بۇگىن الماتىدا قمدب-نىڭ توراعاسى, باس ءمۇفتي ەرجان قاجى مالعاجى ۇلى ءدىني باسقارما ءبولىم باسشىلارى مەن ءدىن قىزمەتكەرلەرىنىڭ قاتىسۋىمەن جينالىس وتكىزدى, دەپ جازادى muslim.kz.
ءبولىم باسشىلارىمەن بولعان جيىندا «زەكەت» قورىنىڭ ديرەكتورى الىشەر سپانوۆ, عالامتورمەن جۇمىس ءبولىمىنىڭ باسشىسى مۇرات ابدىحالىقوۆ شاريعات جانە ءپاتۋا ءبولىمى مامانى باۋىرجان ءابدۋالى مەن مەدەت قۇرماش ۇلى, «يمان» جۋرنالىنىڭ باس رەداكتورى وڭعار ومىربەك باس مۇفتيگە ءدىني باعىتتا اقتارىلىپ جاتقان جۇمىستار تۋرالى باياندادى. باس ءمۇفتي ەرجان قاجى مالعاجى ۇلى ءبولىم باسشىلارىنىڭ سوزىنەن كەيىن جينالعانداردىڭ نازارىن ءدىننىڭ ءار سالاسىنداعى ماسەلەلەردى ءجىتى قاداعالاپ, دامىتۋ تۋرالى ناقتى مىندەتتەمەلەر جۇكتەدى. سونداق-اق, عالامتورمەن جۇمىس بولىمىنە قازاقستاننىڭ ءار وڭىرىندە ناماز ۋاقىتىن ناقتى, ءدال ەسەپتەيتىن ءموبيلدى قوسىمشا ازىرلەۋدى تاپسىردى.
«ءدىني باسقارما قوعامنىڭ ءدىني تۇرعىدان ءبىر تۇتاس دامۋىنا, ءبىر ىڭعاي وركەن جايۋىنا, ءار ساعات, ءار كۇن سايىن گۇلدەنۋىنە مۇددەلى جانە وسى باعىتتا تالماي جۇمىس جاساپ كەلە جاتىر. سوندىقتان, جۇمىسىمىزدى كۇن سايىن جەتىلدىرىپ وتىرۋ – بارشامىزعا ورتاق ماسەلە. ءدىني باسقارمانىڭ جۇمىس جاساۋ ءتورت باعىتى, ءدىن مەن ءداستۇر جانە تاريح تاعلىمى باستاماسى ءدىن قىزمەتكەرلەرىنىڭ الدىنا قوياتىن ماقساتى مەن مىندەتتەرىن ايقىنداپ بەردى. ءدىني باعىتتاعى جۇمىس - كەز كەلگەن تۇستان جول سالىپ جۇرە بەرۋگە بولاتىن اشىق الاڭ ەمەس. عاسىرلار بويى قازاق دالاسىندا ءدىن ۇستانۋدىڭ جولى, مەكتەبى قالىپتاستى. مىنە, ءبىز ەڭ الدىمەن سول جۇرەر جولىمىزدى جۇيەلەپ, باعىت-باعدارىمىزدى ايقىنداپ الۋىمىز كەرەك بولدى. ەندى وسى باعىتتاردى باسشىلىققا الا وتىرىپ تالماي دىنگە قىزمەت ەتۋىمىز كەرەك», – دەدى باس ءمۇفتي ەرجان قاجى مالعاجى ۇلى.
ءدىني باسقارمانىڭ بولىمدەرى ءدىننىڭ ءار سالاسى بويىنشا بۇل كۇندە جەمىستى ەڭبەك ەتىپ, ەگەمەندى ەلىمىزدىڭ ەرتەڭى ءۇشىن ايتارلىقتاي وڭ ىقپالىن تيگىزىپ كەلەدى. قوعامدا يگى ءىس شارالار ۇيىمداستىرىپ, يماندىلىقتى ناسيحاتتاپ كەلەدى. يمامداردىڭ ءبىلىمى مەن بىلىكتىلىگى دە ارتتى. ءدىني دارىستەر مەن ۋاعىز-ناسيحات جۇمىستارىنىڭ سانى مەن ساپاسىنىڭ كوتەرىلۋى – وسىنىڭ ايقىن دالەلى.
قمدب-نىڭ توراعاسى, باس ءمۇفتي ەرجان قاجى مالعاجى ۇلى اتالمىش جيىندى قورىتىندىلاي كەلە بارلىق ءدىن قىزمەتكەرلەرىنىڭ جۇمىسىنا ساتتىلىك تىلەدى.
