەلگەنشە جالدامالى ەڭبەكتى ءجون كورەدى. جۇمىسقا قابىلەتتى جاستار ءوز بەتىنشە ەمەس, جالدامالى جۇمىسقا اۋىسۋدا. سوڭعى بەس جىلدا 15-28 جاس ارالىعىنداعى جالدامالى جۇمىسشى جاستار سانى 21 پايىزعا (278 مىڭ) كوبەيسە, ءوزىن ءوزى جۇ9مىسپەن قامتۋشى جاستار سانى 40 پايىزعا (331 مىڭ) ازايدى.
قازىرگى تاڭدا ءوزىن ءوزى جۇمىسپەن قامتۋشى جاستار سانى 15-28 جاس ارالىعىنداعى بارلىق جۇمىس كۇشىنىڭ 23 پايىزىن قۇرايدى. 2000 جىلداردىڭ باسىندا جاستاردىڭ 42 پايىزدان استامى ءوز بەتىنشە ەڭبەك ەتكەندەر ەدى.
جاڭعىرتۋ 3.0 اياسىندا قر ۇكىمەتى 2017 جىلدان باستاپ ءونىمدى ەڭبەك جانە جاپپاي كاسىپكەرلىكتى دامىتۋ باعدارلاماسىن ىسكە اسىرا باستايدى.
اتاپ ايتار بولساق, قالا مەن اۋىلداعى قر ازاماتتارى ءوز كاسىبىن اشۋ ءۇشىن 16 ملن تەڭگەگە دەيىن شاعىن نەسيە الا الادى. جوبا اياسىندا نەسيەلەندىرۋ گەوگرافياسى كەڭەيتىلىپ, ولاردىڭ قارجىلىق ساۋاتى مەن كاسىپكەرلىك نەگىزدەرىن وقىتۋعا ءمان بەرىلمەك.
سالالىق نارىق بويىنشا جاستاردىڭ بەتبۇرىسى نەگىزىنەن قارجى جانە ساقتاندىرۋ (بارلىق سالانىڭ 31 پايىزى); كاسىبي جانە عىلىمي سالا (30 پايىز) جانە تەلەكوممۋنيكاتسيا سالاسىندا (29,9%).
جاستاردىڭ ەڭ از باراتىن سالاسى سۋمەن قامتۋ (16,5%), تاۋ-كەن ونەركاسىبى (18,2%) جانە دەنساۋلىق ساقتاۋ(19,2%).
